ଭୁବନେଶ୍ୱର,୧୯।୫(ବ୍ୟୁରୋ): ରାଜଧାନୀରେ ପୁଣି ଅସାମାଜିକ ଯୁବକଙ୍କ ଆତଙ୍କରାଜ ଦେଖିବାକୁ ମିଳିଛି। ବଟି ନ ଦେବାରୁ ସମ୍ପୃକ୍ତ ଯୁବକମାନେ ଖଣ୍ଡା ଧରି ବ୍ୟବସାୟୀମାନଙ୍କୁ ଭୟଭୀତ କରାଇବା ସହ ଗୋଡ଼ାଇ ହାଣିଛନ୍ତି। ଭରତପୁର ଥାନା ଅନ୍ତର୍ଗତ ନୂଆଗାଁରେ ବୁଧବାର ରାତିରେ ଏଭଳି ଘଟଣା ଘଟିଛି। ଆକ୍ରମଣର ସିସିଟିଭି ଫୁଟେଜ୍ ସାମାଜିକ ଗଣମାଧ୍ୟମରେ ଭାଇରାଲ ହେଉଛି। ଏହି ଆକ୍ରମଣରେ ଇଲେଟ୍ରୋନିକ୍ସ ଦୋକାନୀ ରାକେଶ ମୁଦୁଲିଙ୍କ ସମେତ ୫ରୁ ଉର୍ଦ୍ଧ୍ୱ ବ୍ୟକ୍ତି ଆହତ ହୋଇଛନ୍ତି। ଅନ୍ୟ ଆହତମାନଙ୍କ ମଧ୍ୟରେ ନିତେଶ କୁମାର ସିଂ, ଆଲୋକ ବେହେରା, ସୋମନାଥ ବେହେରା, ସୁବ୍ରତ ବେହେରା ପ୍ରମୁଖ ରହିଛନ୍ତି। ଏହି ଘଟଣାରେ ପୋଲିସ ୨ ଯୁବକଙ୍କୁ ଗିରଫ କରିଛି। ସେମାନେ ହେଲେ ସ୍ଥାନୀୟ ଥାନା ଅନ୍ତର୍ଗତ ଶ୍ୟାମପୁରର ତୋଫାନ କୁମାର ଦାସ ଓ ଅବିନାଶ ବେହେରା। ପୋଲିସ ଏନେଇ ଏକ ମାମଲା (ନଂ. ୨୨୦/୨୩) ରୁଜୁ କରିଛି। ଗିରଫ ଅଭିଯୁକ୍ତଦ୍ୱୟଙ୍କୁ ଗୁରୁବାର କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ପ୍ରତ୍ୟକ୍ଷଦର୍ଶୀମାନେ କହିଛନ୍ତି, ବୁଧବାର ରାତି ପ୍ରାୟ ୯ଟା ୧୦ ବେଳେ ଦୁଇଟି ବାଇକରେ ୫ଜଣ ଯୁବକ ହାତରେ ଖଣ୍ଡା ଓ ଭୁଜାଲି ଧରି ଆସିଥିଲେ। ସେମାନେ ବୁଲିବୁଲି ଦୋକାନୀଙ୍କୁ ବଟି ମାଗିଥିଲେ। ଯିଏ ଟଙ୍କା ଦେଉ ନ ଥିଲେ ସେମାନଙ୍କୁ ଧମକଚମକ ଦେବା ସହ ଗାଳିଗୁଲଜ କରିଥିଲେ। ରାକେଶ ନାମକ ବ୍ୟବସାୟୀ ବଟି ଦେବାକୁ ଅରାଜି ହେବାରୁ ତାଙ୍କୁ ଧମକଚମକ ଦେଇଥିଲେ। ପରେ ସେମାନଙ୍କୁ ଖଣ୍ଡା ଓ ଭୁଜାଲିରେ ଆକ୍ରମଣ କରିଥିଲେ। ଅଭିଯୋଗକାରୀ ମୁନା ମୁଦୁଲିଙ୍କ ବେକରୁ ଚେନ ଓ ପାଖରେ ଥିବା ଟଙ୍କା ନେଇ ଯୁବକମାନେ ପଳାଇଥିବା ଅଭିଯୋଗ ହୋଇଛି। ଅନ୍ୟ ଜଣେ ଦୋକାନୀ କହିଛନ୍ତି, ଘଟଣା ବିଷୟରେ ପୋଲିସକୁ ତୁରନ୍ତ ଖବର ଦେଇଥିଲୁ। ହେଲେ ପୋଲିସ ଘଣ୍ଟାଏ ବିଳମ୍ବରେ ପହଞ୍ଚତ୍ଥିଲା। ପୋଲିସ ଆଗରେ ସେମାନେ ତାଙ୍କୁ ଆକ୍ରମଣ କରିଥିବା ଦୋକାନୀ ଜଣଙ୍କ ଅଭିଯୋଗ କରିଛନ୍ତି। ଦୁର୍ବୃତ୍ତଙ୍କ ହାତରେ ମାରଣାସ୍ତ୍ର ଥିବାରୁ ଭୟରେ ପୋଲିସ ହସ୍ତକ୍ଷେପ କରି ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ତେବେ ସବୁଠୁ ବଡ଼ କଥା ହେଲା, ରାତି ମାତ୍ର ୯ଟାରେ ସମ୍ପୃକ୍ତ ଯୁବକମାନଙ୍କ ଏଭଳି କାଣ୍ଡ ଘଟାଇବାକୁ ନେଇ ସ୍ଥାନୀୟ ଅଞ୍ଚଳର ଲୋକେ ଭୟଭୀତ ହୋଇପଡ଼ିଛନ୍ତି। ସେହିପରି ଏହି ଘଟଣା ସହରବାସୀଙ୍କ ସୁରକ୍ଷାକୁ ନେଇ ପ୍ରଶ୍ନ ସୃଷ୍ଟି କରିଛି। ଅନ୍ୟପଟେ ରାଜଧାନୀରେ ସେଫ୍ ସିଟି ଡ୍ରାଇଭ ଅଭିଯାନ କ୍ରମରେ କମିଶନରେଟ ପୋଲିସ ପକ୍ଷରୁ କରାଯାଉଥିବା ପାଟ୍ରୋଲିଂକୁ ନେଇ ମଧ୍ୟ ପ୍ରଶ୍ନବାଚୀ ସୃଷ୍ଟି ହୋଇଛି। ଫେରାର ଥିବା ଅନ୍ୟ ଅଭିଯୁକ୍ତଙ୍କୁ ଧରିବା ଲାଗି ପୋଲିସ ଉଦ୍ୟମ ଚଳାଇଛି।
