ବାଲେଶ୍ୱର/ଜଳେଶ୍ୱର, ୨୭।୪(ଡି.ଏନ.ଏ.)-ବାଲେଶ୍ୱର ସହରରେ ଶାନ୍ତିପୂର୍ଣ୍ଣ ନିର୍ବାଚନ ପାଇଁ ସିଆର୍ପିଏଫ୍ ପକ୍ଷରୁ ଶୁକ୍ରବାର ପୂର୍ବାହ୍ନ ୧୦ଟାରେ ଫ୍ଲାଗମାର୍ଚ୍ଚ ଅନୁଷ୍ଠିତ ହୋଇଥିଲା। ଜିଲାରେ ଆସନ୍ତା ୨୯ ତାରିଖରେ ଅନୁଷ୍ଠିତ ହେବାକୁ ଥିବା ଚତୁର୍ଥ ପର୍ଯ୍ୟାୟ ସାଧାରଣ ନିର୍ବାଚନକୁ ଅବାଧ, ଭୟମୁକ୍ତ ଓ ଶାନ୍ତିପୂର୍ଣ୍ଣ ଭାବେ ସମ୍ପନ୍ନ କରିବା ପାଇଁ ୪ ସେକ୍ସନ୍ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ (ସିଆର୍ପିଏଫ୍) ପୋଲିସ ଲାଇନ ପଡ଼ିଆରୁ ଫ୍ଲାଗମାର୍ଚ୍ଚ କରି ସହର ପରିକ୍ରମା କରିଥିଲେ।
ସେହିପରି ଜଳେଶ୍ୱର ବିଧାନସଭା ନିର୍ବାଚନ ମଣ୍ଡଳୀରେ ଶୁକ୍ରବାର ୨ ସେକ୍ସନ୍ ସିଆର୍ପିଏଫ୍କୁ ନେଇ ଜଳେଶ୍ୱର ପୋଲିସ ଫ୍ଲାଗ ମାର୍ଚ୍ଚ କରାଇଛି। ଜଳେଶ୍ୱର ଥାନା ଏଏସ୍ଆଇ ସତ୍ୟନାରାୟଣ ବଳ ଉକ୍ତ ଫୋର୍ସକୁ ନେଇ ସହରର ଥାନାବଜାର, ବଡ଼ବଜାର, ପଞ୍ଚୁଘଣ୍ଟା, ଲକ୍ଷ୍ମଣନାଥ ପଞ୍ଚାୟତର ଗୋପ, ବିରିଶପୁର, ଲକ୍ଷ୍ମଣନାଥ, ଗୋବରଘାଟା ପଞ୍ଚାୟତର ଗୋବରଘାଟା, ଅଗ୍ରୱାଲା ଛକ, ଚନ୍ଦନା ଇତ୍ୟାଦି ୧୦ କି.ମି. ପରିବ୍ୟାପ୍ତ ଅଞ୍ଚଳରେ ଫ୍ଲାଗ ମାର୍ଚ୍ଚ କରାଇଛନ୍ତି। ପ୍ରଥମେ ଏହି ଫ୍ଲାଗମାର୍ଚ୍ଚକୁ ଦେଖି ଗାଁ ଗହଳିର ଜନସାଧାରଣ ବିଶେଷ କରି ମହିଳାମାନେ ଭୟଭୀତ ହୋଇପଡିଥିଲେ। ପରେ ଏହାର ଉଦ୍ଦେଶ୍ୟ ଜାଣିବା ପରେ ଜନସାଧାରଣ ଏହାକୁ ସ୍ବାଗତ କରିଥିଲେ।
