ପୁରୀ ଅଫିସ,୩୧ା୮: ଶ୍ରୀମନ୍ଦିର ସୁରକ୍ଷା ପାଇଁ ଚାଲିଛି ଉଚ୍ଛେଦ ଅଭିଯାନ। ପ୍ରାଥମିକ ପର୍ଯ୍ୟାୟରେ ଜିଲା ପ୍ରଶାସନ ଅସୁରକ୍ଷିତ କୋଠା ଭାଙ୍ଗୁଛି। ଶୁକ୍ରବାର ଭଙ୍ଗାଯାଇଛି ବହୁ ଚର୍ଚ୍ଚିତ ଏମାର ମଠର ରଘୁନନ୍ଦନ ଲାଇବ୍ରେରୀ ଏବଂ ଦୋକାନ ଘର। ତେବେ ଏହି ଉଚ୍ଛେଦ ପାଇଁ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ତେବେ ଏହି ଟ୍ରାଫିକ କଟକଣା ପାଇଁ ଶ୍ରୀମନ୍ଦିର ନୀତିକାନ୍ତିରେ ବିଳମ୍ବ ଘଟିଛି। ଅପରାହ୍ନ ୪ଟାରେ ଭୋଗମଣ୍ଡପ ବାହାରିଥିବା ବେଳେ ଅମାବାସ୍ୟା ନାରାୟଣ ବି ସେହି ୪ଟାରେ ସାଗର ବିଜେ କରିଛନ୍ତି। ତେବେ ଏଥିପାଇଁ ପ୍ରଶାସନକୁ ଦାୟୀ କରାଯାଇଛି।
ଉଚ୍ଛେଦ କାର୍ଯ୍ୟକୁ ଶୃଙ୍ଖଳିତ କରିବା ଲାଗି ଶୁକ୍ରବାର ଦୋଳମଣ୍ଡପ ସାହି ଗଳିରେ ବ୍ୟାରିକେଡିଂ କରାଯାଇଥିବା ବେଳେ ପୋଲିସ ଜଗି ରହିଥିଲା। ସେବାୟତମାନେ ସେବାପୂଜା ପାଇଁ ଶ୍ରୀମନ୍ଦିରକୁ ଆସୁଥିବା ବେଳେ ପୋଲିସ ସେମାନଙ୍କୁ ଛାଡି ନ ଥିଲା। ଫଳରେ ସେବାୟତମାନେ ଘରକୁ ଫେରି ଯାଇଥିଲେ। ଏହାକୁ ନେଇ ବିଳମ୍ବ ହୋଇଥିଲା। ସକାଳ ଧୂପ ପର୍ଯ୍ୟନ୍ତ ନୀତି ଠିକ୍ ଠାକ ଚାଲିଥିବା ବେଳେ ଏହା ପରଠାରୁ ବିଳମ୍ବ ହୋଇଥିଲା। ଗାରଦରେ ବିଳମ୍ବ ଖବର ପହଞ୍ଚତ୍ବା ପରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ଜିଲା ଏବଂ ପୋଲିସ ପ୍ରଶାସନ ସହ ଯୋଗାଯୋଗ କରାଯାଇଥିଲା। ଦୋଳମଣ୍ଡପ ସାହି ଗଳି ମୁଣ୍ଡରେ ଜଣେ ଜେଟିପି ମୁତୟନ ରହିଥିଲେ। ସେବାୟତମାନେ ସେହି ବାଟ ଦେଇ ଆସିଥିଲେ।
ଥରିଲା ମେଘନାଦ ପାଚେରି
ସିଂହଦ୍ୱାର ସମ୍ମୁଖ ଏବଂ ମେଘନାଦ ପାଚେରିଠାରୁ ଅଳ୍ପ ଦୂରରେ ରହିଥିଲା ରଘୁନନ୍ଦନ ଲାଇବ୍ରେରୀ। ତିନିମହଲା ବିଶିଷ୍ଟ ଏହି କୋଠାର ତଳ ମହଲାରେ ଦୋକାନ ଘର ଏବଂ ଉପରେ ଲାଇବ୍ରେରୀ ଚାଲୁଥିଲା। ତେବେ ଶୁକ୍ରବାର ଏହି କୋଠାକୁ ବୁଲ୍ଡୋଜରରେ ଭାଙ୍ଗିବା ବେଳେ ନିକଟରେ ଥିବା ମେଘନାଦ ପାଚେରି ଥରିଲା ଭଳି ଜଣାପଡୁଥିଲା। ତେବେ ଏହାକୁ ନେଇ ପ୍ରଶାସନକୁ କେହି କେହି ସମାଲୋଚନା କରିଥିଲେ। ଶ୍ରୀମନ୍ଦିରର ସୁରକ୍ଷା ପାଇଁ ଏମାର ମଠ କୋଠା ଭଙ୍ଗାଯାଉଥିବା ବେଳେ ଏଥିପାଇଁ ମେଘନାଦ ପାଚେରି ଥରିବା କେତେଦୂର ଠିକ୍ ବୋଲି ପରସ୍ପର ମଧ୍ୟରେ ଆଲୋଚନା କରୁଥିଲେ।
