ବିଶ୍ୱରେ ଅନେକ କାଠ ରହିଛି, ସେଥିମଧ୍ୟରୁ କେତେକ ବହୁ ମହଙ୍ଗା ତ ଆଉ କେତେକ ବିରଳ। ସାଧାରଣତଃ ଚନ୍ଦନ କାଠକୁ ସବୁଠୁ ମୂଲ୍ୟବାନ ବୋଲି କୁହାଯାଇଥାଏ। ଯାହାର କିଲୋଗ୍ରାମ ପ୍ରତି ଦାମ୍ ୫ରୁ ୬ ହଜାର ଟଙ୍କା। କିନ୍ତୁ ଜାଣି ଆଶ୍ଚର୍ଯ୍ୟ ହେବେ ଏମିତି ଏକ କାଠ ଅଛି, ଯାହାର କିଲୋଗ୍ରାମ ପ୍ରତି ଦାମ୍ ୮ ହଜାର ପାଉଣ୍ଡ୍ ଅର୍ଥାତ୍ ୭ ଲକ୍ଷ ଟଙ୍କା। ଏହାର ଦାମ୍ରେ ବିଳାସମୟ କାର୍ ମଧ୍ୟ କିଣିହେବ। ଏହି କାଠର ନାମ ‘ଆଫ୍ରିକି ବ୍ଲାକ୍ଉଡ୍’। ଯାହାକି ବିଶ୍ୱର ସବୁଠୁ ମୂଲ୍ୟବାନ କାଠ। ପୃଥିବୀରେ ଥିବା ଅନ୍ୟ କାଠ ତୁଳନାରେ ଏହା ବିରଳ। ଯାହାର ଉଚ୍ଚତା ପ୍ରାୟ ୨୫-୪୦ ଫୁଟ।
ଏହା ଦକ୍ଷିଣ ଆଫ୍ରିକାର ୨୬ଟି ଦେଶରେ ଦେଖିବାକୁ ମିଳିଥାଏ। ଏହି ଗଛ ସମ୍ପୂର୍ଣ୍ଣ ବଢ଼ିବା ପାଇଁ ପ୍ରାୟ ୬୦ ବର୍ଷ ଲାଗିଥାଏ। କିନ୍ତୁ କେନିଆ ଏବଂ ତାଞ୍ଜାନିଆ ପରି ଦେଶରେ ଅବଧି ପୂର୍ବରୁ କାଟିଦିଆଯାଏ। ତେଣୁ ଏଠାରେ ବ୍ଲାକ୍ଉଡ୍ ଗଛ ସଂଖ୍ୟା ବହୁତ କମ୍। ଯେଉଁ କାରଣରୁ ଏହା ଦୁର୍ଲଭ ଅଟେ। ଏହି କାଠକୁ ଶାହାନାଇ, ଗୀଟାର, ବଂଶୀ ପରି ବାଦ୍ୟଯନ୍ତ୍ର ପ୍ରସ୍ତୁତିରେ ବ୍ୟବହାର କରାଯାଇଥାଏ। ଏହା ବ୍ୟତୀତ ଏହି କାଠରେ ଫର୍ଣ୍ଣିଚର ମଧ୍ୟ ତିଆରି କରାଯାଏ। ଯାହାକୁ କ୍ରୟ କରିବା ସାଧାରଣ ଲୋକଙ୍କ ପାଇଁ ଅସମ୍ଭବ। କେବଳ ଧନୀ ଶ୍ରେଣୀର ଲୋକମାନେ ହିଁ ଏହି କାଠରୁ ପ୍ରସ୍ତୁତ ସାମଗ୍ରୀ କିଣିବାରେ ସକ୍ଷମ ହୋଇଥାନ୍ତି।
