ବରଗଡ଼ ଅଫିସ୍,୨୨।୪: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୁଧବାର ସରପଞ୍ଚମାନଙ୍କ ସହିତ ଭିଡ଼ିଓ କନଫେରେନ୍ସିଂ ଜରିଆରେ କଥାବାର୍ତ୍ତା କରି ବିଭିନ୍ନ ପରାମର୍ଶ ଦେଇଛନ୍ତି। ଲକ୍ ଡାଉନ କଟକଣା ଯୋଗୁ ରାଜ୍ୟ ବାହାରେ ରହିଥିବା ଲୋକଙ୍କୁ ନିଜ ଅଞ୍ଚଳକୁ ଫେରାଇ ଆଣିବା ପାଇଁ ପଞ୍ଚାୟତସ୍ତରରେ ସେମାନଙ୍କ ନାମ ପଞ୍ଜିକରଣ, ବସଷ୍ଟାଣ୍ଡ୍ କିମ୍ବା ରେଳ ଷ୍ଟେଶନରୁ ସେମାନଙ୍କୁ ସ୍ବତନ୍ତ୍ର ବସ୍ ଯୋଗେ ନିଜ ଗ୍ରାମକୁ ପହଞ୍ଚାଇ ୧୪ଦିନ କ୍ବାରେଣ୍ଟାଇନରେ ରଖିବା, ସେମାନଙ୍କ ସ୍ବାସ୍ଥ୍ୟ ପରୀକ୍ଷଣ ସହିତ ଖାଦ୍ୟ, ପାନୀୟ ବ୍ୟବସ୍ଥା କରିବା ଉପରେ ମୁଖ୍ୟମନ୍ତ୍ରୀ ଗୁରୁତ୍ୱାରୋପ କରିଥିଲେ । ସେହିପରି ୧୪ଦିନ କ୍ବାରେଣ୍ଟାଇନରେ ରହିବା ପରେ ସେମାନଙ୍କୁ ୨ହଜାର ଟଙ୍କା ଲେଖାଏଁ ପ୍ରୋତ୍ସାହନ ରାଶି ପ୍ରଦାନ କରିବାକୁ ସେ ପରାମର୍ଶ ଦେଇଥିଲେ । ଏହି ଭିଡ଼ିଓ କନଫେରେନ୍ସିଂ ସମୟରେ ମୁଖ୍ୟମନ୍ତ୍ରୀ ସମସ୍ତ ସରପଞ୍ଚଙ୍କୁ କୋଭିଡ୍-୧୯ର ମୁକାବିଲା ପାଇଁ ସେମାନଙ୍କ ଗୁରୁ ଦାୟିତ୍ୱ ନିର୍ବାହ କରିବାର ଶପଥ ପାଠ କରାଇଥିଲେ । ବରଗଡ଼ ବ୍ଲକ ବରଡ଼ୋଲ ପଞ୍ଚାୟତର ସରପଞ୍ଚ ଶରତ ଅଦାବରଙ୍କ ସହିତ ସିଧାସଳଖ କଥାବାର୍ତ୍ତା ମାଧ୍ୟମରେ କରୋନା ମୁକାବିଲା କ୍ଷେତ୍ରରେ ସେ କିଭଳି ସେ ତାଙ୍କ ପଞ୍ଚାୟତସ୍ତରରେ ପ୍ରସ୍ତୁତ ଅଛନ୍ତି, ତାହା ମୁଖ୍ୟମନ୍ତ୍ରୀ ପଚାରି ବୁଝିଥିଲେ । ସମସ୍ତେ ଯେଭଳି ସାମାଜିକ ଦୂରତା ରଖିବେ ଏବଂ ମାସ୍କ ବ୍ୟବହାର ସହିତ ହାତ ସଫା କରି ପରିଷ୍କାର ପରିଚ୍ଛନ୍ନତା ବଜାୟ ରଖିବେ, ସେଥିପ୍ରତି ସେ ଧ୍ୟାନ ଦେବେ ବୋଲି ଅଦାବର କହିଥିଲେ । ଏହା ସହିତ ରାଜ୍ୟ ବାହାରୁ ଫେରୁଥିବା ଶ୍ରମିକମାନଙ୍କୁ ୧୪ଦିନ କ୍ବାରେଣ୍ଟାଇନରେ ରଖିବାକୁ ପଦକ୍ଷେପ ନେବେ ବୋଲି କହିଥିଲେ । ଏହି ସମୟରେ ଜିଲାପାଳ ଜ୍ୟୋତିରଞ୍ଜନ ପ୍ରଧାନ, ପ୍ରକଳ୍ପ ନିର୍ଦ୍ଦେଶକ କୃତିବାସ ରାଉତ, ବିଡ଼ିଓ ଯୁଧିଷ୍ଠିର ମେହେର ଏବଂ ୨୭ଜଣ ସରପଞ୍ଚ ଉପସ୍ଥିତ ଥିଲେ ।
