କଟକ ଅଫିସ,୧୦ା୧୨-
ଭାରତ-ଓ୍ବେଷ୍ଟଇଣ୍ଡିଜ ଦିନିକିଆ କ୍ରିକେଟ ମ୍ୟାଚ ପାଇଁ ଆସନ୍ତା ୧୯ ଓ ୨୦ରେ କାଉଣ୍ଟରରେ ଟିକେଟ ବିକ୍ରି ହେବ। କାଉଣ୍ଟରରେ ବିଭିନ୍ନ ଗ୍ୟାଲେରିର ମୋଟ୍ ୧୦,୫୦୦ଟି ଟିକେଟ ଉପଲବ୍ଧ ରହିବ। ଏ ନେଇ ଚଳିତବର୍ଷ ୧୨ଟି କାଉଣ୍ଟର ଖୋଲାଯିବାର ବ୍ୟବସ୍ଥା ହୋଇଛି। ହର୍ସଗେଟ୍ ନିକଟରେ ଖୋଲିବାକୁ ଥିବା ୨ଟି କାଉଣ୍ଟରରେ ସ୍ପେସାଲ ଏନକ୍ଲୋଜର, ନ୍ୟୁ ପ୍ୟାଭିଲିୟନ, କର୍ପୋରେଟ ବକ୍ସ ଓ ଏସି ବକ୍ସ ଟିକେଟ ବିକ୍ରି କରାଯିବା ବେଳେ ଅନ୍ୟ ୧୦ଟି କାଉଣ୍ଟରରେ ବିଭିନ୍ନ ଗ୍ୟାଲେରି ଗୁଡ଼ିକର ଟିକେଟ୍ ବିକ୍ରି କରାଯିବ। ପୂର୍ବରୁ ଅନଲାଇନ ଜରିଆରେ ୮,୧୫୦ଟି ଟିକେଟ ବିକ୍ରି ସରିଛି। ଏଣୁ ଆସନ୍ତା ଅନ୍ତର୍ଜାତୀୟ ମ୍ୟାଚ୍ରେ ମୋଟ୍ ୧୮,୨୦୦ଟିକେଟ ସାଧାରଣ ଦର୍ଶକଙ୍କ ନିମନ୍ତେ ବିକ୍ରି ପାଇଁ ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ଉଦ୍ଦିଷ୍ଟ କରିଛ। ମ୍ୟାଚ୍ ଆୟୋଜନ ନେଇ ସୋମବାର ଅପରାହ୍ନରେ ଓସିଏ ସମ୍ମିଳନୀ କକ୍ଷରେ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଥିଲା। ଓସିଏ ସମ୍ପାଦକ ସଞ୍ଜୟ ବେହେରା ଉପସ୍ଥିତ ରହି ମ୍ୟାଚ ଆୟୋଜନ ନେଇ ସମସ୍ତ ସୂଚନା ଦେଇଥିଲେ। ଏହାଛଡ଼ା ବରିଷ୍ଠ କ୍ରୀଡ଼ା ସଙ୍ଗଠକ ଆଶୀର୍ବାଦ ବେହେରା, ଓସିଏ ସଭାପତି ପଙ୍କଜ ଲୋଚନ ମହାନ୍ତି, ବିଧାୟକ ଚନ୍ଦ୍ରସାରଥୀ ବେହେରା, ବିଧାୟକ ଦେବୀରଞ୍ଜନ ତ୍ରିପାଠୀ, ବିଧାୟକ ସୌଭିକ ବିଶ୍ୱାଳଙ୍କ ସମେତ ଓସିଏର ଅନ୍ୟ ବରିଷ୍ଠ ପଦାଧିକାରୀ ଉପସ୍ଥିତ ଥିଲେ।
୧୬ରେ ଅନୁବନ୍ଧିତ ୟୁନିଟ୍ଙ୍କୁ ଟିକେଟ୍
୧୬ ଓ ୧୭ ତାରିଖରେ ଓସିଏର ଅନୁବନ୍ଧିତ ୟୁନିଟ୍ ଗୁଡ଼ିକୁ ଟିକେଟ ବିକ୍ରି କରାଯିବ। ଅନୁବନ୍ଧିତ ୟୁନିଟ ସମେତ ବିସିସିଆଇ ପ୍ରାୟୋଜକଙ୍କ ପାଇଁ ମୋଟ୍ ୮,୯୪୬ଟିକେଟ୍ ବିକ୍ରି ପାଇଁ ଉଦ୍ଦିଷ୍ଟ କରାଯାଇଛି। ଅନ୍ୟପକ୍ଷରେ ଗ୍ୟାଲେରି ନଂ-୭ ବାଦ୍ ପଡ଼ିବା ଯୋଗୁଁ ବାରବାଟୀ ଷ୍ଟାଡିୟମରେ ଦର୍ଶକ କ୍ଷମତା ୩୮,୮୬୨କୁ ଖସିଛି।
ଗଠନ ହେଲା ବିଭିନ୍ନ କମିଟି
ମ୍ୟାଚ୍କୁ ସୁଚାରୁରୂପେ ପରିଚାଳନା ନିମନ୍ତେ ଓସିଏ ବିଭିନ୍ନ କମିଟି ଓ ସବ୍କମିଟି ଗଠନ କରିଛି। ସାଙ୍ଗଠନିକ କମିଟିରେ ବିଭିନ୍ନ ବିଧାୟକଙ୍କ ସମେତ ଓସିଏର ପଦାଧିକାରୀ ଅଛନ୍ତି। ଏହାଛଡ଼ା ଅଭ୍ୟର୍ଥନା କମିଟି, ପରାମର୍ଶ କମିଟି, ମିଡ଼ିଆ କମିଟି, ପ୍ରେସ ବକ୍ସ ସଂଯୋଜକ କମିଟି, ବିସିସିଆଇ କମିଟି, ବିସିସିଆଇ ବକ୍ସ ସଂଯୋଜକ, ଫ୍ଲଡ ଲାଇଟ୍ ପରିଚାଳନା କମିଟି, ନେଟ୍ ପ୍ରାକ୍ଟିସ ମ୍ୟାନେଜମେଣ୍ଟ, ଟିକେଟ ବଣ୍ଟନ କମିଟି, ଫାଟକ ନିୟନ୍ତ୍ରଣ କମିଟି ଠାରୁ ଆରମ୍ଭ କରି ବିଭିନ୍ନ କମିଟି ଗଠନ କରାଯାଇଛି।
