ମୁମ୍ବାଇ, ୨୧।୮: ଭାରତୀୟ ପେସର ଏସ୍. ଶ୍ରୀସନ୍ଥଙ୍କ ଉପରେ ଲାଗିଥିବା ଆଜୀବନ ବାସନ୍ଦାଦେଶକୁ ହ୍ରାସ କରି ୭ ବର୍ଷ କରାଯାଇଛି। ଫଳରେ ସେ ଆସନ୍ତା ବର୍ଷ ସେପ୍ଟେମ୍ବରଠାରୁ ଅନ୍ତର୍ଜାତୀୟ ସ୍ତରରେ ଭାରତୀୟ ଦଳ ପକ୍ଷରୁ ପ୍ରତିନିଧିତ୍ୱ କରିପାରିବେ। ବାସନ୍ଦାଦେଶ ସମୟ ସୀମା ଧାର୍ଯ୍ୟ କରାଯିବା ପରେ ଟେଷ୍ଟ ଫର୍ମାଟରେ ୧୦୦ ଉଇକେଟ ପୂରଣ କରିବାକୁ ଲକ୍ଷ୍ୟ ରଖିଥିବା ଶ୍ରୀସନ୍ଥ କହିଛନ୍ତି। ବର୍ତ୍ତମାନ ମୁଁ ଯାହା କିଛି ଶୁଣିଛି, ସେଥିନେଇ ମୁଁ ଅତ୍ୟନ୍ତ ଆନନ୍ଦିତ। ମୋ ପାଇଁ ପ୍ରାର୍ଥନା କରିଥିବା ପ୍ରତ୍ୟେକଙ୍କୁ ଧନ୍ୟବାଦ୍। ମୋତେ ଏବେ ୩୬। ପରବର୍ଷ ମୋ ବୟସ ୩୭ ହୋଇଯିବ। ମୋ ନିକଟରେ ୮୭ ଟେଷ୍ଟ ଉଇକେଟ ଅଛି। କ୍ରିକେଟର ଲମ୍ବା ଫର୍ମାଟରେ ୧୦୦ ଉଇକେଟ ନେଇ କ୍ୟାରିୟର ଶେଷ କରିବାକୁ ଚାହେଁ। ମୁଁ ଜାତୀୟ ଟେଷ୍ଟ ଦଳକୁ ଫେରିପାରିବି। ସର୍ବଦା ଅଧିନାୟକ ବିରାଟ କୋହଲିଙ୍କ ନେତୃତ୍ୱରେ ଖେଳିବାକୁ ଚାହୁଁଥିଲି ବୋଲି ଶ୍ରୀସନ୍ଥ କହିଛନ୍ତି। କେରଳ ପକ୍ଷରୁ ଅନ୍ତର୍ଜାତୀୟ କ୍ରିକେଟ ଖେଳିଥିବା ସେ ଦ୍ୱିତୀୟ ଖେଳାଳି। ସେ ୨୭ ଟେଷ୍ଟରୁ ୮୭ ଉଇକେଟ ନେଇଛନ୍ତି। ସେହିଭଳି ୫୩ ଦିନିକିଆ ଖେଳିଥିବା ଶ୍ରୀସନ୍ଥଙ୍କ ହାତରେ ୭୫ ଉଇକେଟ ରହିଛି। ମାତ୍ର ୧୦ ଟି୨୦ ଅନ୍ତର୍ଜାତୀୟ ଖେଳିଥିବା ପେସର ୭ ଉଇକେଟ ହାତେଇଛନ୍ତି। ଉଲ୍ଲେଖଥାଉ କି, ମାନ୍ୟବର ସୁପ୍ରିମକୋର୍ଟ ବିସିସିଆଇ ଓମ୍ବୁଡ୍ସମ୍ୟାନ ଅବସରପ୍ରାପ୍ତ ଜଷ୍ଟିସ ଡି. କେ. ଜୈନଙ୍କୁ ୨୦୧୩ ଆଇପିଏଲ ସ୍ପଟ୍ ଫିକ୍ସିଂ ଘଟଣାରେ ସମ୍ପୃକ୍ତ ଶ୍ରୀସନ୍ଥାଙ୍କ ବାସନ୍ଦାଦେଶ ଉପରେ ନିଷ୍ପତ୍ତି ନେବାକୁ ନିର୍ଦ୍ଦେଶ ଦେଇଥିଲେ। ଶ୍ରୀସନ୍ଥଙ୍କ ଉପରୁ ବାସନ୍ଦାଦେଶ ୨୦୨୦ ସେପ୍ଟେମ୍ବର ୧୨ ତାରିଖରେ ଉଠିବ ବୋଲି ଜୈନ ନିଷ୍ପତ୍ତି ନେଇଛନ୍ତି।
