ଭବାନୀପାଟଣା,୧୮।୯(ଡି.ଏନ.ଏ.)-ଭବାନୀପାଟଣା ଲାଲବାହାଦୁର ଶାସ୍ତ୍ରୀ ଷ୍ଟାଡିୟମ୍ଠାରେ କଳାହାଣ୍ଡି କ୍ରୀଡା ସଂସ୍ଥା ଆନୁକୂଲ୍ୟରେ ଭବାନୀପାଟଣା ଦ୍ୱିତୀୟ ଟାଉନ ଫୁଟବଲ ଲିଗ୍ ମଙ୍ଗଳବାର ଏନ୍ଡିସିସି ବନାମ ଷ୍ଟାର ଇଲେଭେନ୍ ମଧ୍ୟରେ ମ୍ୟାଚ୍ ଅନୁଷ୍ଠିତ ହୋଇଥିଲା। ଷ୍ଟାର ଇଲେଭେନ୍ ୨-୦ ଗୋଲରେ ବିଜୟୀ ହୋଇଥିଲା। ଷ୍ଟାର ଇଲେଭେନ୍ ତରଫରୁ ବିମଲ ମାଝି ୧ ଗୋଲ ଓ ନାରାୟଣ ପ୍ରଧାନ ୧ ଗୋଲ ଦେଇଥିଲେ । ଏହାର ଜବାବରେ ଏନ୍ଡିସିସି ଦଳ ତରଫରୁ କୌଣସି ଗୋଲ ଦେଇ ପାରି ନ ଥିଲେ। ଫଳରେ ଷ୍ଟାର ଇଲେଭେନ୍ ବିଜୟୀ ହୋଇଥିଲା। ତୃତୀୟ ଦିବସର ମ୍ୟାଚ୍ରେ ଅତିଥି ଭାବେ ଜାତୀୟସ୍ତର ଫୁଟବଲ ପରିଚାଳକ ତଥା କଳାହାଣ୍ଡି ଜିଲା କ୍ରୀଡା ସଂସ୍ଥା ପୂର୍ବତନ ଯୁଗ୍ମ ସମ୍ପାଦକ ସୁରେନ୍ଦ୍ର ପ୍ରସାଦ ନେଗୀ ଯୋଗଦେଇଥିଲେ। ତୃତୀୟ ଦିବସରେ ଅନ୍ତର୍ଜାତୀୟ ଫୁଟବଲ ରେଫରୀ ନବୀନ ନାଏକ, ମନୋଜ କୁମାର ବିଶ୍ୱାଳ, ପି.ଭି ରାଓ ଓ ଅଶୋକ କୁମାର ବାଗ ପ୍ରମୁଖ ଖେଳ ପରିଚାଳନା କରିଥିଲେ। କ୍ରୀଡା ସଂସ୍ଥା ସମ୍ପାଦକ ତଥା ଓଡିଶା ଆଥୋଲେଟିକ୍ ଆସୋସିଏଶନ୍ ସଭାପତି ଜଗମୋହନ ପଟ୍ଟନାୟକ ଓ ଉପସଭାପତି ସୁରେନ୍ଦ୍ର ନାଥ ତ୍ରିପାଠୀ ଓ ଅନ୍ୟ କର୍ମକର୍ତ୍ତା ସହଯୋଗ କରିଥିଲେ। ବୁଧବାର ଚତୁର୍ଥ ମ୍ୟାଚ୍ ଜିଲା କ୍ରୀଡା ଛାତ୍ରାବାସ ଓ ମର୍ନିଂ କ୍ଲବ ମଧ୍ୟରେ ଅନୁଷ୍ଠିତ ହେବ।
