ଭୁବନେଶ୍ୱର,୩।୮(ବ୍ୟୁରୋ): ବିର୍ଲା ଗ୍ଲୋବାଲ ୟୁନିଭରସିଟିର ବିର୍ଲା ସ୍କୁଲ ଅଫ କମ୍ୟୁନିକେଶନ ପକ୍ଷରୁ ନବାଗତ ସପ୍ତମ ବ୍ୟାଚ୍ର ଏମ୍ଏଜେଏମ୍ସି ଏବଂ ତୃତୀୟ ବ୍ୟାଚ୍ର ବିଏଜେଏମ୍ସି(ଅନର୍ସ) ଛାତ୍ରୀଛାତ୍ରମାନଙ୍କର ସ୍ବାଗତ ସମ୍ବର୍ଦ୍ଧନା ଉତ୍ସବ ଶିକ୍ଷାନୁଷ୍ଠାନର ଗୋଠପାଟଣା କ୍ୟାମ୍ପସରେ ଅନୁଷ୍ଠିତ ହୋଇଯାଇଛି। ଏଥିରେ ହିଷ୍ଟ୍ରି ଟିଭି ୧୮ର ବରିଷ୍ଠ ପ୍ରଯୋଜକ ମୋନିକା ନନ୍ଦ ମୁଖ୍ୟ ଅତିଥିଭାବେ ଯୋଗଦେଇଥିବା ବେଳେ ସମ୍ମାନିତ ଅତିଥିଭାବେ ସନ୍ମାର୍ଗର ମୁଖ୍ୟ ମହାପ୍ରବନ୍ଧକ ଡ. ଅଶୋକ କୁମାର ପଣ୍ଡା ଏବଂ ମୁଖ୍ୟବକ୍ତା ଭାବେ ଓଡିଶା ଲାଇଭ୍ର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ନୀଳାମ୍ବର ରଥ ଯୋଗ ଦେଇଥିଲେ। ବର୍ତ୍ତମାନ ସାମ୍ବାଦିକତା ମୁଦ୍ରିତ ଗଣମାଧ୍ୟମରୁ ଆରମ୍ଭ କରି ଡିଜିଟାଲ ଯୁଗରେ ପଦାର୍ପଣ କରିଛି ବୋଲି ମୋନିକା ନନ୍ଦ କହିଥିଲେ। ଛାତ୍ରୀଛାତ୍ରମାନେ ଜନସମ୍ପର୍କ ଅଧିକାରୀ, ବିଜ୍ଞାପନ, ୱେବ ଜର୍ନାଲିଜିମ୍, ମୋବାଇଲ ଜର୍ନାଲିଜିମ୍ ଆଦି ବିଭିନ୍ନ କ୍ଷେତ୍ରରେ ନିଜ କ୍ୟାରିୟର ଗଢିପାରିବେ ବୋଲି ସେ କହିଥିଲେ। ଡିଜିଟାଲ ମିଡିଆକୁ ପ୍ରାଧାନ୍ୟ ଦେବା ସହ ଏହାହିଁ ଭବିଷ୍ୟତରେ ପ୍ରମୁଖ ମାଧ୍ୟମ ପାଲଟିବ ବୋଲି ନୀଳାମ୍ବର ରଥ କହିଥିଲେ। ଜଣେ ପେସାଦାର ସାମ୍ବାଦିକ ହେବାପାଇଁ ସଫଳ ଯୋଗାଯୋଗ, ସାହସୀ ଓ ଉତ୍ସର୍ଗୀକୃତ ହେବା ଆବଶ୍ୟକ ବୋଲି ଅଶୋକ ପଣ୍ଡା କହିଥିଲେ। ବିଜିୟୁର ରେଜିଷ୍ଟ୍ରାର ଡ. ବି.କେ. ଦାଶ ବିଜିୟୁର ଶିକ୍ଷା ଏବଂ ପ୍ରଶିକ୍ଷଣ ଛାତ୍ରୀଛାତ୍ରମାନଙ୍କୁ ଭବିଷ୍ୟତରେ ଭଲ ସାମ୍ବାଦିକ ରୂପେ ଗଢିତୋଳିବ ବୋଲି କହିଥିଲେ। ବିର୍ଲା ସ୍କୁଲ ଅଫ କମ୍ୟୁନିକେଶନର ମୁଖ୍ୟ ଶିବଶଙ୍କର ଦାସ ସ୍ବାଗତ ଭାଷଣ ଓ ପ୍ରଫେସର ତୁଲୀକା ଧନ୍ୟବାଦ ଅର୍ପଣ କରିଥିଲେ।
