ସୋର, ୧୮।୩(ଜନ୍ମେଜୟ ମିଶ୍ର)-ବାଲେଶ୍ୱର ଜିଲା ଔପଦା ବ୍ଲକ ଅଧୀନ ପାହାଡିଆ ଗଁ। ରଙ୍ଗାମାଟିଆ। ଗଁ। ଠାରୁ ପଞ୍ଚାୟତ ଶ୍ୟାମସୁନ୍ଦରପୁରର ଦୂରତା ୨୦ରୁ ୨୫ କି.ମି. ହୋଇଥିବାବେଳେ ଔପଦା ବ୍ଲକ ହେଡକ୍ୱାର୍ଟର ଦୂରତା ୩୦ରୁ ୩୫ କି.ମି.। ଭୌଗୋଳିକ ଦୃଷ୍ଟିକୋଣରୁ ଏହି ଗଁ। ସୋର ବ୍ଲକ ସିଙ୍ଗାଖୁଣ୍ଟା ଓ ମହୁମୁହାଣ ପଞ୍ଚାୟତ ନିକଟରେ ରହିଛି। ଫଳରେ ଗ୍ରାମର ଲୋକେ କିଣାବିକା ପାଇଁ ସୋର ବ୍ଲକର ବାଗୁଡ଼ିବଜାର ଉପରେ ନିର୍ଭର କରିଥାନ୍ତି। ଗ୍ରାମର ୮୦ ପରିବାର ମଧ୍ୟରୁ ୭୦ଭାଗ କୁମ୍ଭକାର। ଅବଶିଷ୍ଟ ଆଦିବାସୀ ସମ୍ପ୍ରଦାୟର। ଖର୍ଚ୍ଚ ଅନୁସାରେ କମ୍ ପାରିଶ୍ରମିକ ମିଳୁଥିବାରୁ ଅନେକ କୁମ୍ଭକାର ବୃତ୍ତି ହରାଇଛନ୍ତି। ମାତ୍ର ୧୨ ପରିବାର ଏବେ ଏହି ବୃତ୍ତିକୁ ଆଦରି ଦୁର୍ଦ୍ଦିନରେ କାଳ କାଟୁଛନ୍ତି। ସରକାରଙ୍କ ପକ୍ଷରୁ ବିକ୍ରିବଟା ଲାଗି ବଜାର ସୁବିଧା କରାଗଲେ ଉପକୃତ ହୋଇପାରନ୍ତେ ବୋଲି କୁମ୍ଭକାରମାନେ କହିଛନ୍ତି।
ଦିନକୁ ଦିନ ମାଟି ତିଆରି ସାମଗ୍ରୀର ଆଦର କମିଆସୁଥିବାରୁ କୌଳିକ ବୃତ୍ତି ପ୍ରତି ଆଗ୍ରହ ହେଉ ନ ଥିବା ଗ୍ରାମର ବୟୋଜ୍ୟେଷ୍ଠ ବ୍ୟକ୍ତି ଚରଣ ବେହେରା (୭୨) କୁହନ୍ତି। ତାଙ୍କ ବାପାଙ୍କ ଅମଳରୁ ଦୀର୍ଘ ୬୦ ବର୍ଷ ହେବ ସେ ଏହି କାମ କରିଆସୁଛନ୍ତି। ତାଙ୍କର ତିନିପୁଅ ଜଳଧର, ଶ୍ରୀଧର, ଲମ୍ବୋଧର ତାଙ୍କୁ କାମରେ ସାହାଯ୍ୟ କରିଥାନ୍ତି। ବାହାରୁ ବେପାରୀମାନେ ଆସି ତାଙ୍କଠାରୁ ମାଟିପାତ୍ରକୁ କିଣି ନେଇଥାନ୍ତି। ବିଶେଷ କରି ପର୍ବପର୍ବାଣି ସମୟରେ ଭଲ ବ୍ୟବସାୟ ହୋଇଥାଏ। ଅନ୍ୟ ସମୟରେ ପ୍ରସ୍ତୁତ ସାମଗ୍ରୀ ଦୀର୍ଘଦିନ ଧରି ପଡ଼ିରୁହେ। ସେ କୁହନ୍ତି, ମାଟିକୁ କିଣି ଘରକୁ ଆଣିବା ପରେ ତାହାକୁ ଶୁଖାଇ ପଥର, ରେଙ୍ଗୁଟି ବାଛି କାଦୁଅ କରାଯାଇଥାଏ। ଏହାକୁ ଚକିରେ ପକାଇ ବିଭିନ୍ନ ସାମଗ୍ରୀ ହାଣ୍ଡି, କଢ଼ା, ମାଟିଆ, ସୁରେଇ, ଦୀପ ଆଦି ପ୍ରସ୍ତୁତି କରି ଶୁଖାଇ ଦିଆଯାଇଥାଏ। ପରେ ଏହାକୁ ଭାଟିରେ ସଜାଇ ରଖି ମାଟିରେ ଲେପଦେଇ କାଠରେ ଚୁଲାରେ ରଖି ନିଆଁ ଲଗାଯାଇଥାଏ। ନିଆଁ ଲିଭିଲା ପରେ ଭାଟି ଖୋଲାଯାଏ। ଏହି ସାମଗ୍ରୀ ତିଆରି ପାଇଁ ଯେତିକି ଖର୍ଚ୍ଚ ହେଉଛି ସେହି ଅନୁସାରେ ଲାଭ ମିଳୁନି ବୋଲି ଗ୍ରାମର ଶଙ୍କର ବେହେରା, ଲକ୍ଷ୍ମୀଧର ବେହେରା, ପବନ ବେହେରା, ରାଜେନ୍ଦ୍ର ବେହେରା, ଶ୍ରୀଧର ବେହେରା ପ୍ରମୁଖ ପ୍ରକାଶ କରିଛନ୍ତି। ଏହି ଗ୍ରାମରେ ଅନ୍ୟାନ୍ୟ ସମସ୍ୟା ମଧ୍ୟ ରହିଛି। ନିର୍ବାଚନ ସମୟରେ ଆସୁଥିବା ନେତାମାନେ କେବଳ ପ୍ରତିଶ୍ରୁତି ଦେଇ ଚାଲିଯାଇଥାନ୍ତି ବୋଲି ଗ୍ରାମବାସୀ କୁହନ୍ତି। ବିଶେଷ କରି ପାଇପ୍ ପାଣି ପାଇଁ ଗ୍ରାମବାସୀ ଚାତକ ଭଳି ଚାହିଁ ବସିଛନ୍ତି। ଦୀର୍ଘ ଏକବର୍ଷ ହେବ ପାଇପ୍ ପାଣି ପାଇଁ ପାଇପ୍ ବିଛାଯାଇଥିଲେ ମଧ୍ୟ ଏଥିରୁ ଗ୍ରାମବାସୀ ବଞ୍ଚିତ ରହିଛନ୍ତି। ଗ୍ରାମରେ ମାତ୍ର ତିନୋଟି ନଳକୂପ ଥିବାରୁ ପାଣି ନେବା ପାଇଁ ଘଣ୍ଟା ଘଣ୍ଟା ଅପେକ୍ଷା କରିବାକୁ ପଡୁଛି। ନଳକୂପଗୁଡ଼ିକ ଘରଠାରୁ ଯଥେଷ୍ଟ ଦୂରରେ ରହିଛି। ଗ୍ରାମରେ ଆହୁରି ନଳକୂପର ଆବଶ୍ୟକତା ଅଛି ବୋଲି ଗ୍ରାମର ନିରଞ୍ଜନ ବେହେରା, ଇନ୍ଦ୍ର ବେହେରା, କବିତା ବେହେରା, ଦୂତୀ ବେହେରା ପ୍ରମୁଖ ପ୍ରକାଶ କରିଛନ୍ତି। ପ୍ରଶାସନ ପକ୍ଷରୁ କେହି ଆସି ତାଙ୍କର ସୁବିଧା ଅସୁବିଧା ବୁଝନ୍ତି ନାହଁି ବୋଲି ଚରଣ ବେହେରା କୁହନ୍ତି।
