ନୂଆଦିଲ୍ଲୀ,୫ା୧୨(ପି.ଟି.): ବିବାଦୀୟ ନାଗରିକତ୍ୱ (ସଂଶୋଧନ) ବିଲ୍କୁ ବୁଧବାର କେନ୍ଦ୍ର କ୍ୟାବିନେଟ ମଞ୍ଜୁରୀ ପ୍ରଦାନ କରିଛି। ଫଳରେ ଏହାକୁ ପାର୍ଲାମେଣ୍ଟରେ ଉପସ୍ଥାପନ କରିବା ଲାଗି ପଥ ପରିଷ୍କାର ହୋଇଯାଇଛି। ପାକିସ୍ତାନ, ବାଂଲାଦେଶ, ଆଫଗାନିସ୍ତାନରେ ଧର୍ମୀୟ ଉତ୍ପୀଡ଼ନର ସମ୍ମୁଖୀନ ହୋଇ ଭାରତରେ ରହିଥିବା ଅଣମୁସଲମାନ ଶରଣାର୍ଥୀଙ୍କୁ ନାଗରିକତ୍ୱ ପ୍ରଦାନ କରିବା ଏହି ବିଲ୍ର ଉଦ୍ଦେଶ୍ୟ। ଏହା ପକ୍ଷପାତମୂଳକ ଓ ଏହା ପଛରେ ସାମ୍ପ୍ରଦାୟିକତା ମନୋଭାବ ରହିଥିବା ବିରୋଧୀ ଦଳଗୁଡ଼ିକ ସମାଲୋଚନା କରିଛନ୍ତି। ଭାରତରେ ରହୁଥିବା ଅଣମୁସଲମାନ, ମୁଖ୍ୟତଃ ହିନ୍ଦୁ ଶରଣାର୍ଥୀମାନଙ୍କୁ ଏନ୍ଆର୍ସିରୁ ସୁରକ୍ଷା ଦେବା ପାଇଁ ଏହା ଭାଜପାର ଆଦର୍ଶଗତ ପ୍ରକଳ୍ପର ଏକ ମୁଖ୍ୟ ଅଂଶ ବୋଲି ବିରୋଧୀ ଅଭିଯୋଗ କରିଛନ୍ତି।
ଭାରତର ତଥା ପ୍ରତ୍ୟେକଙ୍କର ସ୍ବାର୍ଥର ସୁରକ୍ଷା କରୁଛନ୍ତି ବୋଲି ବୈଠକ ପରେ କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର ଗଣମାଧ୍ୟମକୁ କହିଥିଲେ। ବହୁସଂଖ୍ୟାରେ ଶରଣାର୍ଥୀ ବସବାସ କରୁଥିବା ଉତ୍ତରପୂର୍ବାଞ୍ଚଳର ବିଭିନ୍ନ ସଂଗଠନ ବିଲ୍କୁ ବିରୋଧ କରୁଥିବା ନେଇ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ତେବେ ନାଗରିକତ୍ୱ ବିଲ୍ ରାଷ୍ଟ୍ରର ସ୍ବାର୍ଥ ଉଦ୍ଦେଶ୍ୟରେ ହୋଇଥିବାରୁ ଏହାକୁ ଲୋକେ ସ୍ବାଗତ କରିବେ ବୋଲି ସେ କହିଥିଲେ। ଆଗାମୀ ଦୁଇଦିନ ମଧ୍ୟରେ ସରକାର ଉକ୍ତ ବିଲ୍କୁ ପାର୍ଲାମେଣ୍ଟରେ ଆଗତ କରିବା ସହ ଗୃହୀତ କରାଇବା ଲାଗି ଉଦ୍ୟମ କରିବେ ବୋଲି ଜଣାପଡିଛି।
କଂଗ୍ରେସ, ତୃଣମୂଳ କଂଗ୍ରେସ ଏବଂ ସିପିଏମ୍ ପ୍ରଭୃତି ଦଳ ସମାଲୋଚନା କରିଛନ୍ତି। ଏହା ଭାରତର ମୂଳ ଚିନ୍ତାଧାରାର ଉଲ୍ଲଂଘନ ବୋଲି ବରିଷ୍ଠ କଂଗ୍ରେସ ନେତା ଶଶୀ ଥରୁର କହିଛନ୍ତି। ନାଗରିକତ୍ୱ ଲାଗି ଧର୍ମକୁ ଏକ କାରଣ ଭାବେ ଗ୍ରହଣ କରାଯାଇପାରିବ ନାହିଁ । ଧର୍ମ ଆଧାରରେ ଜାତୀୟତା ନିର୍ଣ୍ଣୟ କରିବା ପାକିସ୍ତାନୀ ଚିନ୍ତାଧାରା। ଯେଉଁମାନେ ଏଭଳି ଚିନ୍ତାଧାରା ପୋଷଣ କରୁଛନ୍ତି ସେମାନେ ପାକିସ୍ତାନ ସୃଷ୍ଟି କରିବାକୁ ଚାହୁଁଥିବା ଥରୁର କହିଥିଲେ। ଏଭଳି ବିଲ୍ ସମ୍ବିଧାନ ବିରୋଧୀ ବୋଲି ସିପିଏମ୍ ସାଧାରଣ ସମ୍ପାଦକ ସୀତାରାମ ୟେଚୁରୀ ଟୁଇଟ୍ କରିଛନ୍ତି।
