ବ୍ୟାଙ୍କକ୍, ୩୦।୭ (ପି.ଟି.)- ଶ୍ରେଷ୍ଠ ଭାରତୀୟ ମହିଳା ବ୍ୟାଡ୍ମିଣ୍ଟନ ଖେଳାଳି ତଥା ଅଲିମ୍ପିକ ରୌପ୍ୟ ପଦକ ବିଜୟିନୀ ପି.ଭି. ସିନ୍ଧୁ ମଙ୍ଗଳବାରଠାରୁ ଏଠାରେ ଆରମ୍ଭ ହୋଇଥିବା ବିଡବ୍ଲ୍ୟୁଏଫ୍ ସୁପର୍ ୫୦୦ ଇଭେଣ୍ଟରୁ ଓହରି ଯାଇଛନ୍ତି। ବୁଧବାରଠାରୁ ମୁଖ୍ୟ ପର୍ଯ୍ୟାୟ ଆରମ୍ଭ ହେବାକୁ ଥିବାବେଳେ ସିନ୍ଧୁ ଏହାର ଗୋଟିଏ ଦିନ ପୂର୍ବରୁ ଓହରି ଯିବାକୁ ନିଷ୍ପତ୍ତି ନେଇଛନ୍ତି। ତେବେ କେଉଁ କାରଣ ଲାଗି ସେ ପ୍ରତିଯୋଗିତାରୁ ଓହରିଲେ ତାହା ଆୟୋଜକଙ୍କ ତରଫରୁ ସ୍ପଷ୍ଟ କରାଯାଇନାହିଁ। ଗତ ସପ୍ତାହରେ ସିନ୍ଧୁ ଇଣ୍ଡୋନେସିଆ ଓପନ୍ ଫାଇନାଲକୁ ପ୍ରବେଶ କରିଥିଲେ ମଧ୍ୟ ଜାପାନର ଏକାନେ ୟାମାଗୁଚିଙ୍କ ନିକଟରୁ ହାରି ରନର୍ସଅପ୍ରେ ସନ୍ତୁଷ୍ଟ ରହିଥିଲେ। ଅପରପକ୍ଷରେ ଆଘାତଜନିତ କାରଣରୁ ଇଣ୍ଡୋନେସିଆ ଓ ଜାପାନ ଓପନ୍ରୁ ଓହରି ଯାଇଥିବା ସାଇନା ନେହ୍ବାଲ ଏହି ପ୍ରତିଯୋଗିତା ମାଧ୍ୟମରେ କୋଟ୍କୁ ପ୍ରତ୍ୟାବର୍ତ୍ତନ କରିବେ। ପ୍ରତିଯୋଗିତାରେ ୭ମ ସିଡ୍ ମାନ୍ୟତା ପାଇଥିବା ସାଇନା ମହିଳା ସିଙ୍ଗଲ୍ସର ଏକ ମୁକାବିଲାରେ ଜଣେ କ୍ୱାଲିଫାୟର ପ୍ରତିଯୋଗୀଙ୍କୁ ଭେଟିବେ।
