ପିଏଚ୍‌ଡି କରୁଛନ୍ତି ପୂର୍ବତନ ମୁଖ୍ୟମନ୍ତ୍ରୀ
5:25 pmSeptember 22, 2022 / 07

ଚଣ୍ଡିଗଡ,୨୨।୯: ପଞ୍ଜାବର ପୂର୍ବତନ ମୁଖ୍ୟମନ୍ତ୍ରୀ ଚରଣଜିତ ସିଂ ଚାନ୍ନି ଆଜିକାଲି ଆମେରିକାରେ ତାଙ୍କର ପିଏଚଡି ଥେସିସ୍‌ ଲେଖୁଛନ୍ତି। ବିଧାନସଭା ନିର୍ବାଚନ ଫଳାଫଳ ଘୋଷଣା ହେବାର ପ୍ରାୟ ଦୁଇ ମାସ ପରେ ଚାନ୍ନି ମାର୍ଚ୍ଚ ୧୦ରେ ଭାରତ ଛାଡିଥିଲେ। ତାଙ୍କ ଦଳର ସହକର୍ମୀମାନେ ମଧ୍ୟ ଚାନୀଙ୍କ ଭବିଷ୍ୟତ ଯୋଜନା ବିଷୟରେ ଜାଣି ନ ଥିଲେ।
୨୦୦୪ ମସିହାରୁ ଚାନ୍ନି ‘ଭାରତୀୟ ଜାତୀୟ କଂଗ୍ରେସ କେନ୍ଦ୍ରୀୟ ସଂଗଠନ ଏବଂ ନିର୍ବାଚନ ରଣନୀତି’ ଉପରେ ଦୀର୍ଘ ଦିନ ହେବ ପଞ୍ଜାବ ବିଶ୍ୱବିଦ୍ୟାଳୟରୁ ପିଏଚଡି କରୁଛନ୍ତି। ଚାନ୍ନିଙ୍କ ସାନଭାଇ ମନୋହର ସିଂ କହିଛନ୍ତି, ସେ ସବୁବେଳେ ରାଜନୀତିରେ ବ୍ୟସ୍ତ ଥିଲେ ଏବଂ ଅଧ୍ୟୟନ ପାଇଁ ସମୟ ପାଇ ନ ଥିଲେ। ସେ ବର୍ତ୍ତମାନ ଆମେରିକାରେ ରହି ତାଙ୍କର ପିଏଚଡି ଥେସିସ ପ୍ରସ୍ତୁତ କରୁଛନ୍ତି। ସେ ଆସନ୍ତା ମାସରେ ଭାରତ ଫେରିବାକୁ ଯୋଜନା କରିଛନ୍ତି।
ସୂଚନାଯୋଗ୍ୟ, ସେପ୍ଟେମ୍ବର ୨୦୨୧ରେ ପଞ୍ଜାବର ପ୍ରଥମ ଦଳିତ ମୁଖ୍ୟମନ୍ତ୍ରୀ ହୋଇଥିଲେ ଚରଣଜିତ୍‌ ସିଂ ଚାନ୍ନି। ଚାନ୍ନିଙ୍କୁ ମୁଖ୍ୟମନ୍ତ୍ରୀ ଭାବରେ ନିଯୁକ୍ତ କରିବା ଗାନ୍ଧୀ ପରିବାର ଦ୍ୱାରା ଏକ ମାଷ୍ଟରଷ୍ଟ୍ରୋକ ଭାବରେ ଦେଖାଯାଇଥିଲା। କିନ୍ତୁ ନିର୍ବାଚନରେ କଂଗ୍ରେସ ଶୋଚନୀୟ ପରାସ୍ତ ହୋଇଥିଲା। ଚାନ୍ନି ନିଜେ ପ୍ରତିଦ୍ୱନ୍ଦ୍ୱିତା କରିଥିବା ଉଭୟ ଆସନରୁ ପରାସ୍ତ ହୋଇଥିଲେ।