ଭଦ୍ରକ ଅଫିସ, ୨୩।୧-ଭଦ୍ରକ ଜିଲାରେ ଖରିଫ୍ ଧାନ ଅମଳ ସରିବାକୁ ବସିଲାଣି। ହେଲେ ଏଯାଏ ବୁଲ୍ବୁଲ୍ ବାତ୍ୟା କ୍ଷତିଗ୍ରସ୍ତ ଚାଷୀଙ୍କୁ ମିଳିଲାନି ଇନ୍ପୁଟ୍ ସବ୍ସିଡି। ଯାହାକୁ ନେଇ କ୍ଷତିଗ୍ରସ୍ତ ଚାଷୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଫଳରେ ପ୍ରତି ଅଭିଯୋଗ ଶୁଣାଣିରେ ଏହି କ୍ଷତିଗ୍ରସ୍ତ ଚାଷୀଙ୍କ ଲମ୍ବା ତାଲିକା ଦେଖିବାକୁ ମିଳୁଛି। ଏହାମଧ୍ୟରେ ଦୁଇମାସ ବିତିଯାଇଥିବାବେଳେ ଏଯାଏ ସହାୟତା ପ୍ରଦାନ କରା ନ ଯିବା ନେଇ ଚାଷୀ ଅସନ୍ତୋଷ ବଢ଼ିବାରେ ଲାଗିଛି।
ଉଲ୍ଲେଖନୀୟ ଯେ, ଗତବର୍ଷ ନଭେମ୍ବରରେ ପ୍ରଳୟଙ୍କରୀ ବୁଲ୍ବୁଲ୍ ପ୍ରଭାବରେ ଭଦ୍ରକ ଜିଲାରେ ବିଶେଷ କରି ଖରିଫ୍ ଧାନଚାଷ ପ୍ରଭାବିତ ହୋଇଥିଲା। ହଜାର ହଜାର ହେକ୍ଟର ଚାଷଜମିରେ ପାଣି ପଶି ଫାଚିଲା ଧାନ ଫସଲକୁ ନଷ୍ଟଭ୍ରଷ୍ଟ କରିଥିଲା। ପ୍ରାୟ ଅମଳ ସମୟରେ ଏହି କ୍ଷତି ଚାଷୀଙ୍କ ମେରୁଦଣ୍ଡ ଭାଙ୍ଗିଥିଲା। ଫୁଲ ଉଡ଼ାଉଥିବା ଧାନକୁ ଅଗାଡ଼ି କରିଦେଇଥିଲା ବାତ୍ୟା। ବୁଲ୍ବୁଲ୍ ପରେ ସରକାରୀ ଭାବେ କ୍ଷୟକ୍ଷତି ଆକଳନ ଆରମ୍ଭ ହୋଇଥିଲା। ଜିଲା କୃଷି ବିଭାଗ ପକ୍ଷରୁ ଜିଲାରେ ମୋଟ ୧ ଲକ୍ଷ ୬୩ ହଜାର ହେକ୍ଟର ଚାଷଜମି ମଧ୍ୟରୁ ୬୩ ହଜାର ୭୨୯ ହେକ୍ଟର ଜମି ବୁଲ୍ବୁଲ୍ରେ ପ୍ରଭାବିତ ହୋଇଥିବା ନେଇ ସରକାରଙ୍କୁ ରିପୋର୍ଟ କରାଯାଇଥିଲା। ଯାହାର ଆର୍ଥିକ କ୍ଷୟକ୍ଷତି ପରିମାଣ ୫୮କୋଟି ୯୮ ଲକ୍ଷ ବୋଲି ଦର୍ଶାଯାଇ ସରକାରଙ୍କୁ ଏହି ବାବଦକୁ ଇନ୍ପୁଟ୍ ସବ୍ସିଡି ଯୋଗାଇ ଦେବାକୁ ସୁପାରିସ କରାଯାଇଥିଲା। ଏହାମଧ୍ୟରେ ରାଜ୍ୟ ସରକାରଙ୍କ ପକ୍ଷରୁ ଜିଲାକୁ ଘର ଏବଂ କୋଠାବାଡ଼ି କ୍ଷୟକ୍ଷତି ବାବଦ କ୍ଷତିପୂରଣ ଅର୍ଥ ଯୋଗାଇ ଦିଆଯାଇଥିଲେ ମଧ୍ୟ ସର୍ବାଧିକ କ୍ଷତି ହୋଇଥିବା କୃଷି କ୍ଷେତ୍ର ଲାଗି ଏଯାଏ ଆର୍ଥିକ ସହାୟତା ଯୋଗାଇ ଦିଆଯାଇ ନାହିଁ। ଅନ୍ୟପକ୍ଷେ କ୍ଷୟକ୍ଷତି ନେଇ ରାଜସ୍ବ ଓ କୃଷି ବିଭାଗର ମିଳିତ କ୍ରପ୍କଟିଂ ରିପୋର୍ଟ ପ୍ରଦାନ କରାଯିବ ବୋଲି ସୂଚନା ଆସିବା ପରେ ଏହା ସମସ୍ତଙ୍କୁ ଅଡୁଆ କରିଛି। ଫଳରେ ଜିଲା ପ୍ରଶାସନ ପକ୍ଷରୁ ଅଦ୍ୟାବଧି ଚୂଡ଼ାନ୍ତ ତାଲିକା ସିଦ୍ଧାନ୍ତ ହୋଇପାରି ନ ଥିବା ଜଣାପଡ଼ିଛି। ଏ ସମ୍ପର୍କରେ ଅତିରିକ୍ତ ଜିଲାପାଳ ଶ୍ୟାମଭକ୍ତ ମିଶ୍ରଙ୍କୁ ପଚାରିବାରୁ ଗୋଟିଏ ସପ୍ତାହ ମଧ୍ୟରେ ଚାଷୀଙ୍କ ବୁଲ୍ବୁଲ୍ କ୍ଷୟକ୍ଷତି ଭରଣା କରାଯିବ ଓ ଏଥିପାଇଁ ପ୍ରଶାସନ ପକ୍ଷରୁ ସମସ୍ତ ପ୍ରକ୍ରିୟା ସରିଥିବା କହିଛନ୍ତି।
