କଟକ ଅଫିସ,୨୪ା୧୧- ଡିସେମ୍ବର ୨୨ରେ ହେବାକୁ ଥିବା ଭାରତ-ୱେଷ୍ଟଇଣ୍ଡିଜ ଏକଦିବସୀୟ ଅନ୍ତର୍ଜାତୀୟ କ୍ରିକେଟ ମ୍ୟାଚ୍ ନିମନ୍ତେ କଟକ ଡିସିପି ଅଖିଳେଶ୍ୱର ସିଂ ଶନିବାର ବାରବାଟୀ ଷ୍ଟାଡିୟମର ସ୍ଥିତି ଅନୁଧ୍ୟାନ କରିଛନ୍ତି। ଷ୍ଟାଡିୟମରେ ପୋଲିସ ବ୍ୟବସ୍ଥା କିପରି ରହିବ ସେନେଇ ଡିସିପି ବିଭିନ୍ନ ବରିଷ୍ଠ ପୋଲିସ ଅଧିକାରୀ ଓ ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ପଦାଧିକାରୀଙ୍କ ସହ ଆଲୋଚନା କରିଛନ୍ତି। ଅନ୍ୟପକ୍ଷରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ରୁ ଓସିଏକୁ ପାଣ୍ଠି ଆସିଥିବା ଜଣାପଡ଼ିଛି। ଏହାର ଉପଯୋଗ କରାଯାଇ ଫନୀ ଝଡ଼ରେ ହୋଇଥିବା କ୍ଷୟକ୍ଷତିର ମରାମତି ୧୫ଦିନ ଭିତରେ ଶେଷ କରାଯିବ ବୋଲି ଓସିଏ ସମ୍ପାଦକ ସଞ୍ଜୟ ବେହେରା କହିଛନ୍ତି।
ଡିସିପି ସିଂ ମ୍ୟାଚ୍ ସମୟରେ ଦର୍ଶକଙ୍କ ପାଇଁ ହେବାକୁ ଥିବା ବିଭିନ୍ନ ବ୍ୟବସ୍ଥା ସମ୍ପର୍କରେ ବିଶେଷ ଦୃଷ୍ଟି ଦେଇଥିଲେ। ସୁରକ୍ଷା ବ୍ୟବସ୍ଥା କଡ଼ାକଡ଼ି ଉପରେ ଗୁରୁତ୍ୱ ଦେଇଥିଲେ। ଖେଳାଳିମାନେ ଗେଟ୍ ନଂ-୧୪ ଦେଇ ଷ୍ଟାଡିୟମକୁ ଆସିବେ। ଭୁବନେଶ୍ୱର ପୋଲିସ ଖେଳାଳିଙ୍କୁ ସୁରକ୍ଷିତ ନେବାଆଣିବା ଦାୟିତ୍ୱରେ ରହିବ। କଟକର ଟ୍ରାଫିକ୍ ବ୍ୟବସ୍ଥା କଡାକଡ଼ି କରାଯିବ ବୋଲି ଡିସିପି କହିଥିଲେ। ଷ୍ଟାଡିୟମ ବାହାରେ ବାରିକେଡ୍ ବ୍ୟବସ୍ଥା ନେଇ ମଧ୍ୟ ଆଲୋଚନା ହୋଇଥିଲା। ଏହାଛଡ଼ା ନକଲି ଟିକେଟ ବିକ୍ରି ପ୍ରତି ତୀକ୍ଷ୍ଣ ନଜର ରଖାଯାଇଛି ବୋଲି ଡିସିପି କହିଛନ୍ତି। ଅନ୍ୟପକ୍ଷରେ ପ୍ରସ୍ତୁତି ଆରମ୍ଭ ହୋଇସାରିଛି ବୋଲି ଓସିଏ ସମ୍ପାଦକ ସଞ୍ଜୟ କହିଥିଲେ। ଭାଙ୍ଗିଥିବା କର୍ପୋରେଟ୍ ବକ୍ସ, ପ୍ରେସ୍ ଗ୍ୟାଲେରି, ସ୍ପେଶାଲ ଏନ୍କ୍ଲୋଜର ପ୍ରଭୃତି ସ୍ଥାନ ଆଉ ୧୫ଦିନ ଭିତରେ ମରାମତି ହୋଇଯିବ ବୋଲି ସେ ପ୍ରକାଶ କରିଛନ୍ତି।
୭ ନଂ ଗ୍ୟାଲେରିର ରିପୋର୍ଟକୁ ଅପେକ୍ଷା
ଗ୍ୟାଲେରି ନଂ-୭ର ସିଟ୍ ସଂଖ୍ୟା ୫୨୮୨। ଏହି ଗ୍ୟାଲେରିକୁ ହାତଛଡ଼ା କରିବାକୁ ଚାହୁଁନି ଓସିଏ। ଫନୀରେ ଏହା ଭାଙ୍ଗିଥିବାରୁ ଏହାର ଟିକେଟ ବିକ୍ରି ହେବା ନେଇ କୌଣସି ସ୍ପଷ୍ଟ ସୂଚନା ନାହିଁ। ଏହାର ସ୍ଥିତି କିଭଳି ଅଛି ସେହି ରିପୋର୍ଟକୁ ଅପେକ୍ଷା କରାଯାଇଛି। ଦୁଇଟି ସରକାରୀ ଏଜେନ୍ସି ଗ୍ୟାଲେରି ନଂ-୭ର ଅନୁଧ୍ୟାନ କରି ଫେରିଛନ୍ତି। ସୋମବାର ଦୁଇଟି ଯାକ ଏଜେନ୍ସି ରିପୋର୍ଟ ଦେବା ପରେ ନିଷ୍ପତ୍ତି ନିଆଯିବ ବୋଲି ସମ୍ପାଦକ ସଞ୍ଜୟ କହିଥିଲେ।
