ଭଦ୍ରକ ଅଫିସ, ୨୬।୪ – କଂଗ୍ରେସର ଭଦ୍ରକ ବିଧାନସଭା ପ୍ରାର୍ଥୀ ନଳିନୀକାନ୍ତ ମହାନ୍ତି ଓ ଲୋକ ସଭା ପ୍ରାର୍ଥୀ ମଧୁମିତା ସେଠୀଙ୍କ ପାଇଁ ଗୁରୁବାର ନିର୍ବାଚନ ପ୍ରଚାର କରିଛନ୍ତି ବଲିଉଡ୍ ଅଭିନେତା ରାଜ୍ ବବର୍। ଏଥିପାଇଁ ଭଦ୍ରକ ସହରରେ ବିଶାଳ ରୋଡ୍ଶୋ କରାଯାଇଥିଲା। ରାଜ୍ ବବର୍ ହେଲିକପ୍ଟର ଯୋଗେ ଆସି ପୂର୍ବାହ୍ନରେ ଭଦ୍ରକ ପୁରୁଣାବଜାର ମହବୀର ପଡ଼ିଆରେ ପହଞ୍ଚିଥିଲେ। ବବର୍ଙ୍କ ସହ ଓଡ଼ିଶା ପ୍ରଦେଶ ଦାୟିତ୍ୱରେ ଥିବା ସହପ୍ରଭାରୀ ରୁଦ୍ର ରାଜୁ, ଅନିଲ ଚୌଧୁରୀ, ବିରୋଧୀ ଦଳ ନେତା ନରସିଂହ ମିଶ୍ର ପହଞ୍ଚିବା ପରେ ଲୋକ ସଭା ପ୍ରାର୍ଥୀ ମଧୁମିତା ଓ ବିଧାୟକ ପ୍ରାର୍ଥୀ ନଳିନୀକାନ୍ତଙ୍କ ସମେତ ବହୁ କଂଗ୍ରେସ ନେତା ସ୍ବାଗତ କରିଥିଲେ। ପରେ ମହାବୀର ପଡ଼ିଆଠାରୁ ଏକ ବିଶାଳ ବାଇକ୍ ରାଲି ସହ ଖୋଲାଜିପ୍ରେ ଭଦ୍ରକ ସହରର ପୁରୁଣାବଜାର, ଗରଦପୁର, ପାଟଣାସାହି, ସନ୍ଥିଆ, କଚେରି ବଜାର ଓ ନୂଆବଜାର ଦେଇ ଗୋଶାଳା ଛକ, କୁଆଁସ, କଦମ୍ବେଢା ହୋଇ ପୁଣି ପୁରୁଣାବଜାରରେ ଶୋଭାଯାତ୍ରା ପହଞ୍ଚିଥିଲା। କଂଗ୍ରେସ ନେତୃମଣ୍ଡଳୀ ଭଦ୍ରକ ଏମ୍ପି ଓ ବିଧାୟକ ପ୍ରାର୍ଥୀଙ୍କୁ ବହୁମତ ଦେଇ ଜୟଯୁକ୍ତ କରାଇବା ସହ କେନ୍ଦ୍ରରେ କଂଗ୍ରେସକୁ କ୍ଷମତାସୀନ କରାଇବାକୁ ଅନୁରୋଧ କରିଥିଲେ।
ବିଧାୟକ ପ୍ରାର୍ଥୀ ନଳିନୀକାନ୍ତ ତାଙ୍କ ବକ୍ତବ୍ୟରେ ଭଦ୍ରକର ସାମୂହିକ ବିକାଶ, ଉଭୟ ସମ୍ପ୍ରଦାୟ ମଧ୍ୟରେ ଭାଇଚାରା ରକ୍ଷା କରିବା, ଭଦ୍ରକରେ ସରକାରୀ ମେଡିକାଲ କଲେଜ ପ୍ରତିଷ୍ଠା, ଭଦ୍ରକ ସ୍ବୟଂଶାସିତ ମହାବିଦ୍ୟାଳୟକୁ ଏକକ ବିଶ୍ୱବିଦ୍ୟାଳୟରେ ପରିଣତ କରିବା, ପୁରୁଣାବଜାରରେ ଏକ ଊର୍ଦ୍ଦୁ ସିଟି ସ୍କୁଲ ପ୍ରତିଷ୍ଠା, ଦମକଳ କେନ୍ଦ୍ର ସ୍ଥାପନ ଏବଂ ଭଦ୍ରକ ସହରର ରାସ୍ତା, ପାନୀୟ ଜଳ ସମସ୍ୟା ଦୂର କରିବାକୁ ସେ ସଂକଳ୍ପବଦ୍ଧ ବୋଲି କହିଥିଲେ। ଟାଉନ ସଭାପତି ଅବଦୁଲ ମୋକିତ ଖଁା, ପିସିସି ସମ୍ପାଦକ ସେକ୍ ଗୁଲାମ ମଇଉଦ୍ଦିନ, ବ୍ଲକ ସଭାପତି ପ୍ରଫୁଲ୍ଲ ସାମଲ, ଜିଲା ଉପସଭାପତି ଅତୁଲ୍ୟ ନାୟକ, କାଉନସିଲର ଦିଲୀପ ନାୟକ, ସେକ୍ ସମ୍ଦାନୀ, ଅସ୍ରଫ୍ ଅଲ୍ଲି ଖଁା, ଜିଲା ଛାତ୍ର କଂଗ୍ରେସ ସଭାପତି ବଳରାମ ରାଉତ, ଜିଲା ସେବାଦଳ ମୁଖ୍ୟ ସେକ୍ ନଇମ, ସତ୍ୟ ପୁହାଣ, ଚନ୍ଦ୍ରକାନ୍ତ ମହାପାତ୍ର, ସେକ୍ ଜକିରୁଦ୍ଦିନ, ସେକ୍ ବୁଗ୍ଦାଦ ଓ ଅନନ୍ତ ପଣ୍ଡା ପ୍ରମୁଖ ଶୋଭାଯାତ୍ରାରେ ସାମିଲ ଥିଲେ।
