ଲାଠୋର, ୧୨।୨ (ଡି.ଏନ୍.ଏ.)- କେନ୍ଦ୍ର ଆର ରାଏଜ୍ ଉଭଏ ସରକାର ଗଁଗଁଲିର ବିକାଶ କଥା କହୁଛନ୍। ଇଥିରଲଗି ଅନେକ ଯୋଜନା ବି କାଯ୍କାରୀ କରି ଫିବଛର କୋଟି କୋଟି ଟଁକା ଖରଚ୍ କରୁଛନ୍। ହେଲେ ଆଏଜ୍ ବି ଅନେକ ଗଁାଗଁାଡ଼ାର ଲୋକ୍ ସାଧାରନ୍ ମଉଲିକ୍ ସୁବିଧା ସୁଯୋଗରୁ ବଁଚିତ୍ ହେଇ ରହିଛନ୍। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବଲାଙ୍ଗୀର ଜିଲା ତୁରେକେଲା ବ୍ଲକ ହଲନଭଟା ପଁଚେତ୍ ଅଧୀନ ଆଦିବାସୀ ବହୁଲ ଡେବ୍ରିଆମୁଣ୍ଡା ଗଁାରେ।
ସୂଚନା ଅନ୍ସାରେ ଦୁଇଟା ଓ୍ବାର୍ଡକେ ନେଇ ଗଠିତ ଡେବ୍ରିଆମୁଣ୍ଡା ଗଁାରେ ୨ଶହ ପରିବାରର ପାଖାପାଖି ୧୨ଶହ ଲୋକ୍ ବାସ କରୁଛନ୍। ଗଁାର ବଡ଼ଭାଗି ଲୋକ୍ ଖଟିଖିଆ ଆର ଆଦିବାସୀ ସମାଜର। ବଛରର ଅନେକ ସମିଆ ଦାଦନ ଯାଇ ନିଜର ପେଟ୍ ପାଲୁଛନ୍। ସେନ୍ତା ଗଁାର ଅଲପ୍ କେତେ ଲୁକ୍କର ଜମିବାଡ଼ି ଅଛେ। ସେମାନେ ଚାଷ୍ବାସ କରି ନିଜର କୁଟୁମ ପୁଷୁଛନ୍। ସରକାର ଗରିବ୍ ଦୁଖି ଖଟିଖିଆକର ଲାଗି ଏମ୍ଜିଏନ୍ଆରଇଜିଏସ୍ ଯୋଜନା କାଯ୍କାରୀ କରୁଥିଲାବେଲେ ଇଠାନେ ଥାନୀଅ ଲୋକ୍ କାମ୍ ନାଇଁ ପାଉଥିବାର ଗଁାବାସୀ ଅଭିଯୋଗ କରିଛନ୍। ଏନ୍ତାଥି ଗଁାର ବଡ଼ଭାଗି ପରିବାର ଚଲତି ବଛର ଦାଦନ ଯାଇଥିବାର ଗଁାବାସୀ କହିଛନ୍। ଗଁାର କେତେ ପରିବାରକେ ଆବାସ ଯୋଜନାରେ ସାମିଲ ହେଇଥିଲାବେଲେ ପାଖାପାଖି ୧୫୦ରୁ ଅଧ୍କା ଗରିବ୍ ପରିବାର ବାଦ୍ ପଡ଼ିଛନ୍। ଗଁାବାସୀକର ପିଇଲା ପାଏନ୍ ସୁବିଧା ଲାଗି ଗଁାରେ ୫ଟା ନଲ୍ଚୁଅଁା ରହିଛେ। ହେଲେ ଅନେକ ଦିନ୍ ହେଲା ସେଥ୍ରୁ ଗୁଟେ ନଲ୍ଚୁଅଁା ଅଲଚ ହେଇ ପଡ଼ିଥିଲାବେଲେ ବାକିରୁ ଦରକାର ହିସାବେ ପାଏନ୍ ନାଇଁ ବାହାରବାର। ଆଏଜ୍ ବି ଗଁାବାସୀକର ଲାଗି ନିରମଲ ପିଇଲା ପାଏନ୍ ସାତ୍ସପନ ହେଇ ରହିଛେ। ଗଁାରେ ଅଙ୍ଗନଓ୍ବାଡି କେନ୍ଦ୍ର ଆର ପ୍ରାଥମିକ ସ୍କୁଲ ରହିଛେ ସତ୍। ହେଲେ ସେଟା ନାନା ସମସିଆ ଘେରରେ ରହିଛେ। ଅଭାବ ଅନାଟନ ଲାଗି ଗଁାର ୮୦ ଭାଗ୍ ଛାତ୍ରୀଛାତ୍ର ମାଟ୍ରିକରୁ ଆଗ୍କେ ଯାଇ ନାଇଁପାରବାର। ଏନ୍ତାଥି ସେମାନେ ପାଠ୍ପଢ଼ା ଛାଡ଼ି ପରିବାର ଲୁକ୍କୁ କାମ୍ବୁତାରେ ସାହାଯ୍ କରୁଛନ୍। ପାଖାପାଖି ବଛ୍ରେ ହେଲା ଗଁାରେ ଲୋକ୍ ପିଡିଏସ୍ କିରାସିନ ନାଇଁପାଇ। ସେନ୍ତା ବଛ୍ରେ ହେଲା ଗଁାରେ ଏମ୍ଜିଏନ୍ଆର୍ଇଜିଏସ୍ କାମ୍ ନାଇଁ ହେଇ ବଲି ଗଁାବାସୀ କହିଛନ୍। ଗଲା ବଛର ଗଁାର ୪ରୁ ୫ ଝନ୍ ହିତାଧିକାରୀକୁଁ ଏମ୍ଜିଏନ୍ଆର୍ଇଜିଏସ୍ ଜରିଆରେ ଗାଈ ଗୁହାଲ ତିଆରି ଲାଗି କାର୍ଯ୍ୟାଦେଶ ପାଇଛନ୍। ହେଲେ ଆକାଉଣ୍ଟରେ ଟଁକା ନାଇଁ ପଡ଼ବାର ଲାଗି ଝନେ ବି ହିତାଧିକାରୀ ଗୁହାଲ ତିଆରି ନାଇଁକରି। ଇ ବାବ୍ଦେ ହଲନଭଟା ପଁଚେତ୍ କାର୍ଯ୍ୟନିର୍ବାହୀ ଅଧ୍କାରୀ ଜୟସିଂ ମେହେରକୁଁ ପଚ୍ରାଲାରୁ ଗଁାରେ ଅନେକ ସମସିଆ ରହିଛେ। ସମସିଆର ସମାଧାନ ଲାଗି ଭିନେ ଭିନେ ବିଭାଗକେ ପଁଚେତ୍ରୁ ଚିଠି କରାଯାଇଛେ। ଦିନୁଦିନ୍କେ ସମସିଆର ସମାଧାନ ହେବା ବଲି ସେ କହିଛନ୍। ଇ ଦିଗେ ଜିଲା ପରଶାସନ ଦୁରୁଷ୍ଟି ଦେଇ ପଦକ୍ଷେପ ନେବାକେ ଗଁାର ଦୁଇ ଓ୍ବାର୍ଡ ମେମର ପବିତ୍ର ଶବର, ଧନିଆ ଶବର ସମେତ ଗଁାବାସୀ ଦାବି କରିଛନ୍।
