ଭବାନୀପାଟଣା,୨୧।୨(ଡି.ଏନ୍.ଏ.): କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ବଡ଼ଚେରଗାଁ ଅଞ୍ଚଳର ଲୋକେ ଆଜି ବି ଦୈନନ୍ଦିନ କାର୍ଯ୍ୟ ପାଇଁ ଦେଶୀଡଙ୍ଗା ଉପରେ ଭରସା କରୁଛନ୍ତି। ଏହି ଅଞ୍ଚଳର ବଡ଼ଚେରଗାଁ, ଉଛୁଲା, ଚହକା, ନୂଆଗାଁ, ପଞ୍ଚାୟତର ହଜାର ହଜାର ଜନସାଧାରଣ ସ୍ବାସ୍ଥ୍ୟ ହେଉ ଅବା ନିତିଦିନିଆ କାମ ପାଇଁ ଜିଲା ସଦର ମହକୁମା ଭବାନୀପାଟଣା ଉପରେ ନିର୍ଭର କରନ୍ତି। କିନ୍ତୁ ଗରଗାବ ନିକଟରେ ଥିବା ଚିରସ୍ରୋତା ତେଲ ନଦୀ ମୁଖ୍ୟ ବାଧକ ସାଜୁଛି। ଉକ୍ତ ନଦୀରେ ପଡ଼ିଥିବା ଡଙ୍ଗାଟି ବହୁ ପରୁଣା ହୋଇଥିଲେ ମଧ୍ୟ ଅନ୍ୟ ଉପାୟ ନାହିଁ। ଅନ୍ୟ ରାସ୍ତା ଦେଇ ଗଲେ ଲୋକଙ୍କୁ ୫୦ କିମି ରାସ୍ତା ଅଧିକ ବୁଲି ଯିବାକୁ ପଡ଼ିଥାଏ। ତେଣୁ ଲୋକେ ଏହି ଡଙ୍ଗା ଉପରେ ହିଁ ନିର୍ଭର କରିଥାନ୍ତି। ବର୍ଷାଦିନେ ଉକ୍ତ ଡଙ୍ଗାରେ ନଦୀ ପାରି ହେବା ବହୁ କଷ୍ଟ। ତିନିବର୍ଷ ତଳୁ ବିଜୁ ସେତୁ ଯୋଜନାରେ ଗରଗାବ ନିକଟରେ ଏକ ପୋଲ ନିର୍ମାଣ କାମ ଆରମ୍ଭ ହୋଇଥିଲା। ହେଲେ କାମ ଅତି ମନ୍ଥର ଗତିରେ ଚାଲିଥିବାରୁ ତାହା କେବେ ସରିବ ବୋଲି ଲୋକେ ଆଶଙ୍କାରେ ରହିଛନ୍ତି।
