ବ୍ରହ୍ମପୁର ଅଫିସ୍,୨୧ା୧୧- ଅବକାରୀ ବିଭାଗ ବୁଧବାର ପୃଥକ୍ ଭାବେ ଦୁଇଟି ସ୍ଥାନରେ ଚଢାଉ କରି ୨୨.୨୨୦ କେଜି ଗଞ୍ଜେଇ ଜବତ କରିଛି। ୨ ଜଣ ଗଞ୍ଜେଇ ଚାଲାଣକାରୀଙ୍କୁ ଗିରଫ କରିଛି। ସେମାନେ ହେଲେ ଜଟଣୀର ପବିତ୍ର ବେହେରା (୧୯) ଓ ପୁରୀ ଜିଲା ଡେଲାଙ୍ଗ ଥାନା ହରିରାଜପୁର ଗ୍ରାମର ବୀରେନ୍ଦ୍ର ମଙ୍ଗରାଜ (୧୯)। ଉଭୟେ ଯୁକ୍ତ ୩ ଛାତ୍ର ଅଟନ୍ତି ବୋଲି ସଦର ଇନ୍ସପେକ୍ଟର ବାଳକୃଷ୍ଣ ପରିଡା ସୂଚନା ଦେଇଛନ୍ତି। ବୁଧବାର ସକାଳେ ପ୍ରଥମେ ଫାଷ୍ଟଗେଟ ନିକଟରୁ ପବିତ୍ରଙ୍କୁ ଅବକାରୀ ପୋଲିସର ଏକ ଟିମ୍ ଧରିଥିଲା। ସେ ଧରିଥିବା ବ୍ୟାଗ ଯାଞ୍ଚ ବେଳେ ସେଥିରେ ୬.୬୭୦ ଗ୍ରାମ ଗଞ୍ଜେଇ ଥିବା ଦେଖିବାକୁ ପାଇଥିଲେ। ଜେରା ବେଳେ ତାଙ୍କ ବୟାନକୁ ଆଧାର କରି ତାଙ୍କର ଅନ୍ୟ ଜଣେ ସାଙ୍ଗ ବୀରେନ୍ଦ୍ରଙ୍କୁ ଅବକାରୀ ଇନ୍ସପେକ୍ଟର ପରିଡା ଓ ତାଙ୍କ ଟିମ ଖେମୁଣ୍ଡି କଲେଜ ନିକଟରୁ କାବୁ କରିଥିଲା। ବୀରେନ୍ଦ୍ରଙ୍କ ଗାଡି (ନଂ ଓଡ଼ି୩୩ୱାଇ୫୦୫୩)ରୁ ୧୫.୫୫୦ ଗ୍ରାମ ଗଞ୍ଜେଇ ଜବତ କରିଥିଲା। ସେମାନଙ୍କୁ ଜେରା ବେଳେ ଉକ୍ତ ଗଞ୍ଜେଇ ସେମାନେ ଭୀଷ୍ମଗିରି ଅଞ୍ଚଳରୁ ଆଣି ଭୁବନେଶ୍ୱର ଚାଲାଣ କରିଥାନ୍ତେ ବୋଲି ଅବକାରୀ ପୋଲିସ ସୂଚନା ଦେଇଛି। ଉଭୟ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ବୋଲି ଇନ୍ସପେକ୍ଟର ପରିଡା କହିଛନ୍ତି।
