ନୂଆଦିଲ୍ଲୀ,୭-୧୧: ଦେଶର ପିଆଜ ଦର ବୃଦ୍ଧି ଏବଂ ଉପଲବ୍ଧତା ସମ୍ପର୍କରେ କେନ୍ଦ୍ର ଖାଉଟି ବ୍ୟାପାର ମନ୍ତ୍ରୀ ରାମ ବିଳାସ ପାଶ୍ୱାନ ବୁଧବାର ସମୀକ୍ଷା କରିଛନ୍ତି। ବର୍ଷା କାରଣରୁ ପିଆଜ ଉତ୍ପାଦନ ଏବଂ ଯୋଗାଣ ଉପରେ ପ୍ରଭାବ ପଡିଛି। ଏହି ଅବସରରେ ପାଶ୍ୱାନ କହିଛନ୍ତି ଯେ, ପିଆଜ ଦର ବୃଦ୍ଧି ଉପରେ ରୋକ ଲଗାଇବା ଦିଗରେ ସରକାର କାର୍ଯ୍ୟ କରୁଛନ୍ତି। ଦେଶରେ ୫୬,୭୦୦ ଟନ୍ ପିଆଜ ମହଜୁଦ କରି ରଖାଯାଇଛି। ଏହା ମଧ୍ୟରେ ୧୫୨୫ ଟନ୍ ନାଫେଡ୍ ନିକଟରେ ରହିଛି। ପିଆଜର ଉପଲବ୍ଧତା ବୃଦ୍ଧି ଲାଗି ରପ୍ତାନି ଉପରେ ଅଙ୍କୁଶ ଲଗାଯାଇଛି। ଖୁୁଚୁରା ବ୍ୟବସାୟୀଙ୍କ ଲାଗି ମହଜୁଦ ସୀମା ୧୦ ମେଟ୍ରିକ ଟନ ରଖାଯାଇଥିବା ବେଳେ ପାଇକାରୀଙ୍କ କ୍ଷେତ୍ରରେ ଏହା ୫୦ ମେଟ୍ରିକ ଟନ୍ ରହିଛି। ସେ ଆହୁରି ମଧ୍ୟ କହିଛନ୍ତି ଯେ, ବର୍ଷା ଯୋଗୁ ପିଆଜ ଉତ୍ପାଦନ ୪୦% ହ୍ରାସ ଘଟିଛି। କୃଷି ମନ୍ତ୍ରଣାଳୟ ପକ୍ଷରୁ ଆମଦାନି ହେଉଥିବା ପିଆଜ ଉପରେ ଧୂମ ବିଶୋଧନ ସର୍ତ୍ତାବଳୀକୁ କୋହଳ କରାଯାଇଥିବା ଜଣାପଡିଛି।
