ବାରିପଦା ଅଫିସ,୨୫ା୫- ଲକ୍ଡାଉନ ଯୋଗୁ ତାମିଲନାଡୁରେ ଫସି ରହିଥିବା ପ୍ରବାସୀ ଓଡ଼ିଆ ମଙ୍ଗଳବାର ୨ଟି ଶ୍ରମିକ ସ୍ପେଶାଲ ଟ୍ରେନ୍ରେ ବାରିପଦାକୁ ଫେରିବେ। ଏଥିପାଇଁ ଜିଲା ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି। ଏହି ଟ୍ରେନ୍ ୨ଟି ବାରିପଦାର ଭଞ୍ଜପୁର ଷ୍ଟେଶନଠାରେ ଅଟକିବ। ଏଥିପାଇଁ ସୋମବାର ଭଞ୍ଜପୁର ଷ୍ଟେଶନଠାରେ ରେଳ ଟ୍ରାକ୍ରେ ଏକ ଇଞ୍ଜିନ ଚଲାଇ ପରୀକ୍ଷଣ କରାଯାଇଥିଲ। ୨ ମାସ ହେଲାଣି ଟ୍ରାକରେ କୌଣସି ଟ୍ରେନ୍ ଚାଲି ନ ଥିବାରୁ ଏପରି ପରୀକ୍ଷଣ କରାଯାଇଥିଲା। ଶ୍ରମିକମାନେ ଆସିବାଠାରୁ କ୍ୱାରାଣ୍ଟାଇନ୍ କେନ୍ଦ୍ରକୁ ଯିବା ପର୍ଯ୍ୟନ୍ତ ଭଞ୍ଜପୁର ଷ୍ଟେଶନଠାରେ ଏଥିପାଇଁ ବ୍ୟାପକ ପ୍ରସ୍ତୁତି କରାଯାଇଛି। ମଙ୍ଗଳବାର ସକାଳ ୮ଟାରୁ ଭଞ୍ଜପୁର ରେଲେୱ ଷ୍ଟେଶନର ୫୦୦ମିଟର ପରିଧି ମଧ୍ୟରେ ୧୪୪ ଧାରା ଜାରି କରାଯିବା ସହିତ ଏହାକୁ ଜିଲାପାଳ ବିନୀତ ଭରଦ୍ୱାଜ ନିଷେଧାଞ୍ଚଳ ଘୋଷଣା କରିଛନ୍ତି। ଗୋଟିଏ ଟ୍ରେନ୍ ଅପରାହ୍ନ ୧୧ଟା ୩୦ ସମୟରେ ଓ ଅନ୍ୟଟି ସନ୍ଧ୍ୟା ୬ଟା ୩୦ରେ ପହଞ୍ଚିବ। ଏଥିରେ ପ୍ରାୟ ୧୦୦୦ ଶ୍ରମିକ ଆସିବେ ବୋଲି ସୂଚନା ମିଳିଛି। ପ୍ରବାସୀ ଶ୍ରମିକମାନଙ୍କ ସୁବିଧା ପାଇଁ ଷ୍ଟେଶନଠାରେ ୨୭ଟି କାଉଣ୍ଟର ଖୋଲାଯାଇଛି। ଶ୍ରମିକମାନେ ଓହ୍ଲାଇବା ପରେ ସେମାନଙ୍କୁ ଷ୍ଟେଶନଠାରେ ହୋଇଥିବା ଅସ୍ଥାୟୀ କେନ୍ଦ୍ରରେ ସ୍ବାସ୍ଥ୍ୟ ପରୀକ୍ଷା କରାଯିବ। ଏହା ପରେ ବସ୍ ଯୋଗେ ସେମାନଙ୍କୁ ନିଜ ଅଞ୍ଚଳର ସଙ୍ଗରୋଧ କେନ୍ଦ୍ରକୁ ପଠାଯିବ। ଉଲ୍ଲେଖଯୋଗ୍ୟ ଯେ, ଜିଲାରେ କରୋନା ସନ୍ଦେହରେ ସୋମବାର ସୁଦ୍ଧା ୩୭୦୩ ଜଣଙ୍କ ସ୍ବାବ୍ ପରୀକ୍ଷା ପାଇଁ ପଠାଯାଇଥିବା ବେଳେ ସେଥି ମଧ୍ୟରୁ ୩୬୦୩ ଜଣଙ୍କ ରିପୋର୍ଟ ଆସିଛି। ବାକି ୧୦୦ ଜଣଙ୍କ ରିପୋର୍ଟ ଅପେକ୍ଷାରେ ରହିଛି। ୩୬୦୩ ରିପୋର୍ଟରୁ ୧୫ଜଣଙ୍କ ରିପୋର୍ଟ ପଜିଟିଭ ଥିବା ବେଳେ ଅନ୍ୟମାନଙ୍କ ରିପୋର୍ଟ ନେଗେଟିଭ୍ ଆସିଛି। ଆକ୍ରାନ୍ତ ୧୫ ଜଣଙ୍କ ମଧ୍ୟରୁ ୯ ଜଣ ସୁସ୍ଥ ହୋଇଥିବା ବେଳେ ବର୍ତ୍ତମାନ ୬ ଜଣ ଚିକିତ୍ସିତ ହେଉଛନ୍ତି।
