ନୟାଗଡ଼ ଅଫିସ/ଗଣିଆ (ଡି.ଏନ୍.ଏ.),୨୩ା୧: ନୟାଗଡ଼ ଜିଲା ଗଣିଆ ବ୍ଲକ ଛାମୁଣ୍ଡିଆ ଡାକବଙ୍ଗଳାଠାରେ ବୁଧବାର ଡିଷ୍ଟ୍ରିକ୍ଟ ଡେଭଲପ୍ମେଣ୍ଟ କୋ ଅର୍ଡ଼ିନେସନ୍ ଆଣ୍ଡ ମନିଟରିଂ କମିଟି (ଦିଶା) ବୈଠକ ଅନୁଷ୍ଠିତ ହୋଇଯାଇଛି। ବର୍ଷ ଆରମ୍ଭରୁ ଏହି ବୈଠକ ହୋଇଥିବାରୁ ଜିଲା ଗ୍ରାମ୍ୟ ଉନ୍ନୟନ ସମ୍ମିଳନୀ କକ୍ଷ ବଦଳରେ ଡାକବଙ୍ଗଳାଠାରେ କରାଯାଇଥିଲା। କମିଟି ଅଧ୍ୟକ୍ଷ ତଥା କଟକ ଏମ୍ପି ଭର୍ତ୍ତୃହରି ମହତାବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଜିଲାରେ ପ୍ରଧାନମନ୍ତ୍ରୀ ଆବାସ ଯୋଜନା (ଗ୍ରାମୀଣ, ସହରାଞ୍ଚଳ), ଏମ୍ଜିଏନ୍ଆର୍ଇଜିଏସ୍, ବିଏସ୍ଏନ୍ଏଲ୍ ସେବା ଆଦି ଉପରେ ଆଲୋକପାତ କରାଯାଇଥିଲା। ପ୍ରଥମେ ପ୍ରଧାନମନ୍ତ୍ରୀ ଆବାସ ଯୋଜନା (ପିଏମ୍ଏୱାଇ) ଉପରେ ଆଲୋଚନା ହୋଇଥିଲା। ପୂର୍ବରୁ ପକ୍କା ଘର ଯୋଜନାରେ ହିତାଧିକାରୀମାନେ ଟଙ୍କା ପାଇଥିଲେ ମଧ୍ୟ କୌଣସି କାରଣରୁ ସେମାନେ ଘର କରିପାରି ନ ଥିଲେ। ଉକ୍ତ ସମୟରେ ପାଇଥିବା ଟଙ୍କାକୁ ଫେରାଇ ବର୍ତ୍ତମାନ ପକ୍କା ଘର ଯୋଜନାରେ ସାମିଲ ହୋଇଛନ୍ତି। ଭାପୁର ବ୍ଲକ ବ୍ୟତୀତ ଅନ୍ୟ ୭ ବ୍ଲକରେ ୯୫୯ ହିତାଧିକାରୀ ଟଙ୍କା ଫେରାଇଥିବାରୁ ସେମାନେ ଏହି ସୁବିଧା ପାଇପାରିବେ।
୨୦୧୯-୨୦ ଆର୍ଥିକ ବର୍ଷରେ ଜିଲାରେ ପିଏମ୍ଏୱାଇ ଗ୍ରାମାଞ୍ଚଳରେ ମାତ୍ର ୪୨ ପ୍ରତିଶତ ଘର କରାଯାଇଥିବା ସୂଚନା ଦିଆଯାଇଥିଲା। ନୟାଗଡ଼ ବ୍ଲକରେ ୨୦୧୯-୨୦ ଆର୍ଥିକ ବର୍ଷରେ ପ୍ରଧାନମନ୍ତ୍ରୀ ଆବାସ ଯୋଜନାରେ ୧୬୧୧ ଘର କରିବା ପାଇଁ ଲକ୍ଷ୍ୟଧାର୍ଯ୍ୟ କରାଯାଇଥିବା ବେଳେ ୧୨୦୭ଟି