ମାଲକାନଗିରି,୩୧।୫(ଡି.ଏନ୍.ଏ.): ଏକତରଫା ପ୍ରେମରୁ ଜଣେ କେଉଁଭଳି ଅଦ୍ଭୁତ କାଣ୍ଡ ଘଟାଇପାରେ, ତାହାର ଏକ ନମୁନା ହେଉଛନ୍ତି କୁମାର ପାଙ୍ଗୀ ନାମକ ଜଣେ ଯୁବକ। ଏକତରଫା ପ୍ରେମରୁ ଜଣେ ଯୁବତୀ ଓ ତାଙ୍କ ବାପାଙ୍କୁ ମାଓବାଦୀଙ୍କ ନାଁରେ ଚିଠି ଲେଖି ହତ୍ୟା ଧମକ ଦେଉଛନ୍ତି କୁମାର। ମାଥିଲି ବ୍ଲକ କେମା ଗ୍ରାମରେ କୁମାରଙ୍କ ଘର। ଏହି ଘଟଣାରେ ପୋଲିସ ତାଙ୍କୁ ଗିରଫ କରି ଶୁକ୍ରବାର କୋର୍ଟ ଚାଲାଣ କରିଛି।
ସୂଚନା ଅନୁଯାୟୀ ଗତ ଏପ୍ରିଲ ୭ରେ ମାଲକାନଗିରି ଜିଲା କୁଡୁମୁଲୁଗୁମ୍ମା ବ୍ଲକ ଅଧୀନ ଧଉଡ଼ାଗୁଡ଼ା ଗ୍ରାମର ଜଣେ ବ୍ୟକ୍ତି ଓ ତାଙ୍କ ଝିଅଙ୍କୁ ‘ଲାଲ ସଲାମ’ ଉଲ୍ଲେଖ ଥିବା ଏକ ହାତ ଲେଖା ଚିଠିରେ ହତ୍ୟା ଧମକ ମିଳିଥିଲା। ଏ ନେଇ ସେମାନେ ପୋଲିସରେ ଅଭିଯୋଗ କରିଥିଲେ। ଓର୍କେଲ ଥାନା ଅଧୀନ କୁଡୁମୁଲୁଗୁମ୍ମା ପୋଲିସ ଘଟଣା ସମ୍ପର୍କରେ ତଦନ୍ତ ଜାରି ରଖିଥିଲା। ଘଟଣା ପଛରେ କୁମାରଙ୍କ ହାତ ଥିବା ପୋଲିସ ତଦନ୍ତବେଳେ ଜାଣିପାରିଥିଲା। ପରେ ଏସ୍ଆଇ କୃତ୍ତିବାସ ବେହେରା, ଦୁଇଜଣ ପୋଲିସ କନଷ୍ଟେବଳ, ୩ଜଣ ହୋମଗାର୍ଡଙ୍କ ସହ ଏକ ଟିମ୍ ଗଠନ କରି ଗୁରୁବାର ବିଳମ୍ବିତ ରାତିରେ ଅଭିଯୁକ୍ତଙ୍କୁ ଗିରଫ କରିଥିଲେ। ଶୁକ୍ରବାର କୁମାରଙ୍କୁ କୋର୍ଟ ଚାଲାଣ କରାଯାଇଛି। ପ୍ରକାଶ ଯେ, ୪ମାସ ତଳେ ଯୁବତୀ ଜଣକ ବାଙ୍ଗାଲୋରର ଏକ ସିଲେଇ କେନ୍ଦ୍ରରେ ତାଲିମ ନେଉଥିଲେ। ସେହି ସମୟରେ ତାଙ୍କୁ ଏକତରଫା ଭଲପାଉଥିବା କୁମାର ସେଠାରୁ ଅପହରଣ କରି ନେଇଥିଲେ। ଯୁବତୀ ଜଣକ କୌଣସି ମତେ ପରିବାରକୁ ଯୋଗାଯୋଗ କରିବା ପରେ ତାଙ୍କ ବାପା ପୋଲିସର ସାହାଯ୍ୟ ନେଇ ଝିଅକୁ ବାଙ୍ଗାଲୋରରୁ ଉଦ୍ଧାର କରିପାରିଥିଲେ। କୁମାର ଏକତରଫା ଭଲପାଇ ଏଭଳି କାଣ୍ଡ ବାରମ୍ବାର ଘଟାଉଥିବା ବାପା ଓ ଝିଅ ଅଭିଯୋଗ କରିଛନ୍ତି।
