ନୂଆଦିଲ୍ଲୀ,୧୪-୧୦: ଅର୍ଥମନ୍ତ୍ରୀ ନିର୍ମଳା ସୀତାରାମନ ସୋମବାର ରାଷ୍ଟ୍ରାୟତ୍ତ ବ୍ୟାଙ୍କ ସିଇଓଙ୍କୁ ଭେଟିବେ। ଅର୍ଥନୀତିରେ ସୁଧାର ଆଣିବା ଲାଗି ବ୍ୟାଙ୍କଗୁଡ଼ିକର କାର୍ଯ୍ୟଧାରାକୁ ସେ ସମୀକ୍ଷା କରିବାର କାର୍ଯ୍ୟକ୍ରମ ରହିଛି। ଏହି ବୈଠକରେ ବ୍ୟାଙ୍କଗୁଡିକର ଋଣ ପ୍ରଦାନ ସ୍ଥିତି ଭଳି ଅନ୍ୟାନ୍ୟ ପ୍ରମୁଖ ପ୍ରସଙ୍ଗ ସ୍ଥାନ ପାଇବ। ଏମ୍ଏସ୍ଏମ୍ଇ ଏବଂ ଏନ୍ବିଏଫସିକୁ ପ୍ରଦାନ କରାଯାଉଥିବା ଋଣର ସମୀକ୍ଷା ହେବା ନେଇ ଆଶା କରାଯାଉଥିବା ପ୍ରକ୍ରିୟା ସହ ଜଡିତ ଜଣେ ଅଧିକାରୀ କହିଛନ୍ତି। ବ୍ୟାଙ୍କଗୁଡିକ କ୍ରେଡିଟ ଗ୍ୟାରେଣ୍ଟି ସ୍କିମ୍ରେ ସେମାନଙ୍କ ରିପୋର୍ଟ କାର୍ଡ ପ୍ରଦାନ କରିପାରନ୍ତି। ପୁଞ୍ଜି ବୃଦ୍ଧି ଲାଗି ବଜାରରୁ ଉଠାଣ ବ୍ୟବସ୍ଥା ନେଇ କିଭଳି କାର୍ଯ୍ୟକ୍ରମ ଗ୍ରହଣ କରାଯାଉଛି ସେ ପ୍ରସଙ୍ଗ ମଧ୍ୟ ଉଠିପାରେ। ସେହିଭଳି ପ୍ରଥମ ପର୍ଯ୍ୟାୟରେ ଦେଶର ୨୨୬ ଜିଲାରେ ଅନୁଷ୍ଠିତ ହୋଇଥିବା ବ୍ୟାଙ୍କଗୁଡିକର ଋଣ ଯୋଗାଣ ଶିବିର ସମ୍ପର୍କରେ ବୈଠକରେ ଆଲୋଚନା ହେବାର ସମ୍ଭାବନା ରହିଛି। ଗୋଟିଏ ମାସ ମଧ୍ୟରେ ସୀତାରାମନ ବ୍ୟାଙ୍କ ମୁଖ୍ୟଙ୍କୁ ଦ୍ୱିତୀୟ ଥର ଲାଗି ଭେଟୁଛନ୍ତି। ପ୍ରଥମ ପର୍ଯ୍ୟାୟରେ ଆରମ୍ଭ ହୋଇଥିବା ଋଣ ମେଳାରେ କୃଷି, ଯାନବାହନ, ବାସଗୃହ, ଏମ୍ଏସ୍ଏମ୍ଇ, ଶିକ୍ଷା ଏବଂ ବ୍ୟକ୍ତିଗତ ଋଣ ପ୍ରଦାନକୁ ଗୁରୁତ୍ୱ ଦିଆଯାଇଥିବା ବ୍ୟାଙ୍କଗୁଡିକ କହିଛନ୍ତି। ଏହା ଅକ୍ଟୋବର ୭ରେ ଶେଷ ହୋଇଛି। ଦ୍ୱିତୀୟ ପର୍ଯ୍ୟାୟ ୨୧ରୁ ୨୫ ଯାଏ ଅନୁଷ୍ଠିତ ହେବ।
