ଅନୁଗୋଳ ଅଫିସ, ୧୯ା୬
ଲକ୍ଡାଉନ ବେଳେ ଯାତ୍ରୀ ପରିବହନ ସେବା ଚାଲୁ କରିବା ନେଇ ବିଭିନ୍ନ ଆଡ଼ୁ ଦାବି ଉଠୁଥିଲା। ସମୟ ସୁବିଧା ଦେଖି ସରକାର କଟକଣା କୋହଳ କଲେ ଓ ବସ୍ ସେବାକୁ ଅନୁମତି ଦେଲେ। ହେଲେ ଏବେ ବସ୍କୁ ହେଉନାହାନ୍ତି ଯାତ୍ରୀ। କରୋନା ସଂକ୍ରମଣକୁ ଦୃଷ୍ଟିରେ ରଖି ଲୋକେ ଅନ୍ୟତ୍ର ଯିବାକୁ ଇଚ୍ଛା କରୁ ନ ଥିବାରୁ ଅନୁଗୋଳ ଜିଲାରେ ଘରୋଇ ବସ୍ଗୁଡ଼ିକ ପ୍ରାୟତଃ ଚଳାଚଳ କରୁନାହିଁ। ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (ଓଏସ୍ଆର୍ଟିସି) ପକ୍ଷରୁ ଯେଉଁ କେତୋଟି ରୁଟ୍ରେ ବସ୍ ଚଳାଯାଉଛି ସେଥିରେ ତେଲ ଖର୍ଚ୍ଚ ଉଠୁନି। ବହୁ କ୍ଷତି ହେଉଥିବାରୁ ଏବେ ୩ଟି ରୁଟ୍ ମଧ୍ୟରୁ ଗୋଟିଏରେ ବସ୍ ଚଳାଚଳକୁ ବନ୍ଦ କରାଯାଇଛି। ଓଏସ୍ଆର୍ଟିସି ଅନୁଗୋଳ ୟୁନିଟ୍ ଇନ୍ଚାର୍ଜ ମାଗୁଣି ମହାନ୍ତିଙ୍କ କହିବା ଅନୁଯାୟୀ, ଗତ ୮ ତାରିଖ ଠାରୁ ରାଜ୍ୟରେ ଓଏସ୍ଆର୍ଟିସିର ବସ୍ ସେବା ଆରମ୍ଭ ହୋଇଛି। ଅନୁଗୋଳ ୟୁନିଟ୍କୁ ୩ଟି ରୁଟ୍ ଜୟପୁର, ବାରିପଦା ଓ ଫୁଲବାଣୀକୁ ବସ୍ ଚଳାଇବାକୁ ଅନୁମତି ମିଳିଥିଲା। କିନ୍ତୁ ଫୁଲବାଣୀ ରୁଟ୍ରେ ଆଦୌ ଯାତ୍ରୀ ନ ହେବାରୁ ଏହାକୁ ବନ୍ଦ କରି ଦିଆଯାଇଛି। ଜୟପୁରକୁ ଯାଉଥିବା ଗାଡ଼ିରେ ମଧ୍ୟ ଯାତ୍ରୀ ହେଉନାହାନ୍ତି। ଏବେ ସେହି ରୁଟ୍ରେ ପ୍ରାୟ କ୍ଷତି ସହିବାକୁ ପଡ଼ୁଛି। ବାରିପଦା ଯାଉଥିବା ବସ୍ର ମଧ୍ୟ ସମାନ ଅବସ୍ଥା। କେବେ କେମିତି ଯାତ୍ରୀ ହେଲେ ସେଦିନର ତେଲ ଖର୍ଚ୍ଚ ଉଠୁଛି ନ ହେଲେ ହାତରୁ ଭରଣା କରିବାକୁ ପଡ଼ୁଛି। ତେଲ ଓ ମରାମତି ଖର୍ଚ୍ଚ ଉଠିଗଲେ ଗାଡ଼ି ଚଳାଚଳରେ କୌଣସି ଅସୁବିଧା ହୁଅନ୍ତା ନାହିଁ। ଯଦି ଏହି ଖର୍ଚ୍ଚ ନ ଉଠିବ ତାହେଲେ ବସ୍ ଚଳାଚଳ ସମ୍ଭବ ନୁହେଁ ବୋଲି ମହାନ୍ତି ପ୍ରକାଶ କରିଛନ୍ତି। ଅନ୍ୟପକ୍ଷରେ ଘରୋଇ ବସ୍ ଚଳାଚଳ ଏ ପର୍ଯ୍ୟନ୍ତ ସ୍ବାଭାବିକ ହୋଇପାରୁନି। ଜିଲା ମଧ୍ୟରେ କଁା ଭଁା ବସ୍ ଚାଲିଥିବାବେଳେ ଯାତ୍ରୀ ନ ଥିବାରୁ ବାହାର ଜିଲାକୁ ଗାଡ଼ି ଗଡ଼ୁନାହିଁ। ଏମିତିକି ଗାଡ଼ି ଚଳାଇବାକୁ ଆସୁଥିବା ଚାଳକଙ୍କୁ ଆଉ ଗଁା ଲୋକେ ସେଠାକୁ ଫେରିବାକୁ ଅନୁମତି ଦେବାକୁ ରାଜି ହେଉନାହାନ୍ତି। ତେଣୁ ବସ୍ ଚଳାଚଳ ସ୍ବାଭାବିକ ହେବାକୁ ଆହୁରି ସମୟ ଲାଗିବ ବୋଲି ଘରୋଇ ବସ୍ ମାଲିକ ପକ୍ଷରୁ ସୂଚନା ମିଳିଛି।
