ଯାଜପୁର ଅଫିସ,୬ା୧- ଯାଜପୁର ଜିଲାରେ ରାଜନୈତିକ ଛତ୍ରଛାୟା ତଳେ ବେଆଇନ ଲଘୁ ଖଣିଜ ସମ୍ପଦ ଲୁଟ ସୀମା ଲଂଘିଛି। ଟାସ୍କଫୋର୍ସ କମିଟି, ଜାତୀୟ ଗ୍ରୀନ ଟ୍ରିବ୍ୟୁନାଲ, ବିଧାନସଭାରେ ଆଲୋଚନା ଆଦି କୌଣସି ଧାର ଧାରୁନାହିଁ। ମାନୁଆଲ (ହସ୍ତଚାଳିତ) ମାଇନିଂ ଲିଜ ନେଇ ଲିଜଧାରୀ ମେକାନିକାଲ (ଯନ୍ତ୍ରଚାଳିତ) ଖାଦାନରେ ପରିଣତ କରି ନିର୍ଦ୍ଧାରିତଠାରୁ ବହୁଗୁଣ ଅଧିକ ବାଲି ଉତ୍ତୋଳନ କରୁଥିବା ଦେଖିବାକୁ ମିଳୁଛି। ବିଶେଷ କରି ବ୍ୟାସନଗର ତହସିଲ ଅଧୀନ ବୈତରଣୀ ନଦୀର ସାଆଁଳା, ଲିଙ୍ଗେଶ୍ୱର, ଡିମିରିଆ, ମଥୁରାପୁର ବାଲିଘାଟ ଲିଜଧାରୀମାନେ କୌଣସି ନୀତିନିୟମ ମାନୁନାହାନ୍ତି। ସ୍ଥାନୀୟ ପୋଲିସ ଓ ରାଜସ୍ବ ପ୍ରଶାସନକୁ ହାତକରି ବିଭିନ୍ନ ଯନ୍ତ୍ରପାତିରେ ବାଲି ଉତ୍ତୋଳନ ହେଉଛି। ସାଆଁଳା ବାଲିଘାଟ ଉପରେ ଏନ୍ଜିଟିର ସ୍ବତନ୍ତ୍ର କଟକଣା ରହିଥିଲେ ହେଁ କେହି ଏହାକୁ ମାନୁନାହାନ୍ତି। ଫଳରେ ସରକାର ବାର୍ଷିକ କୋଟିକୋଟି ଟଙ୍କା ରାଜସ୍ବ ହରାଉଥିବାବେଳେ ବୈତରଣୀ ନଦୀର ମଥୁରାପୁର ବ୍ରିଜ ବିପଦାପନ୍ନ ହେବାର ଆଶଙ୍କା ସୃଷ୍ଟି କରିଛି।
୨୦୧୮ ଜାନୁୟାରୀ ପ୍ରଥମ ସପ୍ତାହରେ ଖଣିଜ ପଦାର୍ଥ ଚୋରି ରୋକିବାକୁ ରାଜସ୍ବ ବିଭାଗ, ପୋଲିସ, ପରିବହନ, ଖଣି, ଜଙ୍ଗଲ, ସମ୍ପୃକ୍ତ ତହସିଲ, ବିଦ୍ୟୁତ, ନିୟନ୍ତ୍ରିତ ବଜାର କମିଟି ପ୍ରମୁଖଙ୍କ ମିଳିତ ଉଦ୍ୟମରେ ଟାସ୍କଫୋର୍ସ କମିଟି ଗଠନ ହୋଇଥିଲା। ଖଣି ମାଫିଆମାନେ ଜିଲା ରାଜସ୍ବକୁ ଲୁଟ କରି ଚାଲିଛନ୍ତି। ତେଣୁ ଏହି ବେଆଇନ କାର୍ଯ୍ୟକୁ ଆଦୌ ବରଦାସ୍ତ କରାଯିବ ନାହିଁ ବୋଲି ଜିଲାପାଳ ଦୃଢୋକ୍ତି ପ୍ରକାଶ କରିଥିଲେ। ଅଥଚ ଏଯାଏ ଜିଲାର ବିଭିନ୍ନ ନଦୀରୁ ବେଆଇନଭାବେ ବାଲି ଲୁଟ ହ୍ରାସ ପାଇବାର ନାଁ ଧରୁନାହିଁ। ସ୍ଥାନୀୟ ପୋଲିସ ପ୍ରଶାସନ ଏହି ବେଆଇନ କାର୍ଯ୍ୟ ପ୍ରତି ଆଖି ବୁଜି ଦେବା ସହିତ ଓଲଟା ବାଲି ମାଫିଆଙ୍କ ସହଯୋଗୀ ପାଲଟିଛି। ଏଥିରୁ ଜିଲାପାଳଙ୍କ ନିର୍ଦ୍ଦେଶ ଫସର ଫାଟିଛି। ଏହାବାଦ ନଦୀପଠାରୁ ବାଲି ଉତ୍ତୋଳନରେ ମେଶିନ ବ୍ୟବହାର ହୋଇପାରିବ ନାହିଁ ଏବଂ କୌଣସି ମେସିନ ବ୍ୟବହାର ହେଉଥିଲେ ତାହାକୁ ଜବତ କରିବାକୁ ଗତ ୨୦୧୭ ଏପ୍ରିଲ ମାସ ୨୮ ତାରିଖରେ ଯାଜପୁର ଜିଲା ଦେଇ ପ୍ରବାହିତ କୋରେଇ ବ୍ଲକ ସାଆଁଳା ବାଲିଘାଟରୁ ବେଆଇନ ବାଲି ଉତ୍ତୋଳନ ମାମଲା (କେଶ ନମ୍ବର-୧୬୨/୨୦୧୬/ଇଜେଡ)ର ଶୁଣାଣି କରି ଏନ୍ଜିଟି ନିର୍ଦ୍ଦେଶ ଜାରି ହୋଇଥିଲା। ଏହାସହ ଜିଲା ଆରକ୍ଷୀ ଅଧୀକ୍ଷକଙ୍କୁ ମାମଲାର ସବିଶେଷ ତଦନ୍ତ କରିବାକୁ ଏନଜିଟି ପରାମର୍ଶ ଦେଇଥିଲା। ତେବେ ଏହି ନିର୍ଦ୍ଦେଶକୁ ବାଲି ମାଫିଆମାନେ ଖାତିର କରିନାହାନ୍ତି। ଜିଲା ରାଜସ୍ବ ଓ ପୋଲିସ ପ୍ରଶାସନର ସହଯୋଗରେ ବିଭିନ୍ନ କ୍ଷମତାର ମେଶିନ ଲଗାଇ ଲିଜ ଅନୁମତିଠାରୁ ଦୈନିକ ଟନଟନ ଅଧିକ ବାଲି ଉତ୍ତୋଳନ କରାଯାଉଛି। ପ୍ରଶାସନିକ ତଦନ୍ତରେ ଦେବେନ୍ଦ୍ର ଘଡେଇଙ୍କୁ ବୈତରଣୀ ନଦୀ ସାଆଁଳ ମୌଜାର ୧୨.୫୦ ଏକର ପରିମିତ ଅଞ୍ଚଳରେ ପ୍ଲଟ ନମ୍ବର ୦୨/୨୪୮୮, ୨ ଓ ଖାତା ନମ୍ବର ୩୦୧ରେ ହସ୍ତଚାଳିତ ବାଲି ଖାଦାନ ପାଇଁ ଲିଜ ଦିଆଯାଇଛି। କିନ୍ତୁ ଲିଜଧାରୀ ଯନ୍ତ୍ରଚାଳିତଭାବେ ବାଲି ଉଠାଣ କରୁଥିବା ତଦନ୍ତରେ ଜଣାପଡିଥିଲା। ସେତେବେଳେ ପ୍ରୋକଲିନ ମେଶିନ ଓ ବାଲି ବୋଝେଇ ୨ଟି ଡମ୍ଫରକୁ ଘଟଣାସ୍ଥଳରୁ ଜବତ କରାଯାଇଥିଲା। ବର୍ତ୍ତମାନ ମଧ୍ୟ ସେହି ହସ୍ତଚାଳିତ ବାଲି ଖାଦାନରୁ ବିଭିନ୍ନ କ୍ଷମତା ସମ୍ପନ୍ନ ମେଶିନ ସହାୟତାରେ ବାଲି ଉତ୍ତୋଳନ ହେଉଛି। ତେବେ ବିଡମ୍ବନା ଯେ, ଏନଜିଟି ନିର୍ଦ୍ଦେଶକୁ କେହି ବି ପାଳନ କରୁନାହାନ୍ତି। ଏହାବାଦ ମଥୁରାପୁର ବାଲି ଖାଦାନରେ ବାଲି ଉତ୍ତୋଳନ ନ ହୋଇ କେନ୍ଦୁଝର ଜିଲା ସୀମାନ୍ତ ମଥୁରାପୁର ବ୍ରିଜ ନିକଟରୁ ବାଲି ଉତ୍ତୋଳନ କରାଯାଉଛି। ଯାହାକି ସମ୍ପୂର୍ଣ୍ଣ ବେଆଇନ ଏବଂ ଏଥିଯୋଗୁ ବ୍ରିଜ ଅବସ୍ଥା ବିପଦାପନ୍ନ ହୋଇପାରେ ବୋଲି ଅଞ୍ଚଳବାସୀ ଆଶଙ୍କା ପ୍ରକାଶ କରିଛନ୍ତି। ଏହାସହ ଓଭରଲୋଡିଂ ବାଲି ଚୋରାଚାଲାଣ ଯୋଗୁ ଖଜୁରନାଲିଆ ପୂର୍ବକୋଟ ରାସ୍ତା, ବରୁଣ୍ଡେଇ-ମୁକୁନ୍ଦପୁର ରାସ୍ତା, ବରୁଣ୍ଡେଇ-ଧନେଶ୍ୱର, ଷଠିପୁର ଆଦି ରାସ୍ତା ବିପର୍ଯ୍ୟସ୍ତ ହେଉଛି ବୋଲି ଅଭିଯୋଗ ହେଉଛି। ଏ ସଂକ୍ରାନ୍ତରେ ବ୍ୟାସନଗର ଭାରପ୍ରାପ୍ତ ତହସିଲଦାର ସସ୍ମିତା ସ୍ବାଇଁଙ୍କୁ ପଚାରିବାରେ, ସମ୍ପୃକ୍ତ ଲିଜଧାରୀଙ୍କୁ ନୋଟିସ ଦିଆଯାଇ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରାଯାଇଛି। ଖୁବ୍ଶୀଘ୍ର ଆବଶ୍ୟକ ପଦକ୍ଷେପ ଗ୍ରହଣ କରାଯିବ ବୋଲି ସେ କହିଛନ୍ତି।
