ପର୍ଲା,୨।୧୨(ଡି.ଏନ.ଏ.)- କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଦଣ୍ଡପାଟ ଅଂଚଲ ଛଞ୍ଚାଣବାହାଲି ଗାଁର ତରୁଣି ବିଷି(୫)। ଦିନୁଦିନ୍କେ ତାକର ମୁଡ଼ର ଆକର ସଂଗେ ଉଜନ ବଢ଼ବାରେ ଲାଗିଛେ। ଏନ୍ତାଥି ସେ ବଡ଼ାଦୁଖ୍ ପାଉଛନ୍। ଇଆଡ଼େ ଗରିବ୍ ମା’ବାପ୍ ଟଁକା ପଏସା ଅଭାବୁ ଝି’ର ଚିକିଛା କରେଇ ନାଇଁପାରି କରି ଭଗବାନ ଭରସାରେ ରହିଛନ୍।
ସୂଚନା ଅନ୍ସାରେ ଛଞ୍ଚାଣବାହାଲି ଗଁାର ଠାକୁର ବିଷିକଁର ପରିବାର କହେଲେ ମାଏକିନା ଶକୁନ୍ତଳା ଆର ଦୁଇ ଝି’ତରୁଣି, କୌଶଲ୍ୟାକେ ନେଇ ସଁସାର। ପରିବାରଟା ନିହାତି ଗରିବ୍ ଠାକୁର କୁଲିମଜୁରି କରି କୁଟୁମ ପୁଷୁଛନ୍। ଏନ୍ତାଥି ବଡ଼ ଝି’ ତରୁଣି ଜନମ୍ ହେବାର ୨ ମାସ ଉତାରୁ ତାକଁର ମୁଡ଼ର ଆକର ବଢ଼ବାରେ ଲାଗିଥିଲା। ମା’ବାପ୍ ଝି’କେ ଆସର ପାସର ଡାକ୍ତରଖାନାକେ ନେଇ ଛିକିଛା କରାଲେ। ହେଲେ କିଛି ଲାଭ ନାଇଁ ହେଲା। ଡାକ୍ତର ତରୁଣିକଁର ଉଚ ଚିକିଛା ଦରକାର ଆର ସେଥିରଲାଗି କଟକ ବଡ଼ ଡାକ୍ତରଖାନାକେ ନେବାକେ ପରାମଶ୍ ଦେଇଥିଲେ। ହେଲେ ଟଁକା ପଏସା ଅଭାବୁ ଠାକୁର ଚିକିଛା ଲାଗି ଝି’କେ କଟକ ନେଇ ନାଇଁପାରଲେ। ଶେଷେ ଠାକୁର ଝି’ର ଚିକିଛା ଲାଗି ଟଁକା ଯୁଗାଡ଼ କରବାକେ ଦାଦନ ଯିବାକେ ଅଁଟା ଭିଡ଼ିଥିଲେ। ସେ ୨ ବଛର ତକ୍ ଚେନ୍ନାଇରେ ଦାଦନ ଖଟ୍ଲା ଉତାରୁ ଟଁକା ଯୁଗାଡ଼ କରି ଚିକିଛା ଲାଗି ଝି’କେ କଟକ ନେଇଥିଲେ। ସେଠାନେ ଡାକ୍ତର ତରୁଣିର ମୁଡ଼େ ପାଏନ୍ ଜମିଥିବାର କହି ଅପରେଶନ କରିଥିଲେ। ମାସ୍କେତେ ଠିକ୍ ରହିଲା ଉତାରୁ ଏହେଦେ ଫେନ୍ ତରୁଣିକଁର ମୁଡ଼ ବଢ଼ବାରେ ଲାଗିଛେ। ଏନ୍ତାଥି ଗରିବ୍ ମା’ବାପ୍ର ବୁଧିବନା ହେଇଯାଇଛେ। ଇଆଡ଼େ ପରିବାରଟା ନିହାତି ଗରିବ୍ ଆର ଜମିବାଡ଼ି, ଘରଡ଼ିହ ବଲି କିଛି ନଁାଇଁନ। କୁଟୁମଟା ପରହର ଘରେ ଆଶ୍ରେ ନେଇଛନ୍। ପରିବାରଟା ଖାଏଦ୍ ସୁରକ୍ଷା, ବସୁନ୍ଧରା ଯୋଜନା, ଅବାସ ଯୋଜନା ଆର ରାଏଜ୍ ସରକାରକଁର ସ୍ବାସ୍ଥ୍ୟ ବୀମା ଯୋଜନାରୁ ବି ବଁଚିତ୍ ହେଇଥିବାର ଜନାଯାଇଛେ। ଇ ନିହାତି ଗରିବ୍ ପରିବାର ଉପରେ ଜିଲା ପରଶାସନ ଦୁରୁଷ୍ଟି ଦେଇ ତରୁଣିର ଚିକିଛା ସାହାଯ୍ ସମେତ ପରିବାରକେ ସବୁ ପରକାର ସଯକାରୀ ସାହାଯ୍ ଯୁଗେଇ ଦେବାକେ ଗଁାର ମହେଶ୍ୱର ଜୁଏଡ଼, ଡିଙ୍ଗର ଜୁଏଡ଼, ଅଲେଖ ସୁନାନି, ଦିନବନ୍ଧୁ ପାଣିଗ୍ରାହୀ, ହୁକିମ ଭଏଁସାଲ ପରମୁଖ ଦାବି କରିଛନ୍। ଇ ବାବ୍ଦେ ପର୍ଲା ସ୍ବାସ୍ଥ୍ୟ କେନ୍ଦ୍ରରର ଚିକିଛା ଅଧ୍କାରୀ ସଞ୍ଜୀବ କୁମାର ନାଏକକୁଁ ପଚରାଲାରୁ ତରୁଣିର ଚିକିଛା ସୁବିଧା କରାଯିବା। ଦରକାର ପଡ଼ଲେ କଟକ ବଡ଼ ଡାକ୍ତରଖାନା ନେବାର ବେବସ୍ତା କରାଯିବା ବଲି ସେ କହିଛନ୍।
