ଅମରପାଲି, ୧୩।୩ (ଡି.ଏନ୍.ଏ.)- ନିଜର ଅଂଚଲରେ ବହପୁଥିବାର କିଡ୍ନୀ ରୋଗ୍ର ପରତିକାର ଆର ନିରମଲ ପିଇଲା ପାଏନ୍ ଯୁଗେଇ ଦେବାକେ ମାର୍ଚ୍ଚ ୩ ତାରିଖ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିକୁଁ ଚିଠି ଲେଖିଥିଲେ ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅଧୀନ ଅମରପାଲି ଗଁ।ର ପ୍ରାଣବନ୍ଧୁ ସାହୁକଁର ଦୁଇ ଝି’ ଇପ୍ସିତା ଅନନ୍ୟା(୧୧) ଆର ଆରାଧ୍ୟା ଅନୁଭା(୭)। ଇ ଖବର ଜାନଲା ଉତାରୁ ବୁଧୁବାର ବେଲବୁଡ଼େ ଦୁଇ ବହେନ୍କର ଘରେ ପୁହୁଁଚିଥିଲା ଆରଡବ୍ଲୁଏସ୍ଏସ୍ ବିଭାଗର ଗୁଟେ ଦଲ୍। ଇ ବାବ୍ଦେ ଦୁଇ ବହେନ୍, ତାକର ବାପା ଆର ଥାନୀଅ ସମିତି ସଭିଅ, ଗଁାବାସୀକର ସଂଗେ ଆଲୋଚନା କରିଥିଲା ବିଭାଗ। ଇତାର ବାହାରେ ଅମରପାଲି ଗଁାର ନଲ୍ଚୁଅଁାମାନକରୁ ପାଏନ୍ ନମୁନା ଠୁଲେଇ ପରୀକ୍ଷା ଲାଗି ପଠେଇଥିଲା ଗ୍ରାମ୍ୟ ଜଳଯୋଗାଣ ବିଭାଗ।
ସୂଚନା ଅନ୍ସାରେ ବୀରମହାରାଜପୁର ବ୍ଳକ ଅମରପାଲି ଗଁାର ପ୍ରାଣବନ୍ଧୁ ସାହୁକଁର ଦୁଇ ଝି’ ଇପ୍ସିତା ଅନନ୍ୟା(୧୧) ଆର ଆରାଧ୍ୟା ଅନୁଭା(୭) ପ୍ରଧାନମନ୍ତ୍ରୀ ନରେନ୍ଦ୍ର ମୋଦିକୁଁ ଗୁଟେ ଚିଠି ଲେଖିଥିଲେ। ଚିଠିରେ ସେମାନେ ବୀରମହାରାଜପୁର ବ୍ଲକର ବହଳପଦର ଆର ଦୁର୍ଜନତୈଳା ପଁଚେତ୍ର ଅମରପାଲି, ଦାଦରପାଲି ଲେଖେଁ ଆସରପାସର ଗଁାମାନକେ କିଡ୍ନୀ ରୋଗ ବହପୁଛେ ବଲି ଲେଖିଛନ୍। ଚିକିଛିତ ହେଉଥିବାର ରୁଗୀମାନକୁ ଡାକ୍ତର ପିଇଲା ପାଏନ୍ ଲାଗି ଇ ରୋଗ୍ ବହପୁଥିବାର କହୁଛନ୍। ଇଥିରଲାଗି ଅଂଚଲରେ ଅନେକ ଲୋକ୍ ରୋଗ୍ରେ ପଡ଼ି ମରିଥିଲାବେଲେ ଶତାଧିକ୍ ଲୋକ୍ ଆକ୍ରଁାତ ହେଇ ଚିକିଛିତ ହେଉଛନ୍। ଦୁଇ ବହେନ୍ ଇ ଘଟନା ଖବର କାଗଜରୁ ଜାନବାର ସଂଗେ ନିଜର ଅଁାଖିରେ ରୁଗୀକଁର ଗୁଲ୍ଗୁଲା ଦେଖି ପରତିକାର ବେବସ୍ତା ଲାଗି ସେମାନେ ପ୍ରଧାନମନ୍ତ୍ରୀକୁଁ ଚିଠି ଲେଖିଥିଲେ। ଇ ଖବର ପାଏଲା ଉତାରୁ ଆରଡବ୍ଲୁଏସ୍ଏସ୍ ବିଭାଗର ନିର୍ବାହୀ ଯନ୍ତ୍ରୀ ବିପିନବିହାରୀ ଦାଶକଁର ମଂଗୁଆଲତିରେ ଗୁଟେ ଦଲ ଆସି ଅମରପାଲି ଗଁାରୁ ପାଏନ୍ ନମୁନା ପରୀକ୍ଷା ଲାଗି ଠୁଲେଇଛନ୍। ଇ ଦଲରେ ବିଭାଗୀୟ କନିଷ୍ଠ ଯନ୍ତ୍ରୀ ସମିର ସୋରେଙ୍ଗ, ଲାବୋରେଟୋରୀ ଆସିଷ୍ଟାଣ୍ଡ ମୁନିତା ଠାକୁର, ବିଶ୍ୱାମିତ୍ର ପୂଜାହାରୀ ପରମୁଖ ଗଁାକେ ଆସିଥିଲେ। ପାଏନ୍ ଲାଗି ଇ ରୋଗ୍ ହେଉଛେ କି କିଛି ଅଲଗ କାରନ୍ ଅଛେ ପାଏନ୍ ପରୀକ୍ଷାରୁ ଜନାପଡ଼ବା ବଲି ନିର୍ବାହୀ ଯନ୍ତ୍ରୀ ଦାଶ କହିଛନ୍। ଇତାର ବାହାରେ ସେମାନେ ଗଁାବାସୀକର ସଂଗେ ପିଇଲା ପାଏନ୍ ସମସିଆ ଉପରେ ଆଲୋଚନା କରିଥିଲେ। ସମିତି ସଭିଅ ପୀତାମ୍ବର ସାହୁ, ଗଁା ସୁଆସ୍ତିଅ ସମୀକ୍ଷକ ଚନ୍ଦ୍ରଶେଖର ପତି, ଅଶୋକ ସାହୁ, ସୁରେନ୍ଦ୍ର ଷାଣ୍ଢ, ବିମ୍ବାଧର ସାହୁ, ତନ୍ମୟ ପତି, ସନ୍ତୋଷ ପଧାନ, ଜ୍ଞାନରଞ୍ଜନ ସାହୁ ପରମୁଖ ବିଭାଗୀୟ ଅଧ୍କାରୀକଁର ସଂଗେ ଆଲୋଚନା କରିଥିଲେ। ଇତାର ସଂଗେ ଗଁାରେ ଅଚଲ ହେଇ ପଡ଼ିଥିବାର ନଲ୍ଚୁଅଁା ମରାମତି ନାଇଁ ହେଉଥିବାର, ଠିକ୍ ହିସାବେ ପିଇଲା ପାଏନ୍ ପ୍ରକଳ୍ପ ନାଇଁ ଚାଲୁଥିବାର, ପାଇପ ଲାଇନ ଫାଟିଥିଲେ ବି ମରାମତି ନାଇଁ ହେଉଥିବାର ଘଟନା ସବୁକେ ନେଇ ଲୋକ ଅଭିଯୋଗ କରିଥିଲେ। ନିର୍ବାହୀ ଯନ୍ତ୍ରୀ ଦାଶ ଯେତେ ଜଲଦି ହେବା ନଲ୍ଚୁଅଁା ସବୁ ମରାମତି ସଂଗେ ପାଇପ୍ ଲାଇନ୍ ମରାମତି କରବାକେ ଗଁାବାସୀକୁ କଥା ଦେଇଥିଲେ।
