ସାରବ୍ରୁକେନ(ଜର୍ମାନୀ),୩।୧୧- ଦେଶର ଉଦୀୟମାନ ବ୍ୟାଡ୍ମିଣ୍ଟନ ଖେଳାଳି ଲକ୍ଷ୍ୟ ସେନ୍ ଅନ୍ୟ ଭାରତୀୟ ଖେଳାଳି କିରେନ ଜର୍ଜଙ୍କୁ ୨୧-୧୩, ୧୪-୨୧, ୨୧-୯ ଗେମ୍ରେ ହରାଇ ଏଠାରେ ଚାଲିଥିବା ସାରଲରଲକ୍ସ ଓପନ ଟୁର୍ନାମେଣ୍ଟର ଫାଇନାଲରେ ପ୍ରବେଶ କରିଛନ୍ତି। ୮ମ ସିଡ୍ ଲକ୍ଷ୍ୟଙ୍କୁ ମ୍ୟାଚ୍ ଜିତିବା ପାଇଁ ମାତ୍ର ୩୭ ମିନିଟ୍ ସମୟ ଲାଗିଥିଲା। ଉଭୟ ଭାରତୀୟ ଖେଳାଳି ୫ ଥର ପରସ୍ପରକୁ ଏପର୍ଯ୍ୟନ୍ତ ଭେଟିଥିଲେ ହେଁ ସବୁଥର ଲକ୍ଷ୍ୟ ବିଜୟୀ ହୋଇଛନ୍ତି। ଅନ୍ୟପକ୍ଷରେ ବିଶ୍ୱର ୧୫୬ତମ ର଼୍ୟାଙ୍କପ୍ରାପ୍ତ ଜର୍ଜ ଚଳିତ ଟୁର୍ନାମେଣ୍ଟର ସେମିଫାଇନାଲ ପୂର୍ବରୁ ସମସ୍ତ ମ୍ୟାଚ୍କୁ ସିଧାସଳଖ ଗେମ୍ରେ ଜିତିଥିଲେ। ତାଙ୍କୁ ହରାଇ ୫୧ତମ ର଼୍ୟାଙ୍କ୍ଧାରୀ ଲକ୍ଷ୍ୟ ସିନିୟର ବର୍ଗରେ ଭଲ ପ୍ରଦର୍ଶନ ଜାରି ରଖିଛନ୍ତି। ୧୮ ବର୍ଷୀୟ ଖେଳାଳି କ୍ରମାଗତ ଦ୍ୱିତୀୟ ସୁପର ୧୦୦ ଟାଇଟଲ ଜିତିବା ଆଶାରେ ରହିଛନ୍ତି। ସେ ଗତ ଅକ୍ଟୋବରରେ ଡଚ୍ ଓପନ୍ ଜିତିଥିଲେ।
