ଅନୁଗୋଳ ଅଫିସ, ୧୨।୨ – ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ଦ୍ୱାରା ପରିଚାଳିତ ମାଟ୍ରିକ ପରୀକ୍ଷା ଆସନ୍ତା ୧୯ ତାରିଖରୁ ଆରମ୍ଭ ହୋଇ ମାର୍ଚ୍ଚ ୨ ତାରିଖରେ ଶେଷ ହେବ। ଚଳିତ ବର୍ଷ ଅନୁଗୋଳ ଜିଲାରେ ମୋଟ୍ ୧୭ ହଜାର ୪୯୨ ଜଣ ପରୀକ୍ଷାର୍ଥୀ ୮୫ଟି କେନ୍ଦ୍ରରେ ପରୀକ୍ଷା ଦେବେ। ତେବେ ୩୧ଟି ସମ୍ବେଦନଶୀଳ କେନ୍ଦ୍ରରେ ବୋର୍ଡ ନିର୍ଦ୍ଦେଶ ଅନୁସାରେ ୩୫୦ଟି ସିସିଟିଭି ଖଞ୍ଜାଯାଇଥିବା ବେଳେ ଅସାଧୁ ଉପାୟ ଅବଲମ୍ବନ କରୁଥିବା ଛାତ୍ରୀଛାତ୍ରଙ୍କୁ ଧରିବା ପାଇଁ ବୋର୍ଡ ପକ୍ଷରୁ ସେଣ୍ଟ୍ରାଲ ସ୍କ୍ବାଡ୍ ସହ ଫ୍ଲାଇଙ୍ଗ ସ୍କ୍ବାଡ୍ ଗଠନ କରାଯାଇଛି। କିନ୍ତୁ ଜିଲା ଶିକ୍ଷା ବିଭାଗ ଅଦ୍ୟାବଧି ନିଜସ୍ବ ସ୍କ୍ବାଡ୍ ଗଠନ କରି ନ ଥିବା ବେଳେ ସେଣ୍ଟର ସୁପରିଣ୍ଟେଣ୍ଡେଣ୍ଟମାନଙ୍କୁ ମଧ୍ୟ ତାଲିମ ପ୍ରଦାନ କରି ନ ଥିବା ସୂଚନା ମିଳିଛି।
ଜିଲାରେ ଏହି ପରୀକ୍ଷାକୁ ସୁପରିଚାଳନା ସହ କିପରି ପରୀକ୍ଷା ସମୟରେ ସୁପରିଣ୍ଟେଣ୍ଡେଣ୍ଟମାନେ ନିଜର ଭୂମିକା ନିର୍ବାହ କରିବେ ସେ ନେଇ ପ୍ରଶିକ୍ଷଣ ପ୍ରଦାନ କରାଯିବା କଥା। ହେଲେ ଅଦ୍ୟାବଧି ତାହା ଅନୁଗୋଳ ଜିଲାରେ ହୋଇ ନ ଥିବା ସୂଚନା ମିଳିଛି। ଏପରି କି ଜିଲା ଶିକ୍ଷା ଅଧିକାରୀଙ୍କ ପକ୍ଷରୁ ଗଠନ ହେବାକୁ ଥିବା ସ୍କ୍ବାଡ୍ ମଧ୍ୟ ଅଦ୍ୟାବଧି ଗଢ଼ାଯାଇନାହିଁ। ଅନ୍ୟପକ୍ଷରେ ଜିଲାରେ କରାଯାଇଥିବା ୮ଟି ନୋଡାଲ ସେଣ୍ଟରରୁ ପ୍ରଶ୍ନପତ୍ର ସହ ଉତ୍ତରଖାତା ନିଆଯାଇ ପରୀକ୍ଷା ଦିନ ସକାଳ ୬ଟାରେ ପରୀକ୍ଷା କେନ୍ଦ୍ରରେ ପହଞ୍ଚାଯିବ। ଏ ନେଇ ପ୍ରତି ନୋଡାଲ ସେଣ୍ଟରରେ ଜଣେ ଲେଖାଏ ମାଜିଷ୍ଟ୍ରେଟ ଓ ପୋଲିସ ଦେବାକୁ ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ପକ୍ଷରୁ ଜିଲାପାଳଙ୍କୁ ଅନୁରୋଧ କରାଯାଇଛି। ଏହି ଅଧିକାରୀମାନେ ପ୍ରଶ୍ନପତ୍ର ସହ ଉତ୍ତରଖାତାର ସିଲ୍ ଯାଞ୍ଚ କରିବାକୁ ଅନୁରୋଧ କରାଯାଇଛି। ସେହିପରି ଅନୁଗୋଳ ଜିଲା ପାଇଁ ବୋର୍ଡ ପକ୍ଷରୁ ଜଣେ ଅଧ୍ୟାପକଙ୍କୁ ସେଣ୍ଟ୍ରାଲ ସ୍କ୍ବାଡ୍ ଦାୟିତ୍ୱ ପ୍ରଦାନ କରାଯାଇଥିବା ଜଣାପଡ଼ିଛି। ସେହିପରି ଫ୍ଲାଇଙ୍ଗ ସ୍କ୍ବାଡ୍ ଦାୟିତ୍ୱ ସାଉଥ ବଲଣ୍ଡା ମହାବିଦ୍ୟାଳର ଅଧ୍ୟାପକ ଅମରେନ୍ଦ୍ର ମିଶ୍ର ଓ କିଶୋରନଗର ମହାବିଦ୍ୟାଳୟର ଅଧ୍ୟାପକ ଦଧିବାବନ ପ୍ରଧାନଙ୍କୁ ବୋର୍ଡ ପକ୍ଷରୁ ପ୍ରଦାନ କରାଯାଇଛି। ତେବେ ଚଳିତ ସପ୍ତାହ ଶେଷ ଆଡ଼କୁ ଜିଲା ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ ପକ୍ଷରୁ ସ୍କ୍ବାଡ୍ ଗଠନ କରାଯିବ। ସେହିପରି ବୋର୍ଡ ପକ୍ଷରୁ ୩୧ଟି କେନ୍ଦ୍ରକୁ ସମ୍ବେଦନଶୀଳ କେନ୍ଦ୍ର ଭାବେ ଘୋଷଣା କରାଯାଇ ସେଠାରେ ୩୫୦ଟି ସିସିଟିଭି ଲଗାଯିବା ପ୍ରକ୍ରିୟା ଜାରିରହିଛି। ପରୀକ୍ଷା କେନ୍ଦ୍ର ସହ ସୁପରିଣ୍ଟେଣ୍ଡେଣ୍ଟଙ୍କ କାର୍ଯ୍ୟାଳୟରେ ମଧ୍ୟ ସିସିଟିଭି ଲଗାଯିବାର ବ୍ୟବସ୍ଥା ରହିଛି। ଏ ନେଇ ଜିଲା ଶିକ୍ଷା ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି, ଜିଲା ଶିକ୍ଷା ଅଧିକାରୀ ସଚ୍ଚିଦାନନ୍ଦ ବେହେରାଙ୍କ ବଦଳି ହୋଇଛି। ସେ ରିଲିଭ୍ ମଧ୍ୟ ହୋଇସାରିଛନ୍ତି।
