ନାଉଗଁା,୧୨ା୨(ସ୍ବ.ପ୍ର.): ବିଦ୍ୟାଳୟରେ ଶୈକ୍ଷିକ ବାତାବରଣକୁ ସରସ, ସୁନ୍ଦର କରିବା ସହିତ ପିଲାଙ୍କ ମସ୍ତିଷ୍କକୁ ଶୃଙ୍ଖଳିତ ରଖିବା ପାଇଁ ଦୈନିକ ପ୍ରାର୍ଥନା କରାଯାଇଥାଏ। ଏହି ପ୍ରାର୍ଥନାରେ କେବଳ ପିଲାମାନେ ନୁହନ୍ତି ଶିକ୍ଷୟିତ୍ରୀଶିକ୍ଷକ ମଧ୍ୟ ଭାଗ ନେଇଥାନ୍ତି। କିନ୍ତୁ ପ୍ରାର୍ଥନା ସମୟରେ କିଛି ପିଲା ବିଦ୍ୟାଳୟ ପରିସର, ବାହାର, ଶ୍ରେଣୀ ଗୃହ ସଫା କରିବା ସହିତ ମଧ୍ୟାହ୍ନଭୋଜନ ପାଇଁ ଥାଳି ସଜେଇ ରଖୁଛନ୍ତି। ନାଉଗଁା ବ୍ଲକର ମାରେଡା ଉଚ୍ଚ ପ୍ରାଥମିକ ବିଦ୍ୟାଳୟରେ ମଙ୍ଗଳବାର ଏପରି ଦୃଶ୍ୟ ଦେଖିବାକୁ ମିଳିଛି। ଯାହାକୁ ନେଇ ଅଭିଭାବକଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି।
ପ୍ରଶ୍ନଉଠୁଛି ଯଦି ପିଲାଙ୍କ ଦ୍ୱାରା ଏସବୁ କରାଯାଉଛି ତେବେ ପ୍ରାର୍ଥନା ପୂର୍ବରୁ କାହିଁକି କରାଯାଉ ନାହିଁ। ମଧ୍ୟାହ୍ନଭୋଜନ ଦାୟିତ୍ୱରେ ସ୍ବୟଂ ସହାୟିକା ଗୋଷ୍ଠୀ ଥିବାବେଳେ ପିଲାମାନେ କାହିଁକି ଥାଳି ସଜାଡି ରଖୁଥିଲେ ତାହା ମଧ୍ୟ ପ୍ରଶ୍ନବାଚୀ ସୃଷ୍ଟି କରିଛି। କେବଳ ଉକ୍ତ ବିଦ୍ୟାଳୟ ନୁହେଁ ବ୍ଲକର ଅନେକ ବିଦ୍ୟାଳୟରେ ଖୋଲାଖୋଲି ଭାବେ ସରକାରୀ ନିୟମ ଉଲଂଘନ କରାଯାଉଥିବା ଅଭିଯୋଗ ହୋଇଛି। କିଛି ଦିନ ତଳେ ବଚ୍ଛାଳୋ ଉଚ୍ଚ ପ୍ରାଥମିକ ବିଦ୍ୟାଳୟରେ ଗୋଟିଏ ଦିନରେ ୫ ଶିକ୍ଷକ ଛୁଟିରେ ରହିବା ଓ ପ୍ରାଧନଶିକ୍ଷୟିତ୍ରୀ ଶ୍ରେଣୀ ଗୃହରେ ଶୋଇବା ଆଦି ଘଟଣା ଗଣମାଧ୍ୟମରେ ପ୍ରକାଶ ପାଇଥିଲା। ଏହି ଘଟଣାଉପରେ ବିଭାଗ ପକ୍ଷରୁ ଆଖିଦୃଶିଆ ପଦକ୍ଷେପ ହେଉ ନ ଥିବାରୁ ଶିକ୍ଷା ବିଭାଗର ସ୍ବଚ୍ଛତା ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି। ଏପରି କି ବିଭାଗ ଶିକ୍ଷକଙ୍କୁ ଘଣ୍ଟ ଘୋଡାଉଥିବା ଅଭିଯୋଗ କରାଯାଇଛି। କେତେଜଣ ଶିକ୍ଷକଙ୍କ ଏପରି କାର୍ଯ୍ୟ ଯୋଗୁ ବିଦ୍ୟାଳୟରେ ଶୈକ୍ଷିକ ବାତାବରଣ ନଷ୍ଟ ହେବା ସହିତ ପିଲା ବିଶୃଙ୍ଖଳିତ ହେଉଥିବା ଚର୍ଚ୍ଚା ହେଉଛି। ତେଣୁ ଏପରି କାର୍ଯ୍ୟ କରାଉଥିବା ଶିକ୍ଷକଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି। ଏ ସମ୍ପର୍କରେ ଉକ୍ତ କ୍ଲଷ୍ଟରରେ ଥିବା ସିଆରସିସି ରୁଦ୍ରପ୍ରସାଦ ସ୍ବାଇଁଙ୍କୁ ପଚାରିବାରେ ପିଲାମାନେ ପ୍ରର୍ଥନା ପୂର୍ବରୁ ବିଦ୍ୟାଳୟ ସଫା କରୁଥିବା ସେ ପ୍ରକାଶ କରିଥିଲେ। ପ୍ରଧାନଶିକ୍ଷକ ବେଣୁଧର ଦାସଙ୍କୁ ପଚାରିବାରେ ସେ ଏ ପସଙ୍ଗକୁ ଏଡ଼ାଇ ଦେଇଥିଲେ। ଏହା ମିଥ୍ୟା ବୋଲି କହିଥିଲେ। ଏ ବିଷୟରେ ବ୍ଲକ ଅତିରିକ୍ତ ଶିକ୍ଷାଧିକାରୀ ଅକ୍ଷୟ ବେହେରାଙ୍କୁ ପଚାରିବାରେ ଘଟଣାର ତଦନ୍ତ କରାଯାଇ କାଯର୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଥିଲେ। ଏବେ ଦେଖିବାକୁ ଅପେକ୍ଷା କେବେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।
