ନୂଆଦିଲ୍ଲୀ, ୨୧।୪ (ପି.ଟି.)- କିମ୍ବଦନ୍ତୀ ସ୍ପ୍ରିଣ୍ଟର ମିଲ୍ଖା ସିଂଙ୍କ ଝିଅ ତଥା ବିଶିଷ୍ଟ ଗଲ୍ଫ ଖେଳାଳି ଜିଭ୍ ମିଲ୍ଖା ସିଂଙ୍କ ବଡ଼ ଭଉଣୀ ନ୍ୟୁୟର୍କରେ ଏକ ‘ମାରାଥନ’ରେ ସାମିଲ ହୋଇଛନ୍ତି। କିନ୍ତୁ ଟ୍ରାକ୍ରେ ନୁହେଁ ହସ୍ପିଟାଲ୍ରେ। ସେ ହେଉଛନ୍ତି ମୋନା ମିଲ୍ଖା ସିଂ। ନ୍ୟୁୟର୍କସ୍ଥିତ ମେଟ୍ରୋପଲିଟାନ ହସ୍ପିଟାଲ ସେଣ୍ଟରରେ ଜଣେ ଡାକ୍ତରଭାବେ କାର୍ଯ୍ୟକରୁଛନ୍ତି। କରୋନା ଭାଇରସ୍ ଦ୍ୱାରା ସଂକ୍ରମିତ ହୋଇ ଗୁରୁତର ଅବସ୍ଥାରେ ଥିବା ରୋଗୀମାନଙ୍କର ସେ ଚିକିତ୍ସା କରୁଛନ୍ତି। କୋଭିଡ୍-୧୯ରେ ଆକ୍ରାନ୍ତ ହୋଇ ସମଗ୍ର ବିଶ୍ୱରେ ଏପର୍ଯ୍ୟନ୍ତ ୧.୫ ଲକ୍ଷରୁ ଊର୍ଦ୍ଧ୍ୱ ଲୋକ ପ୍ରାଣ ହରାଇ ସାରିଥିବାବେଳେ ତନ୍ମଧ୍ୟରେ କେବଳ ଆମେରିକାରୁ ୪୦,୦୦୦ ରୁ ଅଧିକ ରହିଛନ୍ତି। ମୋନା ହସ୍ପିଟାଲର ଏମରଜେନ୍ସି ରୁମ୍ରେ କାର୍ଯ୍ୟରତ। କରୋନା ଭାଇରସ୍ ଲକ୍ଷଣ ଥିବା କୌଣସି ବ୍ୟକ୍ତି ମେଟ୍ରୋପଲିଟାନ ହସ୍ପିଟାଲ ସେଣ୍ଟର ଆସିଲେ ତାର ସେ ଆଶୁ ଚିକିତ୍ସା କରିଥାନ୍ତି। କୃତ୍ରିମ ଭେଣ୍ଟିଲେଟର ଜରିଆରେ ରୋଗୀକୁ ସ୍ଥିର ଅବସ୍ଥାକୁ ଆଣିବା ପରେ ତାକୁ କ୍ୱାରାଣ୍ଟାଇନ୍ ଓ୍ବାର୍ଡକୁ ପଠାଇ ଦିଆଯାଇଥାଏ ୪ଥର ୟୁରୋପିଆନ ଟୁର୍ ଚାମ୍ପିୟନ ମୋନାଙ୍କ ଭାଇ ଜିଭ୍ ପ୍ରକାଶ କରିଛନ୍ତି। ୫୪ ବର୍ଷୀୟା ମୋନା ୯୦ ଦଶକରେ ଆମେରିକା ଯିବା ପୂର୍ବରୁ ପଟିଆଲା ମେଡିକାଲ କଲେଜରେ ପାଠ୍ୟକ୍ରମ ଶେଷ କରିଥିଲେ। ସେଠାରେ ସେ ୨୦ ବର୍ଷରୁ ଅଧିକ ସମୟ ଧରି କାର୍ଯ୍ୟ କରି ଆସୁଛନ୍ତି। ଜୀଭ୍ କହିଛନ୍ତି, ତାଙ୍କ ଭଉଣୀ ପ୍ରତିଦିନ ଏକ ମାରାଥନ ଦୌଡ଼ୁଛନ୍ତି କହିଲେ ଚଳେ। ସପ୍ତାହକୁ ୫ ଦିନ ଧରି ଦିନ ବେଳେବେଳେ ରାତି ଶିଫ୍ଟରେ କାର୍ଯ୍ୟ କରିବାକୁ ହେଉଛି। ୧୨ ଘଣ୍ଟିଆ ଶିଫ୍ଟ କାର୍ଯ୍ୟ କରିବା ସହଜ କଥା ନୁହେଁ। ହେଲେ ଏହିୁ କାର୍ଯ୍ୟକୁ ନେଇ ମୁଁ ଗର୍ବିତ।
