ବାଲିକୁଦା,୧୦ା୧୧(ସ୍ବ.ପ୍ର.): ବାଲିକୁଦା ବ୍ଲକ ଅଧୀନ ସଂଗ୍ରାମପୁର ପଞ୍ଚାୟତ ଗୋଗୋଳ ଗ୍ରାମର ବିଧବା ବୃଦ୍ଧା ନିରୁପମା ମଲ୍ଲିକଙ୍କ ଫାଇଁ ପକ୍କାଘର ସାତସପନ ପାଲଟିଛି। ଫଳରେ ସେ ଭାଗ୍ୟକୁ ଆଦରି ତିନି ପୁଅ ଓ ଭୀନ୍ନକ୍ଷମ ଝିଅକୁ ଧରି ଭଙ୍ଗା ଚାଳଘରେ ରହୁଛନ୍ତି। ହେଲେ ତାଙ୍କ ଦୁଃଖରେ କେହି ଆହା ପଦେ କହୁ ନ ଥିବା ବେଳେ ସରକାରୀ ବ୍ୟବସ୍ଥା ତାଙ୍କୁ ଉପହାସ କରୁଥିବା ଭଳି ଅନୁମାନ ହେଉଛି। ନିରୁପମାଙ୍କ ସ୍ବାମୀ ଗଜେନ୍ଦ୍ର ରୋଗରେ ପଡି ୧୯୯୭ରୁ ଆଖି ବୁଜିଲେଣି। ବଡ ପୁଅ ସତ୍ୟବାନ ଓ ଅନ୍ୟ ଦୁଇ ପୁଅ ସୁଧୀର, ସୌଭାଗ୍ୟ ଦିବ୍ୟାଙ୍ଗ ଝିଅ ରୀନାକୁ ନେଇ ବଡ ଦୁଃଖ କଷ୍ଟରେ ଚଳୁଛନ୍ତି ନିରୁପମା। ଜନ୍ମର ବର୍ଷକ ପରେ ଝିଅ ରୀନାଙ୍କଠାରେ ଦେଖା ଦେଇଥିଲା ଅଷ୍ଟ ମାଲେସିଆ ରୋଗ। ଏଥିରେ ରୀନାଙ୍କ ଗୋଡ ବଙ୍କା ହୋଇଗଲା। ଝିଅର ଏପରି ଅବସ୍ଥା ମଧ୍ୟ ଅନେକ ଦୁଃଖ ଦେଇଛି ଏହି ପରିବାରକୁ। ନିରୁପମାଙ୍କୁ ମିଳୁଥିବା ବିଧବା ଭତ୍ତା ୫୦୦ ଟଙ୍କା ଓ ଦିବ୍ୟାଙ୍ଗ ଝିଅ ରୀନା ପାଉଥିବା ୫୦୦ ଭତ୍ତା ଟଙ୍କାରେ ପରିବାର ଚଳୁଛି। ମା’ ଝିଅଙ୍କ ଏହି ଟଙ୍କା ଓ ଅନ୍ତଦ୍ୱୟ କାର୍ଡର ୩୫ କେଜିର ଚାଉଳ ସିନା ପେଟ ଭୋକକୁ କିଛି ମାତ୍ରାରେ ମେଣ୍ଟାଉଛି। ହେଲେ ମୁଣ୍ଡ ଗୁଞ୍ଜିବାକୁ ଘର ଖଣ୍ଡେ ନ ଥିବାରୁ ହୀନସ୍ତା ହେଉଛନ୍ତି ଏହି ପରିବାର। ଦିନ ସାରା ଯେନତେନ ଚଳି ଯାଉଛନ୍ତି ା ହେଲେ ରାତି ଆସିଲେ ଭଙ୍ଗା ଘରେ ରହିବାକୁ ଡରଲାଗେ ବୋଲି କୋହ ଭରା କଣ୍ଠରେ କହିଛନ୍ତି ନିରୁପମା। ପ୍ରଧାନମନ୍ତ୍ରୀ ଆବାସ ଓ ବିଜୁ ପକ୍କାଘର ଯୋଜନାରେ ଘର ମିଳୁଥିଲେ ମଧ୍ୟ ନିରୂପମା ଏହାର ସୁବିଧା ପାଇ ପାରୁନାହାନ୍ତି। ସେମାନେ ରହୁଥିବା ଘରର ଛପର ବଦଳାଇବା ମଧ୍ୟ ଅର୍ଥର ଅଭାବ। ସେହି ଘରେ ସେମାନେ ରହିଥିବା ବେଳେ ବାତ୍ୟା ଫନୀରେ ଘରଟି ସମ୍ପୂର୍ଣ୍ଣ ଭାଙ୍ଗି ଯାଇଥିଲା। ସେତେବେଳେ ଉକ୍ତ ପରିବାର ଗଁାସ୍କୁଲରେ ଆଶ୍ରୟ ନେଇଥିଲେ। ବାତ୍ୟା ପରେ ପୁଣି ସେହି ଘରକୁ ମରାମତି କରି ରହୁଛନ୍ତି। ତେଣୁ ଏହି ଅସହାୟ ପରିବାକୁ ପକ୍କାଘର ଯୋଗାଇ ଦେବା ନିମନ୍ତେ ଗ୍ରାମବାସୀ ଦାବି କରିଛନ୍ତି। ଏସମ୍ପର୍କରେ ବିଡିଓ କଲ୍ୟାଣୀ ପଟ୍ଟନାୟକଙ୍କୁ ପଚାରିବାରେ ସମସ୍ତ ଯୋଗ୍ୟ ହିତାଧିକାରୀଙ୍କୁ ସରକାରଙ୍କ ପକ୍ଷରୁ ପକ୍କାଘର ଯୋଗାଇ ଦିଆଯାଉଛି। ଯଦି ନିରୁପମା ଏଥିରୁ ବାଦ୍ ପଡ଼ିଛନ୍ତି ତାହାର ତଦନ୍ତ କରାଯିବ। ତଦନ୍ତରେ ଯୋଗ୍ୟ ବିବେଚିତ ହେଲେ ଘର ଦିଆଯିବ ବୋଲି କହିଥିଲେ।