ସମ୍ପୂର୍ଣ୍ଣ ହୋଇଛି। ଖଣ୍ଡପଡ଼ା ବ୍ଲକରେ ୩୯୧ରୁ ୨୦୯, ଓଡ଼ଗାଁରେ ୧୨୧୦ରୁ ୬୨୨, ଗଣିଆରେ ୭୮ଟିରୁ ୩୯, ନୂଆଗାଁରେ ୧୬୫୩ରୁ ୬୦୨, ଦଶପଲ୍ଲାରେ ୧୪୧୯ରୁ ୪୭୮, ରଣପୁରରେ ୧୫୨୬ରୁ ୪୮୮, ଭାପୁର ବ୍ଲକରେ ୧୭୮୪ଟିରୁ ୪୭୭ଟି ସମ୍ପୂର୍ଣ୍ଣ ହୋଇଛି। ଜିଲାରେ ୮ ବ୍ଲକ ପାଇଁ ୯୬୭୨ ଘର କରିବା ଲକ୍ଷ୍ୟଧାର୍ଯ୍ୟ ହୋଇଥିବା ବେଳେ ସେଥିମଧ୍ୟରୁ ୯୫୧୬ ଜଣଙ୍କୁ ପ୍ରଥମ କିସ୍ତି ପ୍ରଦାନ କରାଯାଇଥିଲା। ବର୍ତ୍ତମାନ ସୁଦ୍ଧା ମୋଟ ୪୧୨୨ଟି ଘର ସମ୍ପୂର୍ଣ୍ଣ ହୋଇଥିବା ସୂଚନା ଦିଆଯାଇଛି। ସହରାଞ୍ଚଳରେ ମଧ୍ୟ ସମାନ ଅବସ୍ଥା। ଜିଲାର ୧ଟି ପୌର ପରିଷଦ ଓ ୪ ବିଜ୍ଞାପିତ ଅଞ୍ଚଳ ପରିଷଦ ପାଇଁ ୨୭୮୨ ଲକ୍ଷ୍ୟଧାର୍ଯ୍ୟ ହୋଇଥିବା ବେଳେ ମାତ୍ର ୧୦୪୯ଟି ସମ୍ପୂର୍ଣ୍ଣ ହୋଇଛି। ନୟାଗଡ଼ ପୌର ପରିଷଦରେ ୩୬୭ ପକ୍କା ଘର ମଞ୍ଜୁର ହୋଇଥିବା ବେଳେ ୧୦୨ଟି ସମ୍ପୂର୍ଣ୍ଣ ହୋଇଛି। ଖଣ୍ଡପଡ଼ା ଏନ୍ଏସିରେ ୨୪୩ରୁ ୨୧୬, ଦଶପଲ୍ଲା ଏନ୍ଏସିରେ ୧୧୮୪ରୁୁ ୨୭୨, ରଣପୁର ଏନ୍ଏସିରେ ୭୯୯ରୁ ୩୪୪, ଓଡ଼ଗାଁ ଏନ୍ଏସିରେ ୧୮୯ରୁ ୧୧୫ଟି ସମ୍ପୂର୍ଣ୍ଣ ହୋଇଛି। ବଳକା ରହିଯାଇଥିବା ଘରକୁ ଅଧିକାରୀମାନେ ଗୁରୁତ୍ୱ ଦେଇ ସାରିବା ପାଇଁ ବିଧାୟକମାନେ କହିଥିଲେ। ପରେ ଏମ୍ଜିଏନ୍ଆର୍ଇଜିଏସ୍ ମାଧ୍ୟମରେ ବନ ବିଭାଗ ଦ୍ୱାରା କି କାମ ହୋଇଛି ଓ ଆଗାମୀ ଦିନରେ କି କାର୍ଯ୍ୟ କରିବା ପାଇଁ ଲକ୍ଷ୍ୟ ରଖାଯାଇଛି ସେ ନେଇ ଆଲୋଚନା ହୋଇଥିଲା। ଡିଏଫଓ ଧନରାଜ ଏଚ୍ଡି ୨୦୧୯-୨୦ ବର୍ଷରେ ୩ କୋଟି ୯୦ ଲକ୍ଷ ୪୫ ହଜାର ୧୮୧ ଟଙ୍କା ବିଭିନ୍ନ ପ୍ରକଳ୍ନ ପାଇଁ ମଞ୍ଜୁର ହୋଇଥିବା ବେଳେ ୭୯ ଲକ୍ଷ ୧୮ ହଜାର ଟଙ୍କାର କାର୍ଯ୍ୟ ସରିଥିବା କହିଥିଲେ। ଆଗାମୀ ଦିନରେ ଅନ୍ୟାନ୍ୟ କାର୍ଯ୍ୟ କରାଯିବ ବୋଲି ସୂଚନା ଦେଇଥିଲେ। ଏହା ପରେ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ ଦ୍ୱାରା ଜିଲାର ବିଭିନ୍ନ ଗ୍ରାମରେ ଜଳଯୋଗାଣର ସ୍ଥିତି ବିଷୟରେ ସୂଚନା ଦିଆଯାଇଥିଲା। ଜିଲା ପରିଷଦ ସଭ୍ୟ ରାମେଶ୍ୱର ଶତପଥୀ କଣ୍ଟିଲୋଠାରେ ମେଗା ଜଳ ଯୋଗଣ ପ୍ରକଳ୍ପ ହୋଇଥିବା ବେଳେ କଣ୍ଟିଲୋ ଗ୍ରାମ ଜଳଯୋଗାଣରୁ ବଞ୍ଚତ୍ତ ହେଉଥିବା କହିଥିଲେ। ଜିଲାର ବିଭିନ୍ନ ସ୍ଥାନରେ ବିଏସ୍ଏନଏଲ୍ ମୋବାଇଲ ସେବା ବିଷୟରେ ଆଲୋଚନା ହୋଇଥିଲା। ଜିଲାର ୧୭୮ ଗ୍ରାମ ଥିବା ବେଳେ ୩୦ ଗ୍ରାମରେ ବିଏସ୍ଏନଏଲ ଅପ୍ଟିକାଲ୍ ଫାଇବର ବ୍ରଡ୍ବ୍ୟାଣ୍ଡ ସେବା ଯୋଗାଇ ଦିଆ ଯାଇଥିବା ନେଇ ବିଭାଗୀୟ ଅଧିକାରୀ ସୂଚନା ଦେଇଥିଲେ। ଦଶପଲ୍ଲା ନିର୍ବାଚନମଣ୍ଡଳୀରେ ୮ଟି ଜାଗାରେ ବିଏସ୍ଏନଏଲ ମୋବାଇଲ ଟାୱାର ବସାଇବା ପାଇଁ ଚିହ୍ନଟ ହୋଇଥିବା ବେଳେ ବର୍ତ୍ତମାନ ସୁଦ୍ଧା କୌଣସି କାର୍ଯ୍ୟ ହୋଇ ନ ଥିବା କୁହାଯାଇଥିଲା। ବୈଠକରେ ଅନ୍ୟମାନଙ୍କ ମଧ୍ୟରେ ରଣପୁର ବିଧାୟକ ତଥା ଜିଲା ଯୋଜନା କମିଟି ଅଧ୍ୟକ୍ଷ ସତ୍ୟ ନାରାୟଣ ପ୍ରଧାନ, ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା, ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ, ଜିଲାପାଳ ଡା. ପୋମା ଟୁଡ଼ୁ, ପ୍ରକଳ୍ପ ନିର୍ଦ୍ଦେଶକ ସୁବାସ ଚନ୍ଦ୍ର ରାୟ, ଜିଲା ପରିଷଦ ସଭାପତି ବୈଜୟନ୍ତୀମାଳା ମହାନ୍ତି, ଉପସଭାପତି ଅଖିଳ କୁମାର ଜାନି ପ୍ରମୁଖ ମଞ୍ଚାସୀନ ଥିଲେ।
