ନାବାଳିକା ନିଖୋଜ ଘଟଣା: ମିଛ ତଥ୍ୟ ଦେଉଛି ପ୍ରଶାସନ; ଏବେବି ନିଖୋଜ ୯, ଚିନ୍ତାରେ ପରିବାର
8:23 amJanuary 9, 2020 / 21

ବ୍ରହ୍ମପୁର ଅଫିସ, ୯। ୧-ଗୋଷାଣୀନୂଆଗଁ। ଥାନା ଉତ୍କଳ ବାଳାଶ୍ରମରୁ ୧୩ ନାବାଳିକା ନିଖୋଜ ଘଟଣାର ୨୪ ଘଣ୍ଟାରୁ ଊର୍ଦ୍ଧ୍ୱ ସମୟ ବିତିଛି। କିନ୍ତୁ ୯ ଜଣ ଏବେବି ନିଖୋଜ ଅଛନ୍ତି। ବୁଧବାର ଅପରାହ୍ନ ସୁଦ୍ଧା ଭୁବନେଶ୍ୱରରୁ ୩ ଓ ବ୍ରହ୍ମପୁରରୁ ଜଣେ ଉଦ୍ଧାର ହୋଇଥିବା ଗୋଷାଣୀନୂଆଗଁ। ଥାନାଧିକାରୀ ସୁମିତ କୁମାର ସୋରେନ ସୂଚନା ଦେଇଛନ୍ତି। ଅନ୍ୟପଟେ ମଙ୍ଗଳବାର ରାତି ସାଢ଼େ ୭ଟାରେ ବ୍ରହ୍ମପୁର ଉପଜିଲାପାଳ ସିନ୍ଧେ ଦତ୍ତାତ୍ରେୟ ଭାଉସାହେବ ଏକ ଖବରଦାତା ସମ୍ମିଳନୀରେ ୭ ଜଣ ନାବାଳିକା ଉଦ୍ଧାର ହୋଇଥିବା କହିଥିଲେ। ପ୍ରଶାସନିିକ ଅଧିକାରୀ ମିଛ ତଥ୍ୟ ଦେଉଛନ୍ତି। ଫଳରେ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଫଳରେ ନାବାଳିକା ଉଦ୍ଧାର ତଥ୍ୟର ଏବେ ତାଳମେଳ ରହୁନାହିଁ। ବୁଧବାର ଏନେଇ ବ୍ରହ୍ମପୁର ଉପ ଜିଲାପାଳ କୁହନ୍ତି, ମଙ୍ଗଳବାର ୭ ଜଣ ଉଦ୍ଧାର ହେବାର ସମ୍ଭାବନା ଥିବାରୁ ମୁଁ ଏପରି କହିଥିଲି। କିନ୍ତୁ ପ୍ରକୃତରେ ୪ ନାବାଳିକା ଉଦ୍ଧାର ହୋଇଥିବା ସେ ସ୍ବୀକାର କରିଛନ୍ତି। ନିଖୋଜ ନାବାଳିକାମାନେ କେଉଁଆଡେ ଗଲେ, ସେମାନେ କିପରି ଅଛନ୍ତି ପରିବାର ଲୋକେ ଚିନ୍ତାରେ ପଡିଛନ୍ତି। ଜିଲା ପ୍ରଶାସନ ଓ ପୋଲିସ ପକ୍ଷରୁ ବିଭିନ୍ନ ସୂଚନାକୁ ଆଧାର କରି ବିଭିନ୍ନ ସ୍ଥାନରେ ଚଢାଉ ଜାରି ରଖିଛି। ବୁଧବାର ପୋଲିସ ଗଞ୍ଜାମ ଜିଲାରେ ୫ ନାବାଳିକା ରହିଥିବା ଖବର ପାଇ ବଡ଼ଗଡ଼, ଶେରଗଡ ଏପରି ଅନେକ ସ୍ଥାନକୁ ଯାଇ ଖାଲି ହାତରେ ଫେରିିଛି।
ସୂଚନାଯୋଗ୍ୟ, ଗତ ୧ ବର୍ଷ ମଧ୍ୟରେ ଉକ୍ତ ବାଳାଶ୍ରମରୁ ୭ ନାବାଳିକା ପାଚେରି ଡେଇଁ ଚମ୍ପଟ ମାରିଥିବା ଥାନାରେ ଅଭିଯୋଗ ହୋଇଥିବା ଥାନାଧିକାରୀ ସୋରେନ ସୂଚନା ଦେଇଛନ୍ତି। ଗତ ବର୍ଷ ଜୁଲାଇ ୭ ରେ ଜଣେ ନାବାଳିକା ଓ ଜଣେ ସାବାଳିକା ପାଚେରି ଡେଇଁ ଚମ୍ପଟ ମାରିଥିଲେ। ଏନେଇ ଥାନାରେ ବାଳାଶ୍ରମ ଅଧୀକ୍ଷକ ସସ୍ମିତା ରାଣୀ ପାଢ଼ୀ ଅଭିଯୋଗ କରିଥିଲେ।
ବର୍ତ୍ତମାନ ଏଠାରେ ଅନ୍ତେବାସୀଙ୍କ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି ବୋଲି ଗଞ୍ଜାମ ଜିଲା ଭାଜପା ପୂର୍ବତନ ସଭାପତି କାହ୍ନୁ ଚରଣ ପତି କହିଛନ୍ତି। ସେହିପରି ବାଳାଶ୍ରମରୁ ନାବାଳିକା ନିଖୋଜ ଘଟଣାର ଉଚ୍ଚସ୍ତରୀୟ ତଦନ୍ତ କରିବା ପାଇଁ ମଧ୍ୟ ସେ ଦାବି କରିଛନ୍ତି। ଘଟଣା ପରେ ରାଜ୍ୟ ଶିଶୁ ସୁରକ୍ଷା ଆୟୋଗ ଅଧ୍ୟକ୍ଷା ସନ୍ଧ୍ୟାବତୀ ପ୍ରଧାନ ମଧ୍ୟ ବ୍ରହ୍ମପୁରରେ ପହଞ୍ଚି ତଦନ୍ତ ଚଳାଇଥିବା ଜଣାପଡିଛି।