ପ୍ୟାରିସ, ୭ା୯ (ଏଏଫ୍ପି)-କାମେରୁନ୍ର ୪ଥର ଆଫ୍ରିକାନ ପ୍ଲେୟର ଅଫ୍ ଦି ଇୟର ସାମୁଏଲ ଇଟୋ ଶନିବାର ଫୁଟ୍ବଲରୁ ଅବସର ଘୋଷଣା କରିଛନ୍ତି। ୩୮ବର୍ଷୀୟ ଏହି ଷ୍ଟ୍ରାଇକର ତାଙ୍କ କ୍ୟାରିୟରରେ ବାର୍ସିଲୋନା, ଇଣ୍ଟର ମିଲାନ ଏବଂ ଚେଲ୍ସି ଦଳ ତରଫରୁ ପ୍ରତିନିଧିତ୍ୱ କରିଛନ୍ତି। ୨୦୦୪ରୁ ୨୦୦୯ ପର୍ଯ୍ୟନ୍ତ ୫ ବର୍ଷ ଧରି ବାର୍ସିଲୋନା ଦଳ ସହିତ ତାଙ୍କ ପ୍ରଦର୍ଶନ ଉଲ୍ଲେଖନୀୟ ଥିଲା। ଇଣ୍ଟର ମିଲାନରେ ଯୋଗ ଦେବା ପୂର୍ବରୁ ଏହି ଦଳ ସହିତ ସେ ଦୁଇଥର ଚାମ୍ପିୟନ୍ସ ଲିଗ୍ ଏବଂ ୩ଥର ଲା ଲିଗା ଟାଇଟଲ ଜିତି ସାରିଥିଲେ। ରୁଷିଆର ଆନ୍ଝି ମାଖାଚ୍କାଲା ଦଳରେ ଯୋଗଦାନ ପୂର୍ବରୁ ସେ ଇଟାଲୀରେ ଜୋସ୍ ମାରିନୋ ଟିମ୍ ସହିତ ଚାମ୍ପିୟନ୍ସ ଲିଗ୍, ସିରି ଏ’ ଏବଂ କୋପା ଇଟାଲିଆ ଟାଇଟଲ ଜିତିଛନ୍ତି। ଗତବର୍ଷ ପ୍ରିମିୟର ଲିଗ୍ରେ ସେ କିଛି ସମୟ ଚେଲ୍ସି ଓ ଏଭରଟନ ଦଳ ସହିତ ଖେଳିଛନ୍ତି। କେବଳ ସେତିକି ନୁହେଁ ଏହା ପୂର୍ବରୁ ତୁର୍କୀଶ ଦଳ କୋନ୍ୟାସ୍ପର ଏବଂ ତାଙ୍କ ଅନ୍ତିମ କ୍ଲବ କାତାର ଲିଗ୍ ଦଳ କାତାର ସ୍ପୋଟର୍ସ କ୍ଲବ ତରଫରୁ ପ୍ରତିନିଧିତ୍ୱ କରିଛନ୍ତି। ଇଟୋ କାମେରୁନ୍ ଦଳ ସହିତ ଆଫ୍ରିକା କପ୍ ଅପ୍ ନେଶନ୍ସ ଜିତିବା ସହ ୨୦୦୦ ଅଲିମ୍ପିକ ସ୍ବର୍ଣ୍ଣ ଜିତିପାରିଛନ୍ତି।
