ନୂଆଦିଲ୍ଲୀ,୮ା୨: ମୋଦି ସରକାର ୨୦୧୪ରେ କ୍ଷମତାକୁ ଆସିବା ପରଠାରୁ ଶିଳ୍ପପତି ଗୌତମ ଆଦାନୀଙ୍କ କମ୍ପାନୀ ଭାଜପାକୁ କେତେ ଟଙ୍କା ଦେଇଛି ବୋଲି ଲୋକ ସଭାରେ କଂଗ୍ରେସ ସଦସ୍ୟ ରାହୁଲ ଗାନ୍ଧୀ ପ୍ରଶ୍ନ କରିଛନ୍ତି। ଆଦାନୀ ଗ୍ରୁପ୍ ବିରୋଧରେ ନ୍ୟୁୟର୍କର ଶର୍ଟ ସେଲର ହିଣ୍ଡେନ୍ବର୍ଗ ରିସର୍ଚ୍ଚ ପକ୍ଷରୁ ଷ୍ଟକ୍ସ ହେରଫେର୍ ନେଇ ଚାଞ୍ଚଲ୍ୟକର ତଥ୍ୟ ପ୍ରଘଟ ପରେ ଜାତୀୟ ରାଜନୀତି ସରଗରମ ହୋଇଥିବାବେଳେ ପାର୍ଲାମେଣ୍ଟରେ ରାହୁଲଙ୍କ ପ୍ରଶ୍ନବାଣ ଭାଜପାକୁ ଅଡ଼ୁଆରେ ପକାଇଦେଇଛି।
ମଙ୍ଗଳବାର ଥିଲା ପାର୍ଲାମେଣ୍ଟ ବଜେଟ ଅଧିବେଶନର ଷଷ୍ଠ ଦିନ। ରାଷ୍ଟ୍ରପତିଙ୍କ ଅଭିଭାଷଣ ଉପରେ ଧନ୍ୟବାଦ ପ୍ରସ୍ତାବ ନେଇ ଆଲୋଚନା ଚାଲିଥିଲା। ଅନ୍ୟ ୫ ଦିନ ପରି ବିରୋଧୀ ସଦସ୍ୟମାନେ ଆଦାନୀ ଗ୍ରୁପ୍ ଓ କେନ୍ଦ୍ର ସରକାରଙ୍କ ବିପକ୍ଷରେ ସ୍ଲୋଗାନ ଦେଇ ବିକ୍ଷୋଭ କରୁଥିଲେ। ଆମେରିକୀୟ ଆକ୍ଟିଭିଷ୍ଟ ଇନ୍ଭେଷ୍ଟର ହିଣ୍ଡେନ୍ବର୍ଗ ରିପୋର୍ଟ ଉପରେ ଆଦାନୀ ଗ୍ରୁପ୍ ବିରୋଧରେ ଯୁଗ୍ମ ସଂସଦୀୟ
କମିଟି (ଜେପିସି) କିମ୍ବା ସୁପ୍ରିମକୋର୍ଟଙ୍କ ତତ୍ତ୍ୱାବଧାନରେ ତଦନ୍ତ ଦାବି କରୁଥିଲେ। ଓ୍ବାୟନାଡ୍ ଏମ୍ପି ରାହୁଲ ଗାନ୍ଧୀଙ୍କ କହିବା ପାଳି ଆସିଲା। ବିତର୍କରେ ଭାଗନେଇ ରାହୁଲ କହିଲେ, ୨୦୧୪ରେ ବିଶ୍ୱର ଧନୀ ବ୍ୟକ୍ତିଙ୍କ ତାଲିକାର ୬୦୯ ନମ୍ବରରେ ଆଦାନୀ ଥିଲେ। ଏବେ ସେ ମ୍ୟାଜିକ୍ ବଳରେ ଦ୍ୱିତୀୟ ଧନୀ। ଆଦାନୀ ଭାଇବ୍ରେଣ୍ଟ ଗୁଜରାଟର ମେରୁଦଣ୍ଡ ଥିଲେ। ବିମାନବନ୍ଦର ପରିଚଳାନା ଅଭିଜ୍ଞତା ଥିବା ଗୋଟିଏ କମ୍ପାନୀ/ବ୍ୟକ୍ତିଙ୍କୁ କେବଳ ଗୋଟିଏ ଏୟାରପୋର୍ଟ ବିକଶିତ କରିବାକୁ ଦିଆଯିବା ନେଇ ପୂର୍ବରୁ ନିୟମ ଥିଲା। କିନ୍ତୁ ମୋଦି ସରକାର ଆଦାନୀଙ୍କୁ ୬ ଏୟାରପୋର୍ଟ ଅଧିଗ୍ରହଣ ପାଇଁ ନିୟମ ବଦଳାଇଦେଇଛନ୍ତି। ରାହୁଲଙ୍କ ଏହି ଅଭିଯୋଗକୁ ଶାସକ ଦଳର ଏମ୍ପିମାନେ ବିରୋଧ କରିବା ସହ ପ୍ରମାଣ ମାଗିଥିଲେ।
