ପାତ୍ରପୁର,୨୦ା୩ (ଡି.ଏନ୍.ଏ.) – ପାତ୍ରପୁର ବ୍ଲକର ବିଭିନ୍ନ ସ୍ଥାନରେ ଗୁରୁବାର ଘଡ଼ଘଡ଼ି ସହ ପ୍ରବଳ ବର୍ଷା ଓ କୁଆପଥର ବୃଷ୍ଟି ହୋଇଛି। ବଣଶୋଳା ଗ୍ରାମ ବଡ଼ସାହିରେ ଥିବା ପାଣ୍ଡୁରଙ୍ଗା ବିଷ୍ଣୁ ମନ୍ଦିର ଉପରେ ବଜ୍ରପାତ ହେବାରୁ ମନ୍ଦିର ଚୂଡ଼ା ଭାଙ୍ଗି ତଳକୁ କସି ପଡିଛି। ସେହିଭଳି ତାଳପଡାରେ ନଡିଆ ଗଛ ଜଳିଯାଇଥିବା ଜଣାପଡିଛି। ବ୍ଲକର ଖାରିଆଗୁଡା, ଗୁଣ୍ଡୁରା, ମନ୍ଦରଡା, ସୁରଙ୍ଗି, ପାତ୍ରପୁର, ଜରଡା, ସାମନ୍ତିଆପଲ୍ଲୀ, କେଲୁଆ ପ୍ରମୁଖ ଅଞ୍ଚଳରେ ବର୍ଷାସହ କୁଆପଥର ବୃଷ୍ଟି ହୋଇଥିଲା। ଅନ୍ୟପଟେ ବାଘଲଟି ଜଳ ଭଣ୍ଡାରର ଉପର ମୁଣ୍ଡ ପାହାଡରେ ପ୍ରବଳ ବର୍ଷା ହୋଇଥିବାରୁ ଜଳଭଣ୍ଡାରର ଜଳସ୍ତର ବଢିଛି। କୌଣସି ମୁହୁର୍ତ୍ତରେ ନଦୀକୁ ପାଣି ଛଡାଯାଇପାରେ ବୋଲି ବାଘଲଟି ଜଳଭଣ୍ଡାର ନିର୍ବାହୀ ଯନ୍ତ୍ରୀ ଇଂ. ସଂଞ୍ଜୀବ କୁମାର ଦାସବର୍ମା ସୂଚନା ଦେଇଛନ୍ତି। ନଦୀ ମଧ୍ୟକୁ ଯିବାକୁ ବାରଣ କରାଯାଇଛି। କରୋନାକୁ ନେଇ ଜନସାଧାରଣ ଭୟଭୀତ ଥିବାବେଳେ ବଜ୍ରପାତରେ ମନ୍ଦିର ନୀଳଚକ୍ର ଭାଙ୍ଗିବାରୁ ଗ୍ରାମବାସୀଙ୍କ ମନରେ ଛନକା ପଶିଛି।
