ଫୁଲବାଣୀ ଅଫିସ, ୭ା୧୨-ଲୋକଙ୍କ ସମସ୍ୟା ସମାଧାନ କରିବାକୁ ହେଲେ ସରକାରଙ୍କୁ ଲୋକଙ୍କ ଆଖିରେ ହିଁ ସମସ୍ୟା ଦେଖିବାକୁ ପଡିବ। ଚାରି କାନ୍ଥ ଭିତରେ ବସି ଯୋଜନା ତିଆରି କରିଦେଲେ ଗ୍ରାମାଞ୍ଚଳରେ ଲୋକଙ୍କର ଉନ୍ନତି ହେବନାହିଁ। ଦୀର୍ଘ ୭୦ ବର୍ଷ ତଳେ ବେକାରି, ଅନୁସୂଚିତ ଜାତି ଓ ପଛୁଆ ବର୍ଗର ବିକାଶ ପାଇଁ ଆମ୍ବେଦକର ଦେଖିଥିବା ସ୍ବପ୍ନ ଆଜି ପର୍ଯ୍ୟନ୍ତ ସାକାର ହୋଇପାରି ନାହିଁ। ସବୁକିଛି ସରକାର ଉପରେ ଛାଡି ନ ଦେଇ ନିଜକୁ ବିକାଶ ପ୍ରକ୍ରିୟାରେ ସାମିଲ କରିବାକୁ ପଡିବ। ତାହା ହେଲେ ଆମର ତଥା ଦେଶର ଉନ୍ନତି ହେବ ବୋଲି ଜାଗ୍ରତ କନ୍ଧମାଳ ପକ୍ଷରୁ ଅନୁଷ୍ଠିତ ଡ. ବି. ଆର୍. ଆମ୍ବେଡକରଙ୍କ ତିରୋଧାନ ଦିବସରେ ମୁଖ୍ୟଅତିଥି ଭାବେ ପୂର୍ବତନ ମନ୍ତ୍ରୀ ବିଜୟ ମହାପାତ୍ର ଯୋଗଦେଇ କହିଥିଲେ।
ସ୍ଥାନୀୟ ବିଜୁ କଲ୍ୟାଣ ମଣ୍ଡପରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମ୍ମାନିତ ଅତିଥି ଭାବେ ଓଡିଶା ଜନ ଅଧିକାର ଅଭିଯାନ ଆବାହକ ବିଜୟ ପରିଡା ଯୋଗଦେଇ ରାମାୟଣଠାରୁ ଭାରତର ସମ୍ବିଧାନ ଅନୁସୂଜିତ ଜାତିର ବ୍ୟକ୍ତିଙ୍କ ଦ୍ୱାରା ଲେଖା ହୋଇଛି। ଜାତିସଂଘରେ କବି ଭୀମ ଭୋଇଙ୍କ କବିତା ମଧ୍ୟ ସଂରକ୍ଷିତ ହୋଇ ରହିଛି। ଦୁର୍ଭାଗ୍ୟର ବିଷୟ ଭାରତବର୍ଷରେ ଆଜି ପର୍ଯ୍ୟନ୍ତ ଅନୁସୂଚିତ ଜାତିର ଲୋକମାନେ ସେମାନଙ୍କ ନାର୍ଯ୍ୟ ଅଧିକାର ହାସଲ କରି ପାରିନାହାନ୍ତି ବୋଲି କହିଥିଲେ। ଅନ୍ୟମାନଙ୍କ ମଧ୍ୟରେ ଜାଗ୍ରତ କନ୍ଧମାଳର ସଭାପତି ପ୍ରଶାନ୍ତ ମହାନ୍ତି, ଶ୍ରମିକ ନେତା ଘନ କୁମାର ଶବର, ଭାଜପା ଜିଲା ସଭାପତି ଲିଙ୍ଗରାଜ ଦଳବେହେରା, ବିଜେଡି ନେତ୍ରୀ ପୁନମ କହଁର, ଯୁବନେତା ଶୁଭେନ୍ଦୁ ମହାନ୍ତି ପ୍ରମୁଖ ବକ୍ତବ୍ୟ ରଖିଥିଲେ। ପୂର୍ବାହ୍ନରେ ସହରରେ ଥିବା ଆମ୍ବେଡକରଙ୍କ ପ୍ରତିମୂର୍ତ୍ତିରେ ମ୍ୟାଲ୍ୟାର୍ପଣ କରାଯାଇଥିଲା। ଏହି ଅବସରରେ ଏକ ଶୋଭାଯାତ୍ରା ସ୍ଥାନୀୟ ମାଦିକୁନ୍ଦା ଛକରୁ ବାହାରି ସହର ପରିକ୍ରମା କରିବା ପରେ ବିଜୁ କଲ୍ୟାଣ ମଣ୍ଡପରେ ପହଞ୍ଚତ୍ଥିଲା। ସଙ୍ଗଠନ ସମ୍ପାଦକ ସତ୍ୟନାରାୟଣ ବେହେରା, ସମ୍ପାଦକ ବିଚିତ୍ରବୀର୍ଯ୍ୟ ପ୍ରଧାନ, ରମେଶ ପ୍ରଧାନ, ସୂର୍ଯ୍ୟ ନାରାୟଣ ବେହେରା ପ୍ରମୁଖ ସହଯୋଗ କରିଥିଲେ।