ରାହୁଲ ଏହାର ପ୍ରମାଣ ସ୍ବରୂପ ଏକ ବିମାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଗୌତମ ଆଦାନୀ ଏକାଠି ଥିବା ଫଟୋ ଦେଖାଇଥିଲେ। ଏହି ଦୁଇଜଣ କେତେ ଥର ଏକାଠି ବିମାନ ଯାତ୍ରା କରିଛନ୍ତି। ପ୍ରଧାନମନ୍ତ୍ରୀ ବିଦେଶରେ ଅବତରଣ କରିବା ପରେ ଆଦାନୀ କେତେଥର ସେଠାରେ ପହଞ୍ଚତ୍ଥିଲେ। ମୋଦିଙ୍କ ବିଦେଶ ଗସ୍ତ ପରେ ଆଦାନୀଙ୍କୁ କେତୋଟି କଣ୍ଟ୍ରାକ୍ଟ ପାଇଛନ୍ତି ବୋଲି ରାହୁଲ ପ୍ରଶ୍ନ କରିଥିଲେ। ପ୍ରଧାନମନ୍ତ୍ରୀ ବୁଧବାର ପାର୍ଲାମେଣ୍ଟରେ ବକ୍ତବ୍ୟ ରଖିବାବେଳେ ଏହାର ଉତ୍ତର ଦିଅନ୍ତୁ।
ଆଦାନୀଙ୍କ ସମ୍ପତ୍ତି ୨୦୧୪ରେ ୮ ବିଲିୟନ୍ ଡଲାର ଥିଲା। ୨୦୨୨ରେ ଏହା ୧୪୦ ବିଲିୟନ୍ ଡଲାରକୁ କିପରି ଛୁଇଁଛି। ଏହି ସଫଳତାର ସୂତ୍ର କ’ଣ ବୋଲି ‘ଭାରତ ଯୋଡ଼ୋ ଯାତ୍ରା’ ବେଳେ ଯୁବପିଢ଼ି ମୋତେ ପ୍ରଶ୍ନ କରିଥିଲେ। ତାମିଲନାଡୁରୁ ଜମ୍ମୁ-କଶ୍ମୀର ପର୍ଯ୍ୟନ୍ତ କେବଳ ଗୋଟିଏ ନାମ ଶୁଣିବାକୁ ପାଇଛି। ତାହା ହେଉଛି ଆଦାନୀ। ଗତ ୨୦ ବର୍ଷରେ ଆଦାନୀ ଭାଜପାକୁ କେତେ ଟଙ୍କା ଦେଇଛନ୍ତି। ରାଜନୀତି ଓ ବ୍ୟବସାୟିକ ସଂସ୍ଥାଗୁଡ଼ିକ ଓ ରାଜନୀତି ମଧ୍ୟରେ ଥିବା ସମ୍ପର୍କକୁ ନେଇ ହାଭାର୍ଡ ୟୁନିଭର୍ସିଟି ଅଧ୍ୟୟନ କରିବା ଉଚିତ। ଏହା ଏକ ବଡ଼ କେସ୍ଷ୍ଟଡି ହେବ ଏବଂ ଆମ ପ୍ରଧାନମନ୍ତ୍ରୀ ପୁରସ୍କାର ପାଇବା ଉଚିତ ବୋଲି ରାହୁଲ ଟାର୍ଗେଟ କରିଛନ୍ତି। ସେହିପରି ସେନାରେ ଠିକା ନିଯୁକ୍ତି ‘ଅଗ୍ନିପଥ’ ଯୋଜନା ସମ୍ପର୍କରେ ମଧ୍ୟ ରାହୁଲ ସମାଲୋଚନା କରିଛନ୍ତି। ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଅଜିତ ଡୋଭାଲଙ୍କ ମୁଣ୍ଡରୁ ଏହି ସ୍କିମ୍ ବାହାରିଥିବା ନେଇ ଜଣେ ସେନା ଅଧିକାରୀ ତାଙ୍କୁ ଅବଗତ କରାଇଥିବା ରାହୁଲ ପାର୍ଲାମେଣ୍ଟରେ କହିଛନ୍ତି।
