ନୂଆଦିଲ୍ଲୀ,୫।୨: ଦକ୍ଷିଣ ଆଫ୍ରିକାରେ ଚାଲିଥିବା ୧୯ ବର୍ଷରୁ କମ ବିଶ୍ୱକପରେ ଗତଥରର ଚାମ୍ପିୟନ ଭାରତ ଫାଇନାଲରେ ପ୍ରବେଶ କରିଛି। ପ୍ରଥମେ ବୋଲିଂ ଓ ପରେ ବ୍ୟାଟିଂରେ ଉଚ୍ଚକୋଟୀର ପ୍ରଦର୍ଶନ କରି ଭାରତ ପାରମ୍ପରିକ ପ୍ରତିଦ୍ୱନ୍ଦ୍ୱୀ ପାକିସ୍ତାନକୁ ପରାସ୍ତ କରି ଫାଇନାଲ ଟିକେଟ ହାସଲ କରିଛି। ଏହି ବିଜୟ ପରେ ଭାରତର ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ୍ ବୀରେନ୍ଦ୍ର ସେହ୍ବାଗ ପାକିସ୍ତାନର କଟା ଘା’ରେ ଚୂନ ଦେଲା ଭଳି କଥା କହିଛନ୍ତି। ପାକିସ୍ତାନର ପରାଜୟ ପରେ ସେହ୍ବାଗ ଟୁଇଟ୍ କରି କହିଛନ୍ତି, ଏବେ ତ ଅଭ୍ୟାସ ହୋଇଗଲାଣି। ବିଶ୍ୱକପ୍ରେ ଭାରତ ପାକିସ୍ତାନକୁ ହରାଇବା ଏକ ଅଭ୍ୟାସରେ ପରିଣତ ହୋଇଯିବା କଥା ସେହ୍ବାଗ ଟୁଇଟ୍ ଯୋଗେ କହିବାକୁ ଚାହିଁଛନ୍ତି। ସୂଚନାଯୋଗ୍ୟ, ସର୍ବାଧିକ ୪ଥର ବିଶ୍ୱକପ ଟାଇଟଲ ହାସଲ କରିଥିବା ଭାରତ ଆସନ୍ତା ରବିବାର ଫାଇନାଲ ମୁକାବିଲାରେ ନ୍ୟୁଜିଲାଣ୍ଡ କିମ୍ବା ବାଂଲାଦେଶକୁ ଭେଟିବ। ଗୁରୁବାର ଖେଳାଯିବାକୁ ଥିବା ଦ୍ୱିତୀୟ ସେମିଫାଇନାଲରେ ଏହି ଦୁଇ ଦଳ ପରସ୍ପରକୁ ଭେଟିବାର କାର୍ଯ୍ୟକ୍ରମ ରହିଛି।
