ନୂଆଦିଲ୍ଲୀ,୨୨ା୭: ରାଜନୈତିକ ଦଳଗୁଡ଼ିକୁ ଚାନ୍ଦା ଦେବା ଲାଗି ୨୦୧୮ ମେ’ରୁ ୨୦୧୯ ମେ’ ମଧ୍ୟରେ ମୋଟ ୫୮୫୧.୪୧ କୋଟି ଟଙ୍କାର ନିର୍ବାଚନୀ ବଣ୍ଡ୍ ବିକ୍ରି କରାଯାଇଛି ବୋଲି ଆର୍ଟିଆଇ ସୂଚନାରୁ ଜଣାପଡିଛି। ତନ୍ମଧ୍ୟରେ ଓଡ଼ିଶାର ରାଜଧାନୀ ଭୁବନେଶ୍ୱରରେ ୩୧୫.୭୬ କୋଟି ଟଙ୍କାର ବଣ୍ଡ୍ ବିକ୍ରି ହୋଇଛି ଓ ଏହାକୁ ବିକ୍ରି କରି ୨୨୬.୫୦ କୋଟି ଟଙ୍କା ନଗଦରେ ପରିଣତ କରାଯାଇଛି। ତେବେ କିଣାଯାଇଥିବା ବଣ୍ଡ୍ ମଧ୍ୟରୁ ୮୦.୬%କୁ କେବଳ ଦିଲ୍ଲୀରେ ବିକ୍ରି କରାଯାଇଛି। କାରଣ ଦେଶର ସମସ୍ତ ରାଜନୈତିକ ଦଳର ମୁଖ୍ୟାଳୟ ନୂଆଦିଲ୍ଲୀରେ ରହିଛି। ମଧ୍ୟପ୍ରଦେଶ ନିବାସୀ ଆର୍ଟିଆଇ କର୍ମୀ ଚନ୍ଦ୍ରଶେଖର ଗୌଡ଼ ଦୁଇଟି ସ୍ବତନ୍ତ୍ର ଆବେଦନ ଜରିଆରେ ଏ ସମ୍ପର୍କରେ ତଥ୍ୟ ସଂଗ୍ରହ କରିଛନ୍ତି। ପ୍ରାପ୍ତ ତଥ୍ୟ ଅନୁଯାୟୀ, ଦିଲ୍ଲୀରେ ୮୭୪.୫୦ କୋଟି ଟଙ୍କା, ମୁମ୍ବାଇରେ ୧୭୮୨.୩୬ କୋଟି ଟଙ୍କା, କୋଲକାତାରେ ୧୩୮୯ କୋଟି ଟଙ୍କା, ବେଙ୍ଗାଲୁରୁରେ ୧୯୫ କୋଟି ଟଙ୍କା, ହାଇଦ୍ରାବାଦ୍ରେ ୮୦୬.୧୨ କୋଟି ଟଙ୍କା, ଚେନ୍ନାଇରେ ୧୮୪.୨୦ କୋଟି ଟଙ୍କାର ବଣ୍ଡ କିଣାଯାଇଛି। ଆଲୋଚ୍ୟ ଅବଧିରେ ମୋଟ ୧୦ ପର୍ଯ୍ୟାୟରେ ୫୮୩୧.୧୬ କୋଟି ଟଙ୍କାର ବଣ୍ଡ ଉଠାଯାଇଛି। ଅର୍ଥାତ୍ ୨୦.୨୫ କୋଟି ଟଙ୍କାର ବଣ୍ଡ୍କୁ ନିର୍ଦ୍ଧାରିତ ସମୟ ମଧ୍ୟରେ ଉଠାଯାଇପାରିନାହିଁ। ନିୟମ ଅନୁସାରେ ଏହାର ବୈଧତା ଶେଷ ହୋଇଛି। ଆଲୋଚ୍ୟ ଅବଧିରେ ଗାନ୍ଧୀନଗର, ଗୁଆହାଟୀ, ଜୟପୁର, ରାୟପୁର, ପଣଜୀ, ଥିରୁଭାନନ୍ତପୁରମ୍ ଏବଂ ବିଶାଖାପାଟନମ୍ରେ ମୋଟ ୨୭୯.୭୦ କୋଟି ଟଙ୍କାର ବଣ୍ଡ୍ ବିକ୍ରି କରାଯାଇଥିଲେ ହେଁ ଏହାକୁ ନଗଦ କରାଯାଇ ଟଙ୍କାଟିଏ ନିଆଯାଇନି। ଆଲୋଚ୍ୟ ସମୟ ମଧ୍ୟରେ ୧୩ ସହରରେ ଗୋଟିଏ ହେଲେ ବଣ୍ଡ୍ ବିକ୍ରି ହୋଇନାହିଁ।
