ଇସଲାମାବାଦ୍: ପୃଥିବୀରେ ଭିନ୍ନ ଭିନ୍ନ ସମ୍ପ୍ରଦାୟର ମଣିଷ ମଣିଷ ମଧ୍ୟରେ ଭେଦଭାବ ବଢ଼ିଚାଲିଛି। ତେବେ ପାକିସ୍ତାନର ଏକ ସହର ସାମ୍ପ୍ରଦାୟିକ ସଦ୍ଭାବର ବାର୍ତ୍ତା ଦେଇଥାଏ। ସହରରେ ମନ୍ଦିର ପାଖରେ ମସଜିଦ୍ ରହିଛି। ଏହି ସହରରେ ଜନସଂଖ୍ୟା ୬୦ ହଜାର। ଏଠାରେ ମୁସଲମାନ୍ଙ୍କ ସଂଖ୍ୟା ୯୫ ପ୍ରତିଶତ। ସହରରେ ହିନ୍ଦୁ-ମୁସଲମାନ୍ ଦୁଇ ସମ୍ପ୍ରଦାୟ ମଧ୍ୟରେ ସବୁବେଳେ ମଧୁର ସମ୍ପର୍କ ରହିଥାଏ। ପାକିସ୍ତାନ ସିନ୍ଧ୍ ପ୍ରଦେଶର ଥାରପାରକର ଜିଲାରେ ଥିବା ମିଠି ସହର ସାରା ପୃଥିବୀରେ ଏହାର ସାମ୍ପ୍ରଦାୟିକ ସଦ୍ଭାବ ପାଇଁ ବେଶ୍ ପରିଚିତି ହାସଲ କରିଛି। ସହରଟି ଲାହୋରଠାରୁ ୮୭୫ କିଲୋମିଟର ଏବଂ ଭାରତର ଗୁଜରାଟର ଅହମ୍ମଦାବାଦଠାରୁ ୩୪୦ କିଲୋମିଟର ଦୂରରେ ରହିଛି। ଏଠାରେ ବାସ କରୁଥିବା ଲୋକେ ମିଳିମିଶି, ଇଦ୍, ହୋଲି, ଦିଓ୍ବାଲି, ମହରମ୍, ଜନ୍ମାଷ୍ଟମୀ, ମହାଶିବରାତ୍ରୀ, ଦଶହରା ଆଦି ପର୍ବପର୍ବାଣୀ ପାଳନ କରିଥାନ୍ତି। ସହରକୁ ବୁଲିବା ପାଇଁ ପ୍ରତିଦିନ ଦେଶ ବିଦେଶରୁ ଅନେକ ପର୍ଯ୍ୟଟକ ଆସିଥାନ୍ତି। ଅତିଥି ଦେବୋ ଭବଃ ମନୋଭାବ ନେଇ ସହରର ବାସିନ୍ଦା ପର୍ଯ୍ୟଟକଙ୍କୁ ଆଦର ଅଭ୍ୟର୍ଥନା ଦେଇଥାନ୍ତି।
