ନୟାଗଡ଼ ଅଫିସ,୧।୧୨- ୭୮୬ ୟୁଥ୍ କ୍ଲବ ଓ ଜିଲା ଆଥ୍ଲେଟିକ ଆସୋସିଏଶନର ମିଳିତ ଆନୁକୂଲ୍ୟରେ ଆସନ୍ତା ୨ ତାରିଖରେ ନୟାଗଡ଼ ଖେଳପଡ଼ିଆଠାରେ ସର୍ବଭାରତୀୟ ନୟାଗଡ଼ ଫୁଟବଲ୍ ଟୁର୍ନାମେଣ୍ଟ ଅନୁଷ୍ଠିତ ହେବ। ଏହାର ଅବ୍ୟବହିତ ପୂର୍ବରୁ ଶନିବାର ନୟାଗଡ଼ ଜିଲାର ୪ଟି ନିର୍ବାଚନମଣ୍ଡଳୀର ବିଧାୟକଙ୍କ ଦଳକୁ ନେଇ ଏକ ଭେଟେରାନ୍ ଫୁଟବଲ୍ ଟୁର୍ନାମେଣ୍ଟ ଅନୁଷ୍ଠିତ ହୋଇଯାଇଛି। ଏଥିରେ ରଣପୁର ବିଧାୟକ ଏକାଦଶ ଦଳ ଚାମ୍ପିୟନ ହୋଇଛି। ନୟାଗଡ଼ ବିଧାୟକ ତଥା ମନ୍ତ୍ରୀ ଡ. ଅରୁଣ କୁମାର ସାହୁ, ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ, ରଣପୁର ବିଧାୟକ ତଥା ଜିଲା ଯୋଜନା ବୋର୍ଡ଼ ଅଧ୍ୟକ୍ଷ ସତ୍ୟ ନାରାୟଣ ପ୍ରଧାନ, ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରା ସେମାନଙ୍କ ୧୧ ଜଣିଆ ଟିମ୍କୁ ନେଇ ପଡ଼ିଆକୁ ଓହ୍ଲାଇଥିଲେ। ପ୍ରଥମେ ଦଶପଲ୍ଲା ବିଧାୟକ ଟିମ୍ ସହିତ ନୟାଗଡ଼ ବିଧାୟକ ଟିମ୍ଙ୍କ ମଧ୍ୟରେ ଖେଳ ଅନୁଷ୍ଠିତ ହୋଇଥିଲା। ଏଥିରେ ୩-୧ ଗୋଲ୍ରେ ନୟାଗଡ଼ ଟିମ୍ ବିଜୟୀ ହୋଇଥିଲା। ଏହା ପରେ ରଣପୁର ବିଧାୟକ ଟିମ୍ ସହିତ ଖଣ୍ଡପଡ଼ା ବିଧାୟକ ଟିମ୍ ମଧ୍ୟରେ ଖେଳ ଅନୁଷ୍ଠିତ ହୋଇଥିଲା। ନିର୍ଦ୍ଧାରିତ ସମୟରେ କୌଣସି ଦଳ କାହାରିକୁ ଗୋଲ୍ ଦେଇପାରି ନ ଥିଲା। ପରେ ଟାଇବ୍ରେକର ସହାୟତାରେ ୪-୨ ଗୋଲ୍ରେ ରଣପୁର ଟିମ୍ ବିଜୟୀ ହୋଇଥିଲା। ଏହା ପରେ ନୟାଗଡ଼ ଓ ରଣପୁର ମଧ୍ୟରେ ଫାଇନାଲ୍ ମ୍ୟାଚ୍ ଅନୁଷ୍ଠିତ ହୋଇଥିଲା। ନିର୍ଦ୍ଧାରିତ ସମୟରେ କୌଣସି ଦଳ କାହାରିକୁ ଗୋଲ୍ ସ୍କୋର ଦେଇ ପାରି ନ ଥିଲା। ଫଳରେ ଖେଳ ଅମୀମାଂସିତ ହୋଇଥିଲା। ପରେ ନୟାଗଡ଼ ବିଧାୟକ ତଥା ମନ୍ତ୍ରୀ ସାହୁ ରଣପୁର ଟିମ୍କୁ ବିଜୟୀ ଘୋଷଣା କରିବା ସହ ଚାମ୍ପିୟନ ଟ୍ରଫି ପ୍ରଦାନ କରିଥିଲେ। ନୟାଗଡ଼ ଟିମ୍ର ପ୍ରଶାନ୍ତ ବରାଡ଼ ବେଷ୍ଟ ସ୍କୋରର୍ ଏବଂ ରଣପୁର ଗୋଲ୍କିପରଙ୍କୁ ବେଷ୍ଟ ଗୋଲ୍କିପର ଭାବେ ପୁରସ୍କୃତ କରାଯାଇଥିଲା। ରାମକୃଷ୍ଣ ରଥ ଓ ଆଶୁତୋଷ ମିଶ୍ର ମ୍ୟାଚର ଧାରା ବିବରଣୀ ପ୍ରଦାନ କରିଥିଲେ।
