ବରଗଡ଼, ୧୭।୨(ପ୍ରେମାନନ୍ଦ ଖମାରୀ) – ବରଗଡ଼ ଜିଲାରେ ଚାଷୀଙ୍କ ସମସ୍ୟା ଲାଗି ରହିଛି। ଖରିଫକ ଧାନ ବିକ୍ରି ସମସ୍ୟା ତୁଟି ନଥିବାବେଳେ ଚାଷୀମାନଙପରେ ଏବେ ରବି ଋତୁର ଧାନ ଚାଷ ପାଇଁ ସାର କିଣାରେ ଶୋଷଣର ସମ୍ମୁଖୀନ ହେବାକୁ ପଡୁଛି ବୋଲି ଚାଷୀମାନେ ଅଭିଯୋଗ କରିଛନ୍ତି। ଏହି କ୍ରମରେ ମଙ୍ଗଳବାର ଚାଷୀମାନେ ଜିଲା ମୁଖ୍ୟ କୃଷି ଅଧିକାରୀ ଲୋଚନ ଚରଣ ମାଝିଙ୍କୁ ଫେରାଦ ହୋଇଛନ୍ତି। ସୂଚନା ମୁତାବକ ବର୍ତ୍ତମାନ ରବି ରୁତୁର ଚାଷକାର୍ଯ୍ଯ ଆରମ୍ଭ ହୋଇଗଲାଣି। ଜିଲାର ମଣ୍ଡିମାନଙ୍କରେ ହଜାର ହଜାର କ୍ବିଣ୍ଟାଲ ଧାନ ବିକ୍ରି ଅପେକ୍ଷାରେ ପଡିରହିଛି। ଯେଉଁଥିପାଇଁ ଚଳିତ ରୁତୁର ଚାଷକାର୍ଯ୍ଯ ବିଳମ୍ବ ହୋଇଗଲାଣି। ଏହି ସମୟରେ ଚାଷୀ ଧାନ ବିକ୍ରି ପାଇଁ ମଣ୍ଡିକୁ ଦୌଡିବ ନା ଚାଷ କାର୍ଯ୍ୟ ପାଇଁ ସାର ଖୋଜିବ, ତାହା ସେମାନଙ୍କ ପାଇଁ ଚିନ୍ତାର ବିଷୟ ହୋଇଛି। ମଙ୍ଗଳବାର ଜିଲାର ସୋହେଲା ଓ ଭଟଲି ବ୍ଲକର ବିଭିନ୍ନ ଶତାଧିକ ଚାଷୀ ଜିଲା ମୁଖ୍ୟ କୃଷି ଅଧିକାରୀ କାର୍ଯ୍ଯାଳୟକୁ ଆସି ସାର କଳାବଜାରୀ ହେଉଥିବା ଲିଖିତ ଅଭିଯୋଗ କରିଛନ୍ତି। ଖୋଲାବଜାରରେ ନିର୍ଦ୍ଧାରିତ ଦର ଠାରୁ ଢେର ଅଧିକ ଦରରେ ସାର ବିକ୍ରି ଚାଲିଥିବା ସେମାନେ ଅଭିଯୋଗ କରିଛନ୍ତି । ଜିଲାର ସମସ୍ତ ବ୍ଳକରେ କେତେକ ଲାଇସେନ୍ସପ୍ରାପ୍ତ ହୋଲସେଲର ଓ ରିଟେଲର ୟୁରିଆ ସାର ୫୦୦ ଟଙ୍କାରୁ ଅଧିକ ଦରରେ ଏବଂ ଡିଏପି ସାର ୧୮୦୦ ଟଙ୍କାରୁ ଅଧିକ ଦରରେ ବିକ୍ରି କରୁଥିବା ଅଭିଯୋଗ ହୋଇଛି। ୟୁରିଆ ସାର ପକେଟ୍ ପ୍ରତିଆନିର୍ଦ୍ଧାରିତ ଦର ୨୬୬ଟଙ୍କା ୫୦ ପଇସା ଏବଂ ଡିଏପି ସାର ପକେଟ୍ ପ୍ରତି ୧୩୫୦ ଟଙ୍କା ରହିଥିବାବେଳେ ସେଭଳି କଳାବଜାର ଯୋଗୁଁ ଚାଷୀମାନେ ଶୋଷଣର ସମ୍ମୁଖୀନ ହେଉଥିବା ଅଭିଯୋଗ ହେଉଛି। ଏ ସମ୍ପର୍କରେ ଜିଲ୍ଲା କୃଷି ଅଧିକାରୀ ମାଝି କହିଥିଲେ, ଜିଲାରେ ଭରପୁର ମାତ୍ରାରେ ସାର ମହଜୁଦ ଅଛି। ପ୍ରାଥମିକ କୃଷି ସମବାୟ ସମିତି ଜରିଆରେ ୬୦ ଭାଗ ଏବଂ ଲାଇସେନ୍ସପ୍ରାପ୍ତ ରିଟେଲରଙ୍କ ଜରିଆରେ ୪୦ ଭାଗ ସାର ଯୋଗାଇ ଦିଆଯାଉଛି। ସାର କଳାବଜାର ଅଭିଯୋଗ ଆସିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି । ତେବେ ଆଗାମୀ ଦୁଇ ତିନି ଦିନ ମଧ୍ୟରେ ଯଦି ଉପଯୁକ୍ତ ଦରରେ ସମସ୍ତ ଚାଷୀଙ୍କୁ ସାର ଯୋଗାଇ ଦିଆ ନଯାଏ, ତାହେଲେ ଚାଷୀ ରାଜରାସ୍ତାକୁ ଓହ୍ଲାଇବ ବୋଲି ଚାଷୀ ସଂଗଠନ ଜୟ କିସାନ ଆନ୍ଦୋଳନ ଚେତାବନୀ ଦେଇଛି । ଜୟ କିସାନ ଆନ୍ଦୋଳନ ର ଜିଲ୍ଲା ସଭାପତି ସୁଶୀଲ କୁମାର ସାହୁ, ସାଧାରଣ ସଂପାଦକ ହର ବଣିଆଁ, ଅକ୍ଷୟ ପ୍ରଧାନ, ଉମେଶ ପ୍ରଧାନ, ଭରତ ପ୍ରଧାନ ଆଦି ଚାଷୀ ପ୍ରତିନିଧି ଦାବିପତ୍ର ପ୍ରଦାନ ସମୟରେ ଉପସ୍ଥିତ ଥିଲେ।
