ପୁରୁଷୋତ୍ତମପୁର,୧୪।୨(ଡି.ଏନ୍.ଏ.): ଗଞ୍ଜାମ ଜିଲାର ଇଷ୍ଟଦେବୀ ମା’ ତାରାତାରିଣୀଙ୍କ ପୀଠରେ ଦକ୍ଷିଣା ଲାଗି ଭକ୍ତଙ୍କୁ ସେବାୟତ ଖଣ୍ଡାରେ ହାଣି ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଥିଲା। ଏହି ଘଟଣାରେ ଶୁକ୍ରବାର ମନ୍ଦିର ପ୍ରଶାସନ ଓ ସେବାୟତମାନଙ୍କ ପକ୍ଷରୁ ମନ୍ଦିର କାର୍ଯ୍ୟାଳୟ ପରିସରରେ ଏକ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଛି। ଏଥିରେ ମନ୍ଦିର ନିର୍ବାହୀ ଅଧିକାରୀ ଟି. କେ. ରେଡ୍ଡି ଓ ସେବାୟତ ସଂଘ ସଭାପତି ତପନ କୁମାର ରଣା, ବାପୁଜୀ ରଣାଙ୍କ ସମେତ ବହୁ ସେବାୟତ ଯୋଗଦେଇ ମନ୍ଦିର ପରିସରରେ ଘଟିଥିବା ଅଭାବନୀୟ ଘଟଣା ଲାଗି ଦୁଃଖ ପ୍ରକାଶ କରିବା ସହ ନିନ୍ଦା କରିଛନ୍ତି। ମାତ୍ର ଦକ୍ଷିଣା ଲାଗି ଯେଉଁ ଅଭିଯୋଗ ଉଠିଛି ତାହାକୁ ଅସ୍ବୀକାର କରି ସମ୍ପୂର୍ଣ୍ଣ ମିଥ୍ୟା ବୋଲି ସେମାନେ କହିଛନ୍ତି । ଦକ୍ଷିଣା ଲାଗି ଏଭଳି କାଣ୍ଡ ଘଟିନାହିଁ । ଅନ୍ୟ କୌଣସି କାରଣକୁ ନେଇ ଏହା ଘଟିଛି ବୋଲି କହିବା ସହ ପୋଲିସ ଦ୍ୱାରା ଗିରଫ ହୋଇଥିବା ୩ ସେବାୟତ ଉକ୍ତ ଦିନ ଅଭିଯୋଗକାରୀ ଭକ୍ତଙ୍କ ଗାଡ଼ି ପୂଜା କରିନାହାନ୍ତି । ଏହି ଘଟଣା କେଉଁ କାରଣରୁ ଘଟିଲା ତାହା ପୋଲିସ ତଦନ୍ତ ପରେ ଜଣାପଡ଼ିବ।
