ନାଉଗଁା,୩୦ା୭(ସ୍ବ.ପ୍ର.): ନାଉଗଁା ବ୍ଲକ ଜାମୁଗଁା ପଞ୍ଚାୟତ ରଘୁନାଥପୁର ଗ୍ରାମର ଚନ୍ଦେଶ୍ୱର ଲେଙ୍କା। ଜଣେ ମୂର୍ତ୍ତି କାରିଗର ଭାବେ ସେ ସ୍ଥାନୀୟ ଅଞ୍ଚଳରେ ଜଣାଶୁଣା। ଦୀର୍ଘ ୩୦ବର୍ଷ ହେଲା ସେ ଗଣେଶ ପୂଜା, ସରସ୍ବତୀ ପୂଜା, ଖୁଦୁରୁକୁଣୀ ଆଦି ବିଭିନ୍ନ ପର୍ବ ପର୍ବାଣୀରେ ମୂର୍ତ୍ତି ଗଢି ଗୁଜୁରାଣ ମେଣ୍ଟାଇ ଆସୁଛନ୍ତି। ଘରେ ତାଙ୍କର ବୃଦ୍ଧା ମା’ କଷି ଦେଈ(୯୩), ସ୍ତ୍ରୀ ଫୁଲଣା ଓ ଦୁଇ ପୁଅ। ଚନ୍ଦେଶ୍ୱର ମୂର୍ତ୍ତି ଗଢି ଯାହା ରୋଜଗାର କରନ୍ତି ସେଥିରେ ୫ ପ୍ରାଣୀ ଚଳିବା କଷ୍ଟକର ହେଉଛି। ସେଥିରେ ପୁଣି ପିଲାମାନଙ୍କ ପାଠପଢା। ଏମିତିରେ ବର୍ତ୍ତମାନ ଅତ୍ୟାଧୁନିକ ଛାଞ୍ଚ ମେଶିନରେ ତିଆରି ମୂର୍ତ୍ତି ମିଳୁଥିବାରୁ ଚନ୍ଦେଶ୍ୱରଙ୍କ ହାତ ତିଆରି ମୂର୍ତ୍ତିର ଚାହିଦା କମିଗଲାଣି। ତେଣୁ ଆଗ ଭଳି ରୋଜଗାର ହେଉନି। ଆର୍ଥିକ ଅନଟନ ମଧ୍ୟରେ ପରିବାର ଚଳୁଥିବାବେଳେ ଘର ଖଣ୍ଡେ କରିବା ସମ୍ଭବ କଷ୍ଟକର। ତେଣୁ ପଲିଥିନ ତଳେ ଜୀବନ ବିତାଉଛନ୍ତି ୫ ପ୍ରାଣୀ। ଗୁରୁତ୍ୱପୂର୍ଣ୍ଣ କଥା ହେଲା ସରକାର କାରିଗର ଓ ଗରିବ ଶ୍ରେଣୀର ଲୋକଙ୍କୁ ବିଭିନ୍ନ ଯୋଜନାରେ ପ୍ରୋତ୍ସାହନ ଯୋଗାଇ ଦେଉଛନ୍ତି। ବିଭିନ୍ନ ପ୍ରକାର ଭତ୍ତା ସହ ଇନ୍ଦିରା ଆବାସ, ବିଜୁ ପକ୍କାଘର ଆଦି ପ୍ରଦାନ କରୁଛନ୍ତି। କିନ୍ତୁ ଚନ୍ଦେଶ୍ୱରଙ୍କ ନିକଟରେ ଏସବୁ ଯୋଜନା ପହଞ୍ଚତ୍ପାରିନାହିଁ। କେବଳ ଖାଦ୍ୟ ସୁରକ୍ଷା ଯୋଜନାରେ ତାଙ୍କୁ ସାମିଲ କରାଯାଇଛି। କୌଣସି ରାଜନୈତିକ ଦଳରେ ସାମିଲ ହୋଇ ନ ଥିବାରୁ ଓ ହାତଗୁଞ୍ଜା ଦେଇପାରୁ ନ ଥିବାରୁ ତାଙ୍କୁ ଘର ଖଣ୍ଡେ ମିଳିପାରୁ ନ ଥିବା ଚନ୍ଦେଶ୍ୱର କହିଛନ୍ତି। ଥିଲାବାଲା ଲୋକ ସରକାରୀ ଯୋଜନାରେ ଘର ପାଉଥିବାବେଳେ ବର୍ଷ ବର୍ଷ ଧରି ପଲିଥିନ ତଳେ ରହି ମଧ୍ୟ ସେ ଏହି ଯୋଜନାରୁ ବଞ୍ଚତ୍ତ ହେଉଛନ୍ତି। ଘର ପାଇଁ ସେ ବହୁବାର ଆବେଦନ କରିଥିଲେ ମଧ୍ୟ ତାଙ୍କ କଥା ବିଚାରକୁ ନିଆଯାଉନାହିଁ। ବର୍ତ୍ତମାନ ନୂତନ ହିତାଧିକାରୀଙ୍କୁ ଘର ଦେବା ପାଇଁ ତାଲିକା ଆସିଥିବାବେଳେ ସେଥିରେ ତାଙ୍କ ନାମ ନାହିଁ। ସେହିପରି ଜଣେ କାରିଗର ଭାବେ ନିଜ ବ୍ୟବସାୟ ବଢାଇବାକୁ ତାଙ୍କର ଇଚ୍ଛା ଥିଲେ ମଧ୍ୟ ସେଥିପାଇଁ ପ୍ରୋତ୍ସାହନ ମିଳୁନାହିଁ। କେବଳ ସେତିକି ନୁହେଁ ସରକାରଙ୍କ କଳାକାର ଭାତ୍ତା ପାଇବାରୁ ମଧ୍ୟ ସେ ବଞ୍ଚତ୍ତ ହୋଇଛନ୍ତି। ଏ ସମ୍ପର୍କରେ ସରପଞ୍ଚ ଲଲାଟେନ୍ଦୁ ପରିଡାଙ୍କୁ ପଚାରିବାରେ ସେ କହିଲେ ଯେ, ଚନ୍ଦେଶ୍ୱର ଆବେଦନ କରିଥିଲେ। କିନ୍ତୁ ଏହାର ତଦନ୍ତ ବାହାର ଟିମ୍ ଦ୍ୱାରା କରାଯାଉଥିଲା। କ’ଣ ପାଇଁ ତାଙ୍କୁ ବାଦ୍ ଦିଆଗଲା ଜଣାପଡିନାହିଁ। ବିଡିଓ ରଶ୍ମିରେଖା ମଲିକଙ୍କୁ ପଚାରିବାରେ ପଚାରିବାରେ କାହିଁକି କଟିଛି ତଦନ୍ତ ପରେ ଜଣାପଡିବ ବୋଲି କହିଛନ୍ତି।
