ପୁରୀ ଅଫିସ, ୧୨।୧୦: ବିଭିନ୍ନ ଦାବି ନେଇ ଶୁକ୍ରବାର ଶ୍ରୀମନ୍ଦିର କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି ଶ୍ରୀମନ୍ଦିର ଭକ୍ତ ନିବାସ କର୍ମଚାରୀ ସଂଘ। ପରେ ମୁଖ୍ୟ ପ୍ରଶାସକଙ୍କ ଉଦ୍ଦେଶ୍ୟରେ ନୀତି ପ୍ରଶାସକଙ୍କୁ ଦାବିପତ୍ର ପ୍ରଦାନ କରାଯାଇଛି। ଏଥିରେ ଦର୍ଶାଯାଇଛି ଯେ, ନୀଳାଚଳ ଭକ୍ତ ନିବାସ, ଗୁଣ୍ଡିଚା ଭକ୍ତ ନିବାସ ଓ ନୀଳାଦ୍ରି ଭକ୍ତ ନିବାସରେ କର୍ମଚାରୀ ନିୟୋଜନ ପାଇଁ ଶ୍ରୀମନ୍ଦିର ପ୍ରଶାସନ ଏକ ଠିକା ସଂସ୍ଥା ସହ ଚୁକ୍ତି କରିଛି। ଫଳରେ ଆଉଟ୍ସୋର୍ସିଂ ଭାବେ କର୍ମଚାରୀଙ୍କୁ ନିଯୁକ୍ତ କରାଯାଇଛି। ସମ୍ପୃକ୍ତ ଠିକା ସଂସ୍ଥା ପ୍ରଚଳିତ ଶ୍ରମ ଆଇନକୁ ଉଲ୍ଲଂଘନ କରି ସର୍ବନିମ୍ନ ମଜୁରି, ଇପିଏଫ୍ ଓ ଇଏସ୍ଆଇ ଦେଉନାହିଁ।
ତେଣୁ ସଂଘ ପକ୍ଷରୁ ୯ ଦଫା ଦାବିପତ୍ର ପ୍ରଦାନ କରାଯାଇଛି। ସର୍ବନିମ୍ନ ମଜୁରି ପ୍ରଦାନ, ଗୁଣ୍ଡିଚା ଭକ୍ତ ନିବାସରେ କର୍ମଚାରୀଙ୍କୁ ୩୦ ଦିନର ଦରମା ପ୍ରଦାନ ସହ ୫ ରିସେପ୍ସନିଷ୍ଟ ପଦ ସୃଷ୍ଟି, ୨୦୧୬ ଏପ୍ରିଲରୁ ବର୍ଦ୍ଧିତ ହାରରେ ବକେୟା ମଜୁରି ପ୍ରଦାନ, ପ୍ରତ୍ୟେକ ମାସରେ ୱେଜ୍ ସ୍ଲିପ ପ୍ରଦାନ, ବକେୟା ଇପିଏଫ୍/ଇଏସ୍ଆଇ ଜମା କରି କର୍ମଚାରୀଙ୍କୁ କୋଡ୍ ପ୍ରଦାନ ଓ ଇଏସ୍ଆଇରେ ପରିବାରବର୍ଗଙ୍କୁ ସାମିଲ, କର୍ମଚାରୀଙ୍କୁ ବୋନସ ଓ ବର୍ଷକୁ ୨ ହଳ ପୋଷାକ, ସମସ୍ତ କର୍ମଚାରୀଙ୍କୁ ଗୋଷ୍ଠୀ ବୀମାଭୁକ୍ତ କରାଯାଉ ଏବଂ ଏକକ ପରିଚୟପତ୍ର ବ୍ୟବସ୍ଥା ସାଙ୍ଗକୁ ଗତ ମେ ବାତ୍ୟା ମାସର ସମ୍ପୂର୍ଣ୍ଣ ଦରମା ଦିଆଯାଉ ବୋଲି ଦାବି କରାଯାଇଛି। ଏହି ବିକ୍ଷୋଭରେ ସଂଘ ସଭାପତି ଶରତ ରାୟଗୁରୁ, ସମ୍ପାଦକ ରଶ୍ମିତା ଗୋଚ୍ଛାୟତ, ଅମରେନ୍ଦ୍ର ନନ୍ଦ, ଜଗନ୍ନାଥ ଦେଓ, ସୋମନାଥ ନାୟକ, ସୁଜିତ ନାୟକ, ମୁନା ମହାପାତ୍ର, ଶିବପ୍ରସାଦ ସାହୁ ପ୍ରମୁଖ ସାମିଲ ଥିଲେ।
