ନୂଆଦିଲ୍ଲୀ,୨୬।୩: କରୋନା ସଂକ୍ରମଣ ଯୋଗୁ ସାରା ଭାରତରେ ଲକ୍ ଡାଉନ୍ ଘୋଷଣା କରାଯାଇଛି। ସାମାଜିକ ଦୂରତା ପାଇଁ ଏଭଳି କରାଯାଇଛି। ଏହାଦ୍ୱାରା ସଂକ୍ରମଣର ଆଶଙ୍କା କମ୍ ରହିଥାଏ ବୋଲି ଭାରତୀୟ ମେଡିକାଲ ରିସର୍ଚ୍ଚ ପରିଷଦ(ଆଇସିଏମ୍ଆର୍) ପକ୍ଷରୁ ପ୍ରକାଶିତ ଏକ ରିପୋର୍ଟରେ ଦର୍ଶାଯାଇଛି। ଭାରତରେ ଜଣେ କରୋନା ସଂକ୍ରମିତଙ୍କ ଦ୍ୱାରା ୪ ସୁସ୍ଥ ଲୋକଙ୍କୁ ସଂକ୍ରମଣ ହେବାର ଆଶଙ୍କା ରହିଥାଏ ବୋଲି ଏଥିରେ ପ୍ରକାଶ ପାଇଛି। ଏକ ସର୍ଭେ ଆଧାରରେ ଏହି ରିପୋର୍ଟ ପ୍ରସ୍ତୁତ କରାଯାଇଛି। ମ୍ୟାଥ୍ମେଟିକାଲ ମଡେଲିଂ ଅନ୍ତର୍ଗତ ଏହି ସର୍ଭେ ରିପୋର୍ଟ ପ୍ରସ୍ତୁତ କରାଯାଇଛି। ଭାରତରେ ଫେବୃୟାରୀ ଶେଷ ସୁଦ୍ଧା ହୋଇଥିବା କରୋନା ସଂକ୍ରମଣ ଆଧାରରେ ଏହି ରିପୋର୍ଟ ପ୍ରସ୍ତୁତ କରାଯାଇଛି। ପ୍ରାଥମିକ ଷ୍ଟେଜ୍ରେ କରୋନା ସଂକ୍ରମିତ ଜଣେ ଭାରତୀୟଙ୍କଠାରୁ ହାରାହାରି ୧.୫ ଜଣ ଲୋକଙ୍କୁ ସଂକ୍ରମଣ ହୋଇଥାଏ। ତେବେ ସଙ୍କଟଜନକ ସ୍ଥିତିରେ ଜଣେ ସଂକ୍ରମିତଙ୍କ ଦ୍ୱାରା ୪ ସୁସ୍ଥ ଲୋକଙ୍କୁ ସଂକ୍ରମଣ ହେବାର ଆଶଙ୍କା ରହିଥିବା ଏହି ରିପୋର୍ଟରେ ପ୍ରକାଶ ପାଇଛି। ସଂକ୍ରମଣ କମ୍ ହେଲେ ଭୂତାଣୁ ସଂକ୍ରମଣର ଶେଷସ୍ତରରେ ପହଞ୍ଚିଥିବା ଆକଳନ କରାଯାଇଥାଏ। ସେହିପରି ନୂଆ ସଂକ୍ରମଣ ଘଟଣା ଘଟିଲେ କରୋନା ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବା ଅପରିହାର୍ଯ୍ୟ ହୋଇପଡ଼ିଥାଏ। ତେବେ ଲୋକଙ୍କୁ କ୍ୱାରାଣ୍ଟାଇନ୍ରେ ରଖାଗଲେ ସଂକ୍ରମଣ ୬୨ରୁ ୮୯ ପ୍ରତିଶତ ପର୍ଯ୍ୟନ୍ତ କମି ଯାଇଥାଏ ବୋଲି ଏହି ରିପୋର୍ଟରେ ଦର୍ଶାଯାଇଛି।
