ବୁଗୁଡ଼ା,୧୧ା୫(ଡି.ଏନ.ଏ.)-ବୁଗୁଡ଼ା ବ୍ଲକ ଏବଂ ଏନ୍ଏସି ଅଧୀନରେ ଥିବା ୬୦ ସଂଗରୋଧ କେନ୍ଦ୍ରରେ ସୋମବାର ସୁଦ୍ଧା ୨୫୧୪ ପ୍ରବାସୀ ରହିଥିବା ଜଣାପଡ଼ିଛି। ସେଥିରୁ ୨୪୯୫ ଜଣ ସୁରଟ ଫେରନ୍ତା ହୋଇଥିବା ବେଳେ ୧୯ ଜଣ ଅନ୍ୟ ରାଜ୍ୟରୁ ଆସିଥିବା ଜଣାଯାଇଛି। ବର୍ତ୍ତମାନ ବୁଗୁଡ଼ା ବ୍ଲକର ବିଭିନ୍ନ ପଞ୍ଚାୟତର ୫୬ ସଂଗରୋଧ କେନ୍ଦ୍ରରେ ୨୧୩୩ ପୁରୁଷ, ୧୫୩ ମହିଳା ଏବଂ ୧୦୮ ଶିଶୁ ଏପରି ମୋଟ ୨୩୯୪ ଜଣ ଥିବା ବେଳେ ଏନ୍ଏସିର ୪ କେନ୍ଦ୍ରରେ ୧୦୬ ପୁରୁଷ, ୮ ଜଣ ମହିଳା ଓ ୬ ଜଣ ଶିଶୁ ଏପରି ୧୨୦ ଜଣ ରହିଛନ୍ତି। ମୋଟ ଦେଖିଲେ ବ୍ଲକ ଓ ଏନ୍ଏସିର ୬୦ ସଂଗରୋଧ କେନ୍ଦ୍ରରେ ୨୨୩୯ ପୁରୁଷ, ୧୬୧ ମହିଳା ଓ ୧୧୪ ଜଣ ଶିଶୁ ଏପରି ମୋଟ ୨୫୧୪ ଜଣ ରହିଛନ୍ତି। ପ୍ରତ୍ୟେକ କେନ୍ଦ୍ରର ସ୍ବାସ୍ଥ୍ୟ ପରୀକ୍ଷା, ଖାଦ୍ୟ ଓ ପାନୀୟ ଜଳ ବ୍ୟବସ୍ଥା ସକାଶେ ନୋଡାଲ ଅଧିକାରୀ, ଶିକ୍ଷକ, ଅଙ୍ଗନୱାଡ଼ି କର୍ମୀ, ସହାୟିକା ଏବଂ ଆତ୍ମ ସହାୟିକା ଗୋଷ୍ଠୀମାନେ ସହଯୋଗ କରୁଛନ୍ତି। ପ୍ରତ୍ୟେକ ପଞ୍ଚାୟତରେ ସରପଞ୍ଚମାନଙ୍କୁ ଜିଲାପାଳ କ୍ଷମତା ଦିଆଯାଇ ସେମାନଙ୍କର ତତ୍ତ୍ବାବଧାନ ଏବଂ ବିଡିଓ ତନ୍ମୟ ପାତ୍ର, ତହସିଲଦାର ସଂଗ୍ରାମ କେଶରୀ ଜେନାଙ୍କ ପରିଚାଳନାରେ ସଂଗରୋଧ କେନ୍ଦ୍ରଗୁଡ଼ିକ ପରିଚାଳିତ ହେଉଛି। କିନ୍ତୁ ଅଳ୍ପ କେତେକ କେନ୍ଦ୍ରରେ ସାମାଜିକ ଦୂରତ୍ୱ ରହୁ ନ ଥିବା, ମାସ୍କ ନ ପିନ୍ଧିବା, ବାହାରେ ବୁଲାବୁଲି କରିବା, ପୋଖରୀକୁ ଗାଧୋଇ ଯିବା ଦୃଷ୍ଟିକୁ ଆସିଥିବା ବେଳେ ଏଥିପ୍ରତି ପ୍ରଶାସନ ଧ୍ୟାନ ଦେବାକୁ ସାଧାରଣରେ ଦାବି ହେଉଛି। ତେବେ ଏଥିପ୍ରତି ଗୁରୁତ୍ୱ ଦିଆଯାଉଥିବା ପ୍ରଶାସନିକ ଅଧିକାରୀମାନଙ୍କ ଠାରୁ ପ୍ରକାଶ । ଅଭିଯୋଗ ଆସିଲେ ତୁରନ୍ତ ସମସ୍ୟାର ସମାଧାନ କରାଯାଉଛି ବୋଲି କହିଛନ୍ତି।
