କଳିଙ୍ଗନଗର, ୨୭ା୯(ଡି.ଏନ୍.ଏ.)- ଯାଜପୁର କ୍ଲଷ୍ଟର ଡେଭଲପ୍ମେଣ୍ଟ ଲିମିଟେଡ (ଜେସିଡିଏଲ୍) ପକ୍ଷରୁ ଗୁରୁବାର ଯାଜପୁର କ୍ଲଷ୍ଟର କାର୍ଯ୍ୟାଳୟରେ ଏକ ବୈଠକ ଅନୁଷ୍ଠିତ ହୋଇଯାଇଛି। କଳିଙ୍ଗନଗର ଅତିରିକ୍ତ ଆରକ୍ଷୀ ଅଧୀକ୍ଷକ ରାଜକିଶୋର ଦୋରାଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା। ଏଥିରେ କଳିଙ୍ଗନଗର ଶିଳ୍ପାଞ୍ଚଳକୁ ସଂଯୋଗ କରୁଥିବା ସମସ୍ତ ରାସ୍ଥା ଓ ଛକଗୁଡିକରେ ସିିସି କ୍ୟାମେରା, ଆଲୋକୀକରଣ, ଦୁର୍ଘଟଣା ଜନିତ ସ୍ଥାନରେ ସ୍ପିଡ ବ୍ରେକର ଏବଂ ଗ୍ଲୋ ସାଇନ ଟ୍ରାଫିକ ନିୟାମାବଳୀ ୧୫ ଦିନ ମଧ୍ୟରେ ଲାଗୁ କରିବା ବୈଠକରେ ନଷ୍ପତ୍ତି ପ୍ରକାଶ ପାଇଛି। ବିଶେଷକରି ଦୁଇ ଥାନା ଅଧୀନରେ ପୂର୍ବରୁ ଚିହ୍ନଟ ହୋଇଥିବା ଦୁର୍ଘଟଣା ପ୍ରବଣ ସ୍ଥାନ ଯଥା ଡୁବୁରୀ ଛକ, ଡୁବୁରୀ ଡାକ୍ତରଖାନା ଛକ, ସିଆରିଆ, ଟାଟା କାରଖାନା ମୁଖ୍ୟ ଫାଟକ, ଜିନ୍ଦଲ କାରଖାନା ମୁଖ୍ୟ ଫାଟକ, ରାବଣା, ଭିସା ଷ୍ଟିଲ, ବିଆର୍ପିଏଲ୍, ମନୋହରପୁର, ମାନପୁର, ବାଘବାହାଳିବଙ୍ଗଳା ଛକ ଆଦି ସ୍ଥାନରେ ୩୬ଟି ନାଇଟ ଭିଜନ୍ ସିସି କ୍ୟାମେରା ଏବଂ ହାଇମାଷ୍ଟ ଲାଇଟ୍ ଲଗାଇବା ପାଇଁ ସ୍ଥିର କରାଯାଇଛି। ଏହାର ଦାୟିତ୍ୱ ଜେସିଡିଏଲ୍କୁ ଦିଆଯିବା ସହ ସମସ୍ତ କାରଖାନା ପକ୍ଷରୁ ଆବଶ୍ୟକୀୟ ଅର୍ଥ ଜେସିଡିଏଲ୍କୁ ପ୍ରଦାନ କରିବା ପାଇଁ ସମସ୍ତ ପଦାଧିକାରୀ ସ୍ବୀକୃତି ପ୍ରଦାନ କରିଛନ୍ତି। ତେବେ ୫ା୧୨ା୧୮ ଜେସିଡିଏଲ କାର୍ଯ୍ୟାଳୟ ଏବଂ ୧୭ା୧ା୧୯ ରେ ନୀଳାଞ୍ଚଳ କାରଖାନାରେ ଦୁଇ ଦୁଇ ଥର ବୈଠକ ବସିଥିଲା। ହେଲେ କାରଖାନା କର୍ତ୍ତୃପକ୍ଷଙ୍କ ଅସହଯୋଗ ମନୋଭାବ ଯୋଗୁ ସେତେବେଳେ ଦିଆଯାଇଥିବା ପ୍ରସ୍ତାବଗୁଡିକ କାର୍ଯ୍ୟକାରୀ ହୋଇପାରି ନାହଁି। ଏ ନେଇ ଜେସିଡିଏଲ୍ ସମ୍ପାଦକ ସନ୍ତୋଷ କୁମାରଙ୍କୁ ପଚାରିବାରୁ, ପୂର୍ବରୁ ହୋଇଥିବା ବୈଠକରେ ନିଆଯାଇଥିବା ନିଷ୍ପତ୍ତିକୁ କାରଖାନା କର୍ତ୍ତୃପକ୍ଷଙ୍କ ସେତେଟା ସମର୍ଥନ ନ ମିଳିବାରୁ ତାହା କାର୍ଯ୍ୟକାରୀ ହୋଇ ପାରି ନ ଥିଲା। ବୈଠକରେ ଅନ୍ୟମାନଙ୍କ ମଧ୍ୟରେ ଜେସିଡିଏଲର ସମ୍ପାଦକ ସନ୍ତୋଷ କୁମାର ଦାସ, ଥାନାଧିକାରୀ ରାଜେନ୍ଦ୍ର ନାରାୟଣ ପଟ୍ଟନାୟକ, ଭିସା ଷ୍ଟିଲ ମାନବସମ୍ବଳ ବିଭାଗ ମୁଖ୍ୟ ଚିରଞ୍ଜୀବୀ ଅଗ୍ରଓ୍ବାଲ, ବିନୋଦ କୁମାର ଦ୍ୱିବେଦୀ, ନୀଳାଚଳ ନିଗମ ସୁରକ୍ଷା ଏବଂ ନିରାପତ୍ତା ବିଭାଗ ମୁଖ୍ୟ ସ୍ବାଧୀନ ପଣ୍ଡା, ଟାଟାଷ୍ଟିଲ୍ର ଜୀବନ ଉପାଧ୍ୟାୟ, ବ୍ରହ୍ମାନନ୍ଦ ସାହୁ, ସୁଶୀଲ କୁମାର ଦାସ, ଦେବାଶିଷ ଦାଶ, ଜିନ୍ଦଲ ଷ୍ଟିଲ କାରଖାନା ସୁରକ୍ଷା ବିଭାଗ ମୁଖ୍ୟ ଭି.ଏସ୍ ତିଓ୍ବାରୀ, ମେସ୍କୋ ଷ୍ଟିଲ୍ ମାନବସମ୍ବଳ ବିଭାଗର ଏସ୍ ରାଉତ ପ୍ରମୁଖ ଉପସ୍ଥିତ ଥିଲେ।
