ଭୁବନେଶ୍ୱର, ୧୩।୯(କ୍ରୀଡ଼ା ପ୍ରତିନିଧି)-ଭାରତୀୟ ସ୍ପ୍ରିଣ୍ଟ କୁଇନ୍ ଓଡ଼ିଶାର ଦୂତୀ ଚାନ୍ଦଙ୍କ ପାଇଁ ଆସିଛି ଆଉ ଏକ ବଡ଼ ସୁଯୋଗ। ଦୋହାରେ ହେବାକୁ ଯାଉଥିବା ବିଶ୍ୱ ଆଥଲେଟିକ୍ସ ଚାମ୍ପିୟନଶିପ୍ରେ ସେ ଅଂଶଗ୍ରହଣ କରିବେ। ମହିଳା ୧୦୦ ମିଟର ଇଭେଣ୍ଟ ପାଇଁ ଯୋଗ୍ୟତା ଟାଇମିଂ (୧୧.୨୪ ସେକେଣ୍ଡ) ସ୍ପର୍ଶ କରିପାରି ନ ଥିଲେ ହେଁ ବ୍ୟାକ୍ତିଗତ ଶ୍ରେଷ୍ଠ ଟାଇମିଂ ଏବଂ ଓ୍ବାଲର୍ଡ ୟୁନିଭର୍ସିଟି ଗେମ୍ସର ୧୦୦ ମିଟରରେ ଚାମ୍ପିୟନ ହୋଇଥିବାରୁ ଦୂତୀଙ୍କୁ ବିଶ୍ୱ ଚାମ୍ପିୟନଶିପ୍ ଟିକେଟ ମିଳି ଯାଇଛି। ଦୋହା ବିଶ୍ୱ ଆଥଲେଟିକ୍ସ ଚାମ୍ପିୟନଶିପ୍ର ମହିଳା ୧୦୦ ମିଟର ଇଭେଣ୍ଟରେ ୪୮ ପ୍ରତିଯୋଗୀ ଅଂଶଗ୍ରହଣ କରିବେ। ଏତେ ସଂଖ୍ୟାକ ପ୍ରତିଯୋଗୀ ଯୋଗ୍ୟତା ଟାଇମିଂ ଛୁଇଁପାରି ନ ଥିବାରୁ ପରବର୍ତ୍ତୀ ଶ୍ରେଷ୍ଠ ଟାଇମିଂ ଏବଂ ପ୍ରଦର୍ଶନ ଭିତ୍ତିରେ ଇଣ୍ଟରନ୍ୟାଶନାଲ ଆସୋସିଏଶନ ଅଫ୍ ଆଥଲେଟିକ୍ ଫେଡେରେଶନ୍ସ (ଆଇଏଏଏଫ) ପକ୍ଷରୁ ଦୂତୀଙ୍କୁ ଆମନ୍ତ୍ରଣ ପାଇଁ ଆଥଲେଟିକ୍ ଫେଡେରେଶନ ଅଫ୍ ଇଣ୍ଡିଆ (ଏଏଫଆଇ)କୁ ଜଣାଇ ଦିଆ ଯାଇଥିଲା। ଆଇଏଏଏଫ ନିମନ୍ତ୍ରଣକୁ ଏଏଫଆଇ ଗ୍ରହଣ କରିଥିବାରୁ ଦୂତୀ ଦୋହାରେ ନିଜ ଦକ୍ଷତା ପ୍ରତିପାଦନର ସୁଯୋଗ ପାଇଛନ୍ତି। ସେପ୍ଟେମ୍ବର ୯ ତାରିଖରେ ଏଏଫଆଇ ପକ୍ଷରୁ ପ୍ରକାଶିତ ୨୫ ଜଣିଆ ଆଥଲେଟ୍ ତାଲିକାରେ ଦୂତୀଙ୍କ ନାମ ନ ଥିଲା। ତେବେ ଯେ ଯାହା ହେଉ ନା କାହିଁକି ସେପ୍ଟେମ୍ବର ୨୭ରୁ ଅକ୍ଟୋବର ୬ ପର୍ଯ୍ୟନ୍ତ ହେବାକୁ ଯାଉଥିବା ଏହି ମେଗା ଇଭେଣ୍ଟରେ ଦୂତୀ ଭାଗନେବା ସ୍ପଷ୍ଟ ହୋଇଯାଇଛି। ଏଏଫଆଇ ପକ୍ଷରୁ ଏହା ସ୍ପଷ୍ଟ କରାଯାଇଛି।
